【西灣河開槍案】開槍警稱擔心白衣男搶槍故拔槍 辯方：自己拔槍出嚟方便佢搶？
前年11月「黎明行動」示威，21歲青年「熊仔餅」周柏均腹部中槍受傷，事後與另一青年被控企圖搶槍及阻差辦公等罪。開槍警今午（9日）繼續接受盤問，稱現場白衣男子向他走近時做了一個「煽惑手勢」，「煽惑後面嘅人一齊上」，他覺得身為警察，要就此作出拘捕，故沒有後退。他稱擔心白衣男會搶去他的配槍，故向他擎槍，引起辯方質疑：「你諗法係咪驚佢搶槍，於是自己拔把槍出嚟，方便佢搶？」
不知能否成功離開 選擇轉身面對
代表次被告的大律師吳維敏今午盤問開槍警員A，指A供稱當日聽到有人大叫「唔好俾佢走」，因而感到危險，質疑：「你咁聽話，人哋叫你唔好走，你就真係唔走？」辯方指A甚至轉身踏前了一步，與其感覺危險的說法矛盾。
A解釋，踏前是「連串嘅轉身動作」，而且向後退並不安全，可能會跌倒。他又稱：「我係一個警察，所以我要搞清楚件事，甚至乎如果我走嘅話，都唔知走唔走得甩。於是我選擇轉身去面對，希望啲人唔好因為我走而追上嚟」。
辯方續指，A擎槍前，他附近只有記者和兩名普通街坊，當時對他構成威脅的人，是否只有白衣男和他身後的兩名黑衣人。A回答：「其實係成個氛圍。」辯方跟著問及白衣男向A走近後發生的事。
白衣男做手勢叫人一齊上 「有煽動、煽惑嘅感覺」
辯方：孤身一人下，冇嘢阻你繼續向後移動，同時繼續按槍柄戒備？
A：當有人違法，我作為警察冇理由向後退，要作出拘捕。
辯方：（次被告）做咗啲咩要拘捕佢？
A：佢煽惑後面嘅人，叫佢地一齊上。
辯方：你聽到佢咁講？
A：我聽唔到，但見到佢有手勢叫後面啲人一齊走上嚟。
辯方播方片段顯示，白衣男衝出馬路後，曾輕輕舉起雙臂至心口位置，手臂輕輕撥向自己。A補充：「佢做咗做手勢，佢身後嘅人有動作，當時我覺得佢嘅手勢有煽動、煽惑嘅感覺，於是我先宣布拘捕。」惟他箍住白衣男後，「似乎唔容許我做到呢樣嘢（宣布拘捕）。」
A續解釋，當時白衣男一直向他走近，他擔心白衣男會搶去他的警槍，於是從槍袋拔出手槍，惹來辯方質疑。
辯方：不拔槍其實較難被搶 警：可能換來嚴重受傷
辯方：你驚人搶你支槍，佢又行緊埋嚟，咁你竟然自己拔支槍出嚟，咁你諗法咪我驚佢搶我把槍，於是自己拔把槍出嚟，方便佢搶？
A：唔同意
辯方：咁唔拔槍係咪難啲搶到？
A：係，但係換嚟嘅可能係嚴重受傷，生命受到威脅。
辯方：你拔槍，仲指住白衣人心口，你支槍同佢零距離？
A：係，於是我都即刻移返開支槍。
辯方：你同唔同意越逼近佢越容易搶到支槍？
A：同意。
兩名被告周柏均（21歲）及胡子鍵（20歲）同被控於2019年11月11日，在西灣河太安街、筲箕灣道與成安街十字路口，故意阻撓在正當執行職務的警務人員A，及企圖搶去A的警槍；周另被控企圖在合法羈押下逃走。案件明續。
案件編號：DCCC 475/2020
觀看原文： 按此連結