海怡上屆投票率港島最高 今屆截至19:30數據急跌27個百分點
立法會選舉今日舉行，港澳辦主任夏寶龍早前開腔，將投票率與市民對一國兩制的信心掛勾，政府連日「奇招」盡出催谷投票率。截至下午6時半，全港有1,117,549名選民投票，投票率為24.99%，今屆的投票時間縮短一小時，改由早上8時半開始，與上屆2016年選舉的同時段31.16%投票率相比，下跌逾一成。眾新聞抽查部分較有指標性的票站，點算與上屆同一時段內投票率下跌的情況，其中，在上屆屬港島區最高投票率的海怡西票站，同時段的投票率急跌27個百分點。
政府現時只公布全港及十個分區的投票率，未有個別票站數據。今屆地區直選的議席由30席減至20席，全港選區由5個大分區改劃至10個大分區。位於海怡社區中心的海怡西票站，上屆位列全港首4位，亦是港島區最高投票率的票站。海怡西上屆非建制得票比建制陣營多出11%，但同時為新民黨葉劉淑儀的票倉。今屆海怡西由港島區改劃至港島西，截至下午7時半，該票站投票率為24%，根據選舉事務處該票站登記選民人數9,891， 即當中有2,769人已投票。上屆立法會選舉截至同一時段投票率是55.6%，即上屆該票站8,569名登記選民中截至該時段有4764人投票，以同時段比較，今年驟跌27.6個百分點。
眾新聞記者在現場觀察，暫時所見該票站人流不多，大部份選民都表示只花數分鐘便完成投票。60多歲任職文員的莫女士指，今年會投唯一熟悉的候選人，指同區另外兩個候選人她都「完全唔識」。她指，過往幾屆選舉，雖然候選人數較多，但她大多數都認識，今年是她最不熟悉候選人的一屆，「今次都要投下，盡公民責任，雖然冇咩選擇。」莫女士家中五人都合資格投票，過往間中都會投票，但今年只有她一人來投票，她透露家人有此決定的原因：「佢哋話冇得揀，三個都咁上下。」
對於今年選舉制度改變，她說：「有啲亂，好似多咗好多席，但有啲唔係我哋可以揀，有啲好似assign咁，返咗轉頭咁。97年前都係冇咁多嘢可以揀，之前我哋都冇say。」但她認為，市民對此也沒有辦法，「你已經改變不到，市民有咩辦法呢？」
眾新聞同時亦觀察到，前往投票的市民中亦少見有年輕臉孔。一對剛滿18歲的兄弟前來投票，表示是盡公民責任而來，主要是視乎候選人民生方面的政綱。他們指同學之間很少討論這次選舉，「可能較敏感」，亦很少討論政治社會議題，「返學校純粹學習，討論的自然是讀書，同埋大學生lecture的pace好快，平時上堂會認真聽書，好少討論。」
至於九龍的情況，黃大仙龍星選區設有兩個票站，其中一個位於保良局張麥珍耆樂中心，該票站於上屆2016年立法會選舉中，曾為全九龍東最高投票率的票站，當中近七成（68.59%）選民支持非建制派候選人。
今屆龍星由九龍東被改劃至九龍中，截至今日下午5時半，保良局張麥珍耆樂中心票站的投票率只有約24%；該票站有4,820名登記選民，即只有1,169人投票，現場亦未見有排隊投票的人龍。在上屆立法會選舉中，票站同一時段的投票率已超過三成半，即同一票站的投票率下跌一成。
任職工程界的李先生下午到該票站投票，他認為今年選舉氣氛比以往冷清，「唔知係咪啲資源唔夠，嗌嗰啲都少咗」，不過認為自己仍需盡公民責任投票，「見到寄咗本嘢（小冊子）嚟，得閒咪又落嚟投下」。
他形容過程流暢，「都係一、兩分鐘左右」。他指，自己在過往選舉中都有投票，今次亦票投自己最熟悉的候選人，「做咗咁多年，都見到佢有啲政績，例如整咗啲公共設施，見到唔公平嘅嘢時都會出聲」。
另一名同為該區的選民、從事電子業的何先生，他指自己過往是活躍投票的選民，但指每屆都會視乎候選人的表現揀心水，非視乎政黨，「香港唔需要再搞政治，呢個地方花咗太多精力去搞政治，其實民生、經濟呢啲都要重新起步㗎啦」。
被問到完善選舉制度後，會否覺得候選人人數比較少？他表示不認同，「要揀嘅都已經喺度，對我來講個路線已經足夠，唔喺度嗰啲其實我都唔會投㗎啦」。不過，對於特首林鄭月娥曾指，投票率低等如政府公信力高，何表示不認同，「呢個（投票率）係代表市民仲有冇興趣去表態或者參與政治，唔係代表政府做得好或者唔好」。
不過，亦有以往活躍投票的選民斷言今次不會投票。有選民向眾新聞表示，自己上兩次立法會及區議會選舉均票投民主派，但選舉制度修改後就決定不投票，「今次都無民主派啦，都唔關我哋事。（獨立候選人呢？）唔好講獨立啦！邊度有獨立嘅啫，算啦！」。
對於或有市民會投白票，該市民指理解他們的理念，但自己決定不會投票，「我覺得（選舉）唔關我事，又無我想投嘅人，所以唔投」。他亦批評林鄭的投票率論，「我唔係好明佢個理論係邊㗎其實，但係佢自己覺得係咁就係咁囉」。
至於新界方面，2016年立法會選舉中，朱凱廸成為「票王」，一舉奪得84,121票當選新界西立法會議員，八鄉南票站是他的主要票倉。八鄉南今屆改劃至新界西北，今日票站人流稀少，記者觀察的3小時中亦未見有排隊的人龍，投票的大多為中年人士及長者。
截至下午5時半，八鄉南票站的投票人數為2,353；相比上屆立法會選舉同時段的投票人數3,280，下跌了927人，投票率由29.76%跌至20.16%，跌幅近一成。
居住於錦上路附近，特意轉兩程交通工具到場投票的高先生表示，今日的投票非常順利，由於毋須排隊，整個過程大概只需2分鐘。他表示，出來投票是盡公民責任，又指「今日連搭車都唔使錢喎，無理由唔投啦。」他期望當選的議員能夠真正服務社區，而不是「講一套做一套」。
另一名到場投票的的葉先生則稱，「無論邊個當選都好，一切跟隨政府走就最好！」他稱，經過2019年的「社會暴亂」，香港應該要重拾正軌，所有事情由國家定奪。他亦同意特首林鄭月娥今早所說，前年區選並不是民主選舉，強調今日投票非常順暢，「連隊都唔使排，咁先係代表到民意。」
觀看原文： 按此連結