【職工盟解散】昔日領導碼頭工潮 何偉航淚言：職工盟「娘家」被搞散！
2013年碼頭工潮，寫下了香港戰後最長工運紀錄。當年有份領導工潮的工會總幹事何偉航，現已離開香港。得悉職工盟將會解散後，他自言情緒低落，有時更會無故落淚。他形容，職工盟猶如自己的「娘家」，笑著憶起以前常跟別人說回娘家開會，可以說是第二個屋企，但說到這裡，他隨即臉色一沉，忍不着流下男兒淚。良久以後，他哽咽續說：「……太多片段，即係嗰種，香港好多組織，你唔會見到人與人之間嗰種親密程度、緊密程度，情如手足嗰種程度，喺其他組織（唔）係咁容易見到。」
何偉航今年7月辭去西貢區議員一職後已經離開香港。職工盟常委今個月通過解散決議後，他接受了眾新聞視像訪問，暫不願透露身在何方，但明言不是流亡、不是移民，總有一天再回港。
40日工潮歷歷在目 未忘戰友點滴
回首8年前，碼頭工潮爆發時，何偉航加入職工盟不過三年，擔任碼頭工會總幹事，一戰成名。鏡頭很多時對準了他——一個撐著拐杖、頭綁紅巾的男生，在台上嗌咪與唱歌，面對傳媒時表現堅定。事隔多年後他侃侃而談的盡是細碎片段：在碼頭外露宿聞到的柴油味、小朋友星期日來探罷工的爸爸，於是一起在碼頭旁邊打機、李慧玲每早開咪時提及罷工情況、黃夏蕙從果欄買來一箱蘋果……
何偉航還記得，蘊釀罷工時，以為只有數十工友會嚮應，孰料最終達300人之多。最初與工會理事每個月開會，一般都在早上9時，因為碼頭工人一更就是24小時，早上8時開工、翌日早上8時收工，「通常我就會幫佢哋嗌埋早餐，佢哋上嚟職工盟。都係嗌啲好普通嘅餐蛋麵、炸醬麵，一齊一路食一路開會。」
何偉航訴說工潮的一點一滴，腦海還浮現工人意志堅定、自信的臉孔，還有跟他說為了工潮豁出去的豪氣，「有啲係話我直情要借財務公司，罷工罷幾耐都好，借財務公司我都要繼續罷落去，因為呢個係唔公義嘅事情。」
「當時和黃好勁，因為佢有錢人，佢喺法庭申請禁制令，禁制令嘅意思即係唔俾我哋留喺碼頭。」何偉航續形容：「嗰時嘅感覺有啲心酸嘅，佢哋係你嘅人，但你竟然趕走佢哋。」禁制令頒布當晚12時生效，所有罷工工友、來支援的學生、工會成員，當晚一齊收拾帳篷、檯櫈等物資，在碼頭外建立起「碼頭村」，繼續抗爭。
何偉航說，那時候他們佔領了一條行車路，警方還會用雪糕筒幫忙封路。「當時警方就唔會留難，盡量都配合，睇吓點樣可以幫助我哋行使基本權利，罷工嘅權利、抗議嘅權利。」
最終，碼頭工潮載入香港歷史：2013年5月6日，以加薪9.8%結束長達40天的工潮，是香港戰後歷時最長的一次工運。
一個歷史系畢業生走入碼頭 放下知識份子的身段
「我未入工盟之前，我嘅世界同貨櫃碼頭係無相關，只不過係喺大學讀書，或者喺立法會抗議。」大學期間，他開始留意勞工議題：2005年韓農示威到2007年紮鐵工潮，見到參與者被捕、認知到資本家怎樣謀取暴利、發現世界有一個弱勢被犧牲的規律。有一次，他與同學到沙田新城市廣場做外判清潔工的工資調查，發現時薪只有12蚊。「我哋作為大學生都覺得好震驚，一個咁富庶嘅社會，當時都仲講好多人權，講好多公義、人文價值嘅時候，竟然都可以出現咁樣嘅情況。」這些問題就如種子般落在他的心中。
2008年他從中大歷史系畢業，在教育局工作過兩年。一次機緣巧合，有同學在職工盟工作，向何偉航提及有工會幹事空缺，他想到從前接觸工人，明白他們的辛酸，希望可以做點事維護他們的尊嚴，於是毅然放棄政府工，在2010年五一翌日加入職工盟，3年後擔起碼頭工潮的重任，就這樣與工人渡過11個年頭，直到今年7月辭職。
何偉航坦言，初期接觸碼頭工人時不太適應，而且他要撐拐杖出入碼頭，惹起工人一些疑問。實情是他兒時患骨癌，右腿一截骨被用作移殖，以致長短腳，要撐拐杖行走。靠着工會前輩帶領，加上與工人多溝通，他漸漸明白工人的處境。
他自言不可以再用知識份子的身份去接觸工人，而是用一個普通香港人，甚或乎一個「兒子」的角度來理解：「因為好多碼頭工人都係爸爸，佢哋要養家，即係原來爸爸係可以容忍到咁長工時，或者職安咁差嘅環境做嘢，只不過係為咗養妻活兒。」何偉航續指，這些都是很人性的東西，常人不能理解怎會有人願意一日返24小時，但「要養家爸爸」可以。
理解了工人的想法、訴求，工運才得以推展。何偉航認為，重要的是工人會知道自己有能力管理工會、有能力透過開會取得共識，而在這個充權（empower）的過程裡面就可以體會到民主的價值。
雖然事隔八年，何偉航至今仍然有與碼頭工人聯絡，在港時偶爾打邊爐。不過他自工潮後就主力在工盟做工會培訓，擔任「工會教育幹事」，較少參與勞資糾紛。2019年9月反修例運動期間，他在西貢曾被4名人士用鐵通和木棍圍毆，雙手骨裂、頭縫30多針。同年11月，他當選西貢白沙灣區議員，直到今年7月辭任。
職工盟解散 不捨「娘家」被搞散
職工盟解散消息傳出前，何偉航經已辭去了區議員、職工盟、工黨的職務，離開香港。得悉解散決議後，何偉航坦言情緒相當低落，時而更會無故落淚。他經常將職工盟這個「娘家」掛在咀邊：「我做咗區議員之後就成日同同事講，我今日要返娘家，開會定點樣點樣，即係佢係我第二個屋企，因為……呢個……有啲感觸……」何偉航說到這裡不禁落淚，良久未能言語。
他揉一揉眼，哽咽續道：「太多片段，即係嗰種，你唔會見到，香港好多組織，你唔會見到人與人之間嗰種親密程度、緊密程度，情如手足嗰種程度，喺其他組織（唔）係咁容易見到。」他憶述，彼此見面的時間比見家人多，尤其是工潮期間，就似親人一般。
係一種好唔捨得，感覺就好似我哋屋企被人搞散咗，哈哈，係好唔捨得。
捨不得的，還有人與人之間團結的感覺。何續道：「可能外界睇我哋成日淨係拉banner、示威牌，外界對我哋嘅認識好少……我哋搞培訓活動、屬會營，好多時間會傾偈、好多時間會討論、好多時間做同一件事，呢啲片段喺過去30年，我諗唔淨係我，我諗好多工盟同事都感受到，我哋返工係無壓力嘅，因為我哋做緊自己認同嘅嘢，我哋享受緊呢個過程，我哋唔會當呢份係工。」
職工盟倒下仍會有工運 靠的是人的意志
沒有了職工盟，還會有工運嗎？「有嘅，一定有。」何偉航覺得：「只要有一個獨立嘅工會喺香港存在，就會有工運，主要係睇一班人，有無意志繼續為勞工問題發聲。」
他認為職工盟30多年的努力不會付諸流水，因為爭取了的薪酬調整政策、最低工資立法、培育了的工會領袖或理事，不會因解散而消失，「點樣打壓都係唔會（消失），因為已經發生咗。」不過，他相信未來要推動勞工權益將更加困難，可能要花很長時間、更大的力量，才能推動到些微改變，甚至可能出現「停滯不前」的狀況。
「今日職工盟嘅倒下，唔係淨係香港人嘅事，我哋會覺得係全世界、國際工運嘅一件事。」何偉航指，勞工問題並不單單出現在香港，全世界都面對同樣的問題，各地的經驗可以互相參考。「我覺得香港人都要有啲自信，尤其是過去兩年，我哋有好多抗爭嘅經驗，我哋有好多爭取民主自由嘅經驗，其實擰番出去世界各地，都有人會聽、有人參考、會有人學習。」
「我想維持住、保存住以往我哋一啲工運嘅價值觀，同埋我希望呢30年嘅成果可以繼續不斷喺世界各地講，同唔同嘅工會分享香港經驗。調番轉，我都希望可以累積到一啲世界國際工運嘅經驗，可以喺不久嘅將來擰番嚟香港嘅工會可以用到。」
何偉航表示，很感恩可以在職工盟工作這麼長時間，希望將來仍有這樣的機會。他理所當然地說：「我覺得工會係我一生嘅志業。」
觀看原文： 按此連結