【德國時事】選戰馬後炮 — 略談德國國會大選組閣可能
首先，我自己本身估計，CDU/CSU 應該就算表現差都好，都應該會贏到個馬鼻。當然最後結果，其實 Union 都唔係真係輸好多，淨係輸 10 個議席，所以最後民調同結果相比，Union 都係比預期好咗丁丁咁多。始終，遊離選民入面有好多懶人，到最後無咩諗法，都會投大黨。
我曾經不下一次聽到德國人講「雖然…（數臭大政黨不是下刪一千字），但係我都想投畀有機會可以合組政府嘅政黨」。始終細政黨要入國會有門檻，如果投完入唔到，其實係間接放大咗其他人選票嘅力量，所以唔鍾意太左太右嘅政黨，好多時候最後都會投黑紅。
好啦，講組閣的話，依家言之尚早，但係計算上有三個可能性，依媒體估計都係：
最有可能 — 交通燈聯盟：社民黨 + 綠黨 + 自民黨（紅綠黃）
其次 — 牙買加聯盟：聯盟黨 + 綠黨 + 自民黨（黑綠黃）
最唔似樣 — 永續大聯盟：社民黨 + 聯盟黨（紅黑）
組交通燈有咩困難？社民黨比較左傾，例如話想改革基層社會福利，加最低工資加到 12 歐一個鐘（依家係 9.X 歐），而自民黨比較右傾，反對加最低工資，亦都想令退休保障制度更加自由有彈性，Lindner 亦都有意攞財長呢個位。自民黨依家成為組閣嘅膽，有幾樣嘢一定會企硬，社民黨肯唔肯讓步就真係好難講，不過社名黨講到明有心先組交通燈，所以成事機會最大。
組牙買加有咩困難？首先，牙買加上一屆其實已經有傾過，最後係自民黨令到談判破裂的，咁今次自民黨會唔會又扮大牌？應該唔會，今次自民黨好想入政府，已經同綠黨預先傾緊，依家反而係綠黑撈唔撈得埋咁解。社民黨亦講到明會力爭總理之位，聯盟黨選戰失敗，好多人已經叫拉錫算狗掃，退返返去做反對黨先，如果仍然貪入政府，肯定會有好多反對聲音。
有人話，大聯盟唔會出現啦！之前講咗唔再組，但係睇返四年前，其實好多社民黨嘅人已經講咗話唔要再畀聯盟陰乾，就算選完之後都好多人大大聲話唔要組，傾牙買加先，但係傾傾下傾唔成，最後咪又係死死氣玩多次？所以政治係妥協嘅藝術，無絕對嘅。但係當然相對可能性比較低啦，因為社民黨攞最多議席，本身已經唔想同黑黨再組，再組的話，上一次已經不滿嘅人，明言會走人（例如代理黨主席 Kevin Kühnert）。社民黨都係傾向做交通燈先，而同黃綠傾唔埋嘅可能性肯定比紅黑傾唔埋嘅可能性低好多。
咁對香港人嚟講，最好係咩結果？當然係紅綠燈啦。綠黨黃黨都喺香港議題上面非常支持香港人的。不過呢個題目，我想再深入啲講，留返下次再講。
延伸閱讀：
【德國時事】我經歷過嘅德國綜援悲傷故事，分析拉錫點解話攞綜援原來係份工！
【德國時事】爆肝之作！「對華政策選舉放大鏡」上線啦！
【德國時事】巴符州選舉 — 我發現，呢幾日，我討厭政治…
原刊於作者網誌