駛咗錢等於做咗嘢？五項措施支援體育發展？

《立場》報道：「提五項措施支援體育發展　林鄭：肯定唔係三分鐘熱度」

咦，諗起有人講過「一定走數」！😂

記唔記得，曾幾何時，曾德成仍然係民政事務局局長嘅時候，傳聞試過同林鄭開會嘅時候曾經試過拍枱？

點解要拍？因為 CY 話體育無貢獻，林鄭當時想滅咗個啟德體育城！唔係曾德成拍枱，我諗個計劃早就灰飛煙滅。

體育我識條鐵，但係 STEM 我叫有多少認識（睇圖），一聽到呢啲政策，就知道又係「產業圍威喂」嘅時間。

2008 年，我曾經著住背後印有「Hong Kong」嘅 T-Shirt，代表香港參加喺美國加州舉辦嘅機械人比賽，雖然最後發生咗好多意外，成績唔係好好，但係都可以吹下，話世界排名 61 位 😂

我玩 STEM 嘅時候，係 STEM 仍然未叫 STEM 嘅時代……當時 STEM 界其實已經有好多黑暗內幕，依家諗起我都覺得好黐線。不過，呢個講幾日幾夜都講唔哂，有機會再開心 share。

到依家有 STEM 呢個 term 之後，就無端端受到追捧。2017 年，政府決定每年派二十萬畀中學搞 STEM。

哇，好重視 STEM 喎！

結果，大把學校為咗攞到筆錢，9 買幾十部 iPad、3D Printer、無人機，搵埋啲唔知邊度走出嚟嘅「導師」開埋啲唔知做咩嘅工作坊，然後就可以同人講我地都玩 STEM 㗎，yeah！

之後呢？然後就沒有然後。錢都攞咗啦，做咩問呢條問題。

報道入面，仲話「推動體育產業化」，聽到呢個講法，就知道必定失敗。

呢個講法，預示同樣嘅 pattern：吹捧 → 政府開水喉 →「產業」（尤其紅資）冒起食住條水 → 圍威喂 → 完！

啱啱我講德國人有時候唔稀罕金牌，睇 comment，有人話我點解唔鬧香港嘅怪獸家長，批判香港嘅填鴨式教育。真好笑，點解你會覺得我無？講到底，香港要推動一樣嘢，講嚟講去都係話「產業化」「產業化」— 教育都係，STEM 都係，運動都係。

但係，有無諗過，有啲嘢要做得好，係唔能夠或者唔應該甚至唔可以產業化？

你自己睇下，科技園有幾科技？（關鍵字：科學園第四期）中藥港呢個講法你又記唔記得？可以講，香港政府想冚家產業化啲咩嘢，嗰樣嘢都必定冚家鏟化。

香港運動員，始終都係要香港人撐。

 

延伸閱讀：
【香港時事】德國公開考試，就不能講納粹的「優點」？
【香港時事】移民不移民？淺談香港人嘅去留問題
【香港時事】嘈咩嘈，全世界都冇公民提名，德國都冇 （好似係）

作者網誌