【職工盟解散】工運歷史見證人 留守工盟至燈滅 鍾松輝
職工盟今日召開會員大會，如無意外啟動解散程序。這刻，68歲的鍾松輝又一次為解散打點，選擇留守到熄燈一刻，他說得簡單：「我係需要留低嘅人。」
鍾松輝做工盟執委有21年了，只有今屆被選為工盟司庫，卻遇上解散，必須要他簽票才能完成解散程序，而且工盟執委在商議解散決定時，有共識要盡量減少要留下的人。鍾松輝亦是民陣末代召集人陳皓桓「託孤」後處理解散的人，他自嘲：「講句難聽啲，一件污兩件穢啦。」
置身公民組織瓦解浪潮當中，鍾松輝總是一副氣定神閒的樣子，偶爾銜著煙斗，吸幾口過過癮就收起來，娓娓道來工盟的故事。他說，自問無犯過法，要擔心的亦擔心不來，最壞情況也就是坐兩年監。他計過，判監兩年實坐年半左右，「我老婆話，你咪當去度假囉。」
架著圓框眼鏡、白髮蒼蒼的鍾松輝，駕巴士大半生，腰板依舊挺直，未見老態，反而有時笑得似小孩。他1979年入職中華巴士（中巴）做車長，到1998年過渡到新巴，這軚盤握了42年。3年前退休，翻閹，下個月第二次退休，就在68歲生日前一天。
八九六四啟蒙 思考工會角色
任職中巴時鍾松輝已經加入工會，中巴工會隸屬港九工團聯合總會，親國民黨。不過當時的工會純粹打打麻將，循例跟老闆談加人工，與工運沾不上邊。直到1989年六四事件，36歲的鍾松輝開始思考自己的角色：「八九呢，嗰個場面非常之震撼，亦都因為嗰時已經知道香港九七年要回歸，睇到內地嗰個情況，回歸之後香港會不會步內地嘅後塵呢？」
「老實講，如果香港唔係有回歸，我相信（八九六四）都未啟蒙到我，因為好似唔關自己事。」鍾松輝自言，六四事件發生前也是「港豬」。1990年，正在反思可以為香港做些甚麼的鍾松輝，留意到職工盟成立。獨立工會對他而言很是吸引，因為終於不受制或依附於政治：「職工盟係對成個香港工運嘅理念同概念，係天翻地覆嘅（改變），以前唔係左就右。」
1998年巴士專營權易手製造了絕佳契機。新巴投得中巴所有路線的專營權，中巴員工全數過渡。新巴工會同年成立，1998年10月開第一次會員大會，通過加入職工盟的決定。
未見過咁癲的工會
「未見過一個工會咁癲，五年搞八次行動。」鍾松輝以前受訪，透露過管理層的點評。2003年資方取消雙糧，工會計劃工業行動，啟動前夕成功爭取，工會人數急增至800人；2010年，罷工要求跟隨通脹加薪，運輸署責成新巴處理好勞資關係，資方其後每年改善薪酬待遇；2018年，按章工作抗議漠視疲勞駕駛……
鍾松輝自新巴工會成立以來出任主席，2015年交棒，現在掛個名「顧問」。他形容，沒有幾次工業行動是成功的，只是自己的性格使然，屢敗屢戰：「話語權喺佢度，勞方始終都係弱勢嘅，佢通常都係用打壓嘅手法逼你勞方妥協。但係偏偏我個性格就覺得，唔應該妥協囉，係咪先，爭取到底。」資方亦汲取經驗，盡量坐低開會達成共識。職工盟的角色，則是提供意見，怎樣做還是由工會自己決定。
如今，職工盟執委受到人身安全的威脅，決定解散。雖然新巴工會仍然存在，但鍾松輝思前想後，就是想不明白何以至此：「當時（有解散決定）我都唔知道自己有咩反應，個腦一片空白。即係覺得，點解香港會變成咁？老實講，工盟存在做過咩犯法事？我真係唔明，點解政權要打壓一個獨立工會？」
禮儀師 與亡者走最後一程
即使不明不白，鍾松輝願意陪工盟走最後一段路，又一次為解散打點。要比喻的話，他大概就是禮儀師，為亡者最後一程維護僅有的尊嚴。
在職工盟擔任執委21年，恰恰今屆被選為司庫，解散之際他的角色至為重要，需要他簽票，就算司庫轉名也怕銀行拒納。另一個原因，他笑嘻嘻的說：「講句難聽啲，一件污兩件穢啦。」今年5月底，鍾松輝受民陣末代召集人陳皓桓所託，擔任民陣聯絡人，原擬等9月開會員大會選召集人（及秘書處班子），無人做就再議民陣去留。結果，8月份已篤定無人加入民陣秘書處，終告解散。
對於鍾松輝來說，職工盟是他的啟蒙老師。他學到了工運的知識、獨立工會的理念、為何工會要連結社會。「職工盟解散對我當然係一種損失，但最重要嘅，係香港人嘅損失。因為香港無咗獨立工運，無咗獨立工會、自主工會，你再搵嗰啲，一定係靠邊站。」
天下無不散筵席。老實講，我哋都好有信心，解散民陣，唔代表香港無咗公民社會；解散工盟，唔代表香港嘅工運唔可以繼續前行，因為仲有好多獨立工會喺呢個社會度。
七旬人生 「曾經付出過算係咁」
此際風高浪急，可有想過退一退？鍾松輝坦言：「無諗過就假嘅，但問題係唔到我諗。風險，大家評估係有嘅，但係個風險去到邊度，大家都唔知。」他續指：「老實講，如果佢要搞你，就算你而家唔去處理民陣、唔去處理職工盟……無得避嘅，佢要搞你就無得避。」
鍾松輝說，太太自他搞工運起就無阻止過，「佢都明白我性格，所以都唔會阻止我。（你性格倔強？）又唔係倔強，不過有時我覺得睇唔過眼囉。其實我好易傾架咋。」而即使現在公民組織被盯上，鍾松輝仍談笑風生，說預計過最壞情況是坐兩年監，實際即是坐1年8個月：「我入去坐年半，我老婆話，你咪當去度假囉。講真，我而家幾廿歲，屋企嘅經濟唔係我一個人揹晒。」說罷還哈哈大笑。
鍾松輝家裡有為數不多的擺設，有個玻璃球，裡面是他跟孫仔去搭纜車留念的照片。一提起孫兒，就笑得合不攏嘴說：「呢個（孫）就最黐我，過到嚟一定要我陪佢瞓。」家裡還有個迷你扭計骰、沙灘桶等，玩具都是隨意放在地上。客廳有個玻璃櫃放雜物，裡面橫七豎八放了好些獎座，其中一個是工盟有年選舉「不認命的工會人」，鍾松輝獲新巴工會提名，成功獲獎。
回首將近70年的歲月，鍾松輝直言：「不枉此生。」他訴說這一生經歷過的大事：六七暴動、八九民運、一九年社會運動。他接著說：「自己喺工運上又好、喺社運上又好，亦都留低少少足印，都……都覺得自己算係咁，雖然無乜貢獻，但曾經都付出過啦。」
觀看原文： 按此連結