【假扮女同志強姦案】只有 Yes、好、可以　先為之真係同意

【文：Vera Lui】

關於呢單嘢由被告嘅答辯到網民嘅留言，都真係呈現香港嘅性教育之路仲有排行！我先唔討論佢扮 TB 呃受害人呢一部分，呢度之後再寫，今日我想集中講佢係性行為上對共識嘅三大謬誤！

🙅🏻 謬誤一：眼神等於同意

被告稱，與 X 玩畢性虐後，雙方都沒有離開的意念，「返翻上張床嘅時候，佢望住我，我覺得佢嘅眼神係想有更進一步，所以我就有呢個念頭（與 X 性交）」，並指自己用陽具磨擦 X 時，「我以為佢話舒服就係同意（性交）」

無論對方對眼有幾咁識講嘢都好，佢無明確地講出想有進一步嘅性行為，就唔可以因為佢嘅眼神如何表達去以為佢同意有下一步嘅行動。你有念頭係你嘅事，你想進一步嘅話就應該先問對方有無興趣同你性交！🤬

🙅🏻 謬誤二：舒服等於同意

兩人隨後返回床上，被告撐卧在 X 的身旁繼續撫摸她，並脫下長褲，只剩「孖煙囪」。他在床上撐卧着摸了 X 一會後，便將陽具從褲管掏出，將之磨擦 X 的陰部數分鐘，問 X：「舒唔舒服？」X 回答「舒服」後，被告形容「就進入咗佢嘅身體」。

同樣，對方話舒服都唔代表佢同意比陰莖插入！無論對方嘅下體因為你嘅刺激攻勢而感到有多舒服，陰道有多濕潤都唔代表佢就想有陰莖進入佢嘅陰道！！如果你想陰莖進入，就應該先問下佢想唔想你將陰莖放進佢嘅陰道！！🤬

🙅🏻 謬誤三：無反應等於唔駛戴套

被告表示，當日沒準備安全套，「一嚟我未必次次用，二嚟如果有需要，會去酒店櫃檯攞」。他又稱當日無打算問 X 須否用，「因為當時用陽具磨擦佢，佢都冇特別大反應，所以我認為就算我唔用，佢都唔會特別大反對」。

嗱！首先對方跟本無表示同意比你將陰莖放入陰道，你仲要 FF 到你用陰莖磨擦佢外陰，而佢冇乜特別反應就等於佢同意你唔戴套！真係再次證明香港嘅性教育有多缺乏，而你嘅想像力係多麼嘅豐富，唔做編劇真係浪費咗你！再次重申，就算佢同意同你陰道性交都唔代表佢同意係你唔戴套嘅情況之下陰道性交！！🤬

💁🏻 咁乜嘢先為之同意呢？

就係當對方真正開口講「Yes」「好」「可以」先為之真係同意！！Yes means Yes!

無反應不等於同意！
唔出聲不等於同意！
無講唔好不等於同意！
「我唔肯定」不等於同意！
「我諗下先」不等於同意！
就算肯同你開房都不等於同意所有在房內會發生嘅行為！！

最後就係條友自稱喜歡玩性虐，但 BDSM 性虐關係嘅最大前提係共識呀！唔該唔好以為打幾下屁股，滴下蠟就代表識得玩性虐，更加唔好影衰成個 BDSM 社群呀！

有品嘅性虐關係實踐者事前係會同對手傾好想點玩，玩乜嘢，玩幾耐，乜嘢玩得，乜嘢唔玩得，大家嘅界線都傾好先會行動。

而呢條友以為人地話舒服即係同意陰莖插入，簡直就係連共識係乜嘢都唔知！佢只係一個以性虐之名行兇嘅仆街！！！🤬🤬🤬

（標題為編輯所擬）