李靜，圖片來源：直播片段截圖

香港女子乒乓球團隊取得歷史性奧運銅牌，表現激情與頻爆金句的教練李靜人氣急升。他接受香港電台訪問時分享了銅牌戰部署心得，又解釋了自己與球員溝通的風格。他說，選擇蘇慧音出戰第四場單打，是因為其打法能克制對方進攻；至於其教波作風，「我就好簡單架唧，遇到問題就直接了當話畀佢哋聽。」

李靜透露，銅牌戰對德國的排陣，是經過總教練陳江華等給予意見，形容作出決定前有很大壓力：「對教練來講，心理壓力一定大嘅，第二個係對球員特別大，因為蘇慧音第一次參加奧運，未打過兩單，之前嘅單打、包括團體時，佢個人賽時都唔係好順，突然間擁佢上去咁顛峰嘅比賽度爭牌，我諗都係博一博，結果有意外收穫囉。」

只考慮蘇慧音優點　不論得失

李靜解釋，選擇蘇慧音出戰單打，是因為她的打法能夠克制對方的進攻位置，唔會食對方旋轉，更加有機會殺球得手，當中只是考慮了蘇慧音的優點，而不考慮賽前得失，結果證明一切。

2004 年雅典奧運夥拍高禮澤取得乒乓球雙打銀牌的李靜形容，今次帶隊取得銅牌的喜悅比當年更甚：「嗰種開心強烈啲，自己攞牌當然係好開心，人哋戥我高興。今次調返轉，我啲球員攞牌，我戥佢哋高興，更加興奮同埋激動。始終自己畀咗好多心血，心理導師同體能教練都畀咗好多心機落去培訓啲球員。攞到獎牌唔係單止我激動，我諗我哋背後嘅功臣都係會激動。」

（AP Photo/Kin Cheung）

男仔講嘢好直白　女仔開心先做得好

他說，身為教練與球員溝通很重要，尤其是女隊員。他透露，另一位教練張瑞建議他，跟女隊員說話要有耐心，「男性思維同女性思維係好大區別，男仔講嘢就好直白嘅，求結果，求解決；女仔就需要一個情緒紓緩，同埋開心先會做得好。」

李靜續說：「我就好簡單架唧，邊學邊做囉，遇到問題就直接了當話畀佢哋聽，嗱，我而家想咁樣解決呢個問題，咁可能會引起乜嘢乜嘢情況，但係，我都係咁做架嘞。咁情緒希望你自己解決。直白啲好，我相信佢哋係有能力調節自己嘅，始終女仔係斯文啲、溫柔啲嘅，咁如果背後有個咁嘅教練喺度 push 佢，推動呢個氣氛，我諗都好需要嘅，一個 party 要人搞氣氣架，係咪先，咁我啱啱好喺乒乓球呢個 party 畀到啲氣氛佢。」

網民推崇為「金句王」，李靜回應說：「我覺得係我場上嗰種求勝慾望，同埋嗰種激情，同佢哋產生咗共鳴。我諗香港好多觀眾都係想香港球員贏嘅，所以不自覺就代入咗教練呢種角色；即係半個教練，又係觀眾。但係你哋話金句王，我自己唔敢認，因為我始終文化水準有限，講啲接地氣嘅嘢、普通嘢，大家閒偈咁傾嘅，可能我比較夠膽講少少啫。」