自由選民黨 FW — 德國都有「本土派」？

唔同傳媒嘅「政治氣壓計」Politbarometer 只會展示有影響力嘅政黨，如果無影響力的話，一律計入「其他」。

FW 真正嘅名稱係 Freie Wähler「自由選民黨」，成個走向好特別，依家竟然可以喺 Politbarometer 出現，證明佢地已經走出「小政黨」之列（其實 FW 已經入咗拜仁州政府好耐，原來黨主席 Aiwanger 仲係拜仁財政部長）。

FW 起家，本來係走「反政黨」路線，佢地原先根本唔係政黨，而係一群喺拜仁關注地區議題嘅人。之前都有講過，德國州政府同再落去嘅地區行政架構，都有一定嘅自由度（有啲似以前香港區議會，不過州政府權利更加大），所以有啲人唔滿意大黨霸權，就走咗出嚟，打正旗號要做地區政策，真正「本土」。

我記得以前做消防員嘅時候，有一個同袍甚至係 FW 候選人，我未睇過 FW 政綱，但係同佢傾計嘅時候，有少少感覺，之後對比返，發現我嘅估計係啱：無宗教背景但傳統（唔反移民但認為要嚴格審批外國人流入），尚經濟自由但又強調要大力支援民生議題。

雖然有人認為 FW 係中間靠右，但係能唔能夠咁講我自己都消化唔到。

FW 嘅出現同冒起，其實都好可以折射到德國政治入面嘅某啲矛盾，呢個有機會可以再講。

想認識多啲德國大選議題？咁記得要睇我搞嘅【齊齊玩 Wahl-O-Mat】直播節目，一齊傾下德國人關注嘅議題！