許賢@試當真：幽默感的主軸是自嘲 越困難越要製造歡樂 喻港人學曼城領隊哥迪奧拿「攻唔到，咪控住波先囉」
「走先啦，係咁先啦，下次再玩啦！」這句琅琅上口的歌詞唱到街知巷聞。蘇致豪及許賢今年化名「MC $oHo」及「KidNey」以首本名曲《係咁先啦》在香港樂壇橫空出世，成功攻佔各大流行歌曲榜，搞笑幽默形象入屋，令樂迷留下深刻印象。其中作為YouTube頻道「試當真」骨幹成員的許賢，接受眾新聞《冒號開引號》節目訪問，透露其幽默感的主軸是自嘲，又認為越困難的時期，越要製造歡樂，這就是他們的使命。
熱愛足球的許賢亦以足球理論比喻現時香港的狀況，「我哋就好似（英超球隊曼城領隊）哥迪奧拿嗰套咁（控傳足球），你要不停傳波、不停傳波、不停傳波，好多時候全隊都要一齊參與，咁樣做有時唔係為咗入波㗎，係要focus返，當一有機會起腳射門，就可以隨時ready射波。所以如果遇到一啲好勁嘅對手，我哋攻唔到上去，咪控住波先囉。」
12月18日周六晚九時首播：
今年28歲的許賢，香港理工大學會計及金融科系學士，2015年畢業後加入YouTube頻道「CapTV擷電視」，參與製作了大量短片、配音片，開始為人熟悉；2018年，他與好友兼中學同學蘇致豪創立YouTube頻道「金剛Crew」，創作針砭時弊短片；2020年，二人連同藝人游學修創立YouTube頻道「試當真」，因題材貼地，深受年輕人歡迎，現時已吸引逾35萬觀眾訂閱頻道，並登上YouTube本年度香港「十大熱門創作者」榜首。
在YouTube上形象百變、風趣幽默的許賢，透露自己的幽默感主軸是自嘲，當中亦充滿黑色幽默，而這種自嘲的性格，早於中學時期開始浮現。
許賢憶述試過在中學預科的地理測驗試卷中，將分數由3分，在旁邊寫多個2字，變成23分，但當時的他並非打算玩黑色幽默，純粹為了麻醉自己，以最特別的方式宣洩自己對分數的不滿，「因為最正路嘅分享一定係，『哎呀，死啦，咁低分，點算啊？』，但我就覺得呢種方式表達實在太無聊，我同班friend就會諗，究竟用咩方式去呈現呢種感受，又唔使咁悶咁講呢？」
許賢坦言自己的幽默感不是渾然天成的，而是受到整個中學生涯的薰陶和洗禮，他經常會思考如何引同學和老師發笑，「中學時候嘅我成日都會諗，究竟點樣可以用一句話就炸場，即係我講一句嘢，成班就可以笑哈哈咁，唔知點解我由細到大都好想做到呢個效果，仲要我坐喺角落位就最好，因為一講完就會全班都聽到。」
不過，在深度思考的成長路上，許賢的腦海漸漸由「如何引人發笑」轉向思考「人們為何會笑」的迷思中，因為他發現「笑」並不簡單，「究竟啲人笑係笑啲咩呢？例如《笑笑小電影》咁，好多其實都係一啲好慘嘅事，點解會引到人笑呢？我成日諗，其實喜劇亦即係悲劇，究竟一件慘嘅事，去到幾時就可以笑呢？」
足球就是許賢 許賢就是足球
許賢是「斜槓青年」，粗略一算，他現在至少有四個身份，YouTuber、演員、編劇，以及今年出道的歌手。雖然這些身份都是許賢喜歡做的事情，但他的最愛始終是足球，就連他在2014年上載的第一段YouTube影片《我們都是大埔Lulu》，也圍繞着他最愛的足球。
中二開始接觸足球的許賢，從此深深愛上這項運動，幾乎每一日的生活都離不開足球。
「我以前逢星期五就好期待放學，因為可以無憂無慮咁踢波，一踢就踢到天黑；平時打機都係最鍾意玩Winning同FIFA；返學就最期待lunch送嚟嘅報紙，睇吓上面會有咩體育新聞。」他直言自己一有空餘時間便會鑽研足球，大至足球戰術層面，小至球員心理狀態，他都會非常沉迷研究，好想參與足球上的每一個細節。
但他畢業後沒有走上與足球相關的道路，許賢靦腆笑道：「其實自己一直都好想，但可能因為自己踢波太渣，令我對任何與足球相關嘅遐想都無晒。譬如我連學校足球隊都入唔到、去屯門區足球隊選拔亦入唔到，就算我普通落街踢波，都覺得自己好唔叻，扭波、傳波、射波、搶波、守龍都唔叻，但係就唔知點解對足球好有興趣。」
他惟有把對足球的熱情投射到創作上。去年十月，他在個人的YouTube頻道「Hui Yin許賢」上載了一條名為「《練波》公園伯伯練波計劃｜EP1｜DAY1-16｜」的影片，紀錄了他連續16天到樓下練波的片段，後來仍繼續上載更新，最新已紀錄到第65天。
堅持連續65日落街練波的原因，源於許賢一次的忽發其想，「想試吓毫無痛苦地成為一件事嘅大師」。一般人都覺得要好辛苦才可以成為大師，但他卻想嘗試能否逆其道而行，成為「不辛苦的大師」。
突然想不辛苦，應該是曾經太辛苦。許賢曾經在ViuTV的劇集《無限斜棟有限公司》擔任編劇，他形容當時工作非常辛苦、人工低、經常捱罵，令他感到非常痛苦，甚至想過放棄。期間，有前輩提醒並鼓勵他，只要他把編劇的身份做得好，日後面對任何拍攝的工作都會迎刃而解，甚至成為「大師」。
「一言驚醒夢中『賢』！」許賢想成為更好的人，但又很怕自己會放棄，若放棄了就變得一無所有。思前想後，他決定用足球去學習堅持，因為踢波是他喜愛的事情，那就不會感到痛苦，如果能夠堅持下去，或可成為自己心目中的「大師」。
過程難免遇高低 要保持嘗試的心
「過程難免會遇到高高低低，但一定要保持願意嘗試的心」，這是許賢對足球和創作的初衷。2015年，CapTV創辦人「Cap盾」（譚小龍）邀請許賢及蘇致豪加盟，成為他們二人畢業後第一份工作，許賢直言當時覺得自己非常幸運，因為一畢業就得到賞識。
他形容當時在CapTV工作非常自由，任何類型的創作都可以嘗試，「你諗到乜都可以做」，唯一的限制就是要「一日一片」，每日要有一條影片面世，對於出茅廬的許賢來說非常辛苦，「我甚至問過話『好辛苦喎，唔做一日一片得唔得啊？』，Cap盾就話『好呀，咁一日兩片囉』，我哋當然無再出過聲啦，唯有繼續做囉，佢請我哋㗎嘛。」
許賢說當時不理解為何要設下「一日一片」的限制，直至他後來與蘇致豪成立第二個YouTube頻道「金剛Crew」後，才開始明白，「如果唔係一日一片，而係一星期一片，可能個頻道根本唔會發展得咁好同咁快。其實適當嘅限制，對創作人嚟講都係好事。」
許賢在CapTV初期的作品不少都引起網民共鳴，逐漸受追捧，當中最令人留下深刻印象的，是當配音片，「記得有一次Cap盾畀咗個任務我，要整一條叫啲觀眾嚟投稿嘅片，我就喺到諗要點做呢？於是攞起個手機錄音，整咗CapTV第一條配音片，之後就開始不斷整配音片，而CapTV最令人深刻嘅都係配音片，起碼我覺得自己開拓咗個令人favourite嘅種類出嚟，我覺得自己幾犀利㗎。」
叫許賢最難忘的配音片就是《魚蛋粉》，他說那是他花了一個星期來做的心機之作，基本上整條影片的聲效都由他自己配，「甚至連㩒手機嗰啲聲，都係我返屋企自己錄㗎！」。
大學時期讀會計及金融系，畢業後卻加入大相徑庭的行業，許賢解釋：「因為覺得件事好開心、好有趣，就想成為一份子，就好似啲人好鍾意波鞋，鍾意到自己走去賣波鞋一樣，而我純粹就係自己好鍾意睇片，就希望可以拍片搵食；同埋我個人一向都好鍾意分享自己嘅嘢畀人知，所以我覺得呢樣嘢好適合我。」
影片的題材來自生活，許賢喜愛將生活化的題材以黑色幽默的方式，呈現於觀眾眼前。「有前輩同我講過『黑色幽默係有死亡嘅氣味喺入面』，係有盡頭嘅，而唔係好持續嘅。」許賢認為，雖然未必任何人都領會他們想表達的意思，但他不介意，而這亦是他和蘇致豪最擅長的「storytelling」手法。
最令香港人津津樂道的，不得不提今年爆紅的歌曲《係咁先啦》，一首如此輕快、讓人琅琅上口的歌曲，表面講述離開派對的掙扎，但這種「留下」與「離開」之間的抉擇，卻是訴說著香港人移民潮下一幕幕的道別，因此MV亦出現大量北大嶼山公路與機場的畫面。
「其實首歌拿捏咗好耐，因為係講緊一樣好傷感嘅嘢，我屋企都有人移民。以前喺CapTV同金剛Crew都做過好多類似嘅嘢，經常都諗到用歌曲，通常一啲好沉重嘅主題都會係咁做，希望可以緩衝吓。」
他表示社會上有很多沉重的議題他都想拍出來，但擔心觀眾吃不消，所以通常在影片末段加上一首創作歌曲，感覺上會讓觀眾看得比較舒服，「你想輕鬆咪淨係聽歌囉，你想知道係咩一回事就睇晒成條片囉。」
許賢以前在CapTV的創作，很多關於時事的影片，因為當時覺得香港人不愛看新聞，所以就連很冷門的新聞，許賢都會拿來嘗試創作，然後在下方的留言區貼上相關新聞連結，讓觀眾明白片段在說甚麼。但近幾年，許賢覺得香港的情況180度轉變，「我覺得香港人睇太多新聞，搞到自己壓力同情緒都越嚟越差。」許賢這時才發現他一直以來做的事，可以為大家在繃緊的情緒中帶來一點點紓緩。
觀看原文： 按此連結