圖片素材來源：ViuTV 影片截圖、TVB 影片截圖

咦？點解有陶瓷嘅？望多陣先。茶壺、茶碗，心諗：邊間茶館咁勁，竟然落電視廣告？最後字幕四隻字――「未圓系列」，吓！我好似突然 get 到啲嘢，立即叫咗出嚟，「ViuTV 中秋條片玩到咁大？」

我唔信，Google 一下，發現原來有個 2 分鐘的 full version，訪問了 4 pairs 仍然在香港生活的人。他們都同家人和朋友分隔兩地，說起今年中秋的感觸，超級洋蔥。問他們重逢的話會說甚麼，其中一人說攬住對方，講一句「我真係好掛住你」，聽到眼濕濕，總有一個分離的故事觸動到你當下的經歷。

受訪者應該是細心諗過度過的。由夫妻，到朋友，到嫲孫，最後係家傭，你見到「家庭」的定義愈拉愈闊。每逢佳節倍思親，親不只是有血緣關係的人，工人姐姐都是家人。這份思念亦跨種族。有在英國說英文的「鬼婆」嫲嫲，也有南亞裔的工人姐姐。短短兩分鐘，訊息量之重，扼要展現出價值包容，簡直是心機之作。

不只揀受訪者有心機，拍攝都好藝術味，極有格調。試諗下，你拍中秋片，搞膽死無圓月、無玉兔、無燈籠、無月餅。（Fair 講句，最後字幕「待人月再圓」，字體設計上是有用到一勾彎月嘅，但就係咁大把）唔係做 creative 嘅人唔敢諗，而係要老細肯 buy、夠膽做。呢條片出到街，真係好痴線！係突破！用茶碗的圓，代表月亮；用陶器的粗糙，代表月球凹凸不平的表面；用器物的瑕疵，比喻人們心裡的那份佳節不圓滿。喂！點解可以咁超前？香港觀眾接唔接到㗎？

公平點，我們也看看友台 TVB 的參賽作品《心在家在》（廣東話版請按此）。有趣的是，兩個電視台其實都捉住同一個角度去講中秋，但表達手法實在差太太太遠了。太空人月球眺望地球，老梗用了幾多十年呀？我大概 get 到個故事線係：老豆去咗做太空人，所以就搞到同妻女分離，不過唔緊要「心在家在」啦。喂呀，香港邊度有人做太空人㗎，成個設定根本就堅離地，好難投入，感動不來。不過，香港無人上太空唔緊要，國家有！神州十三號近來好似準備再升空了，我相信香港同胞見到五星紅旗迎風在太空飄揚，一定會感動流涕。家庭團圓這些兒女私情，算甚麼？

中秋宣傳片一役，好比中學的作文功課。大家題目都一樣，各自發揮成點就真係睇製作單位嘅造化。更加難得係，兩台今年都切入點相近，但竟然都可以拍出咁唔一樣的作品。未必係高下立見嘅，各花入各眼啦，最緊要有得揀！