「同邊個邊個熟」

燈光昏暗，也難掩面前兩位「朋友」的神采。「朋友」二字在開閂引號內，因為我想凸顯「朋友」二字的重要性。

他們兩位是誰，不是重點，就只說他們是兩位非常值得敬重的中佬吧。被兩位邀請食飯並不是一件尋常事，因為我跟他們算不上熟絡。「唔好意思，」他們其中一位說，「咁唐突約你。」

唐突不只因為我們並不熟絡，還是因為他們約我的原因，是關於一件對他們來說十分重要的事 — 請人。「其實呢，」另外一位說，「我哋冇乜朋友，所以要請呢個 level 嘅人，都唔知搵邊個幫手。」(註：佢哋唔係要請我。)

「吓？你哋冇朋友？」我有點驚訝，因為我認識他們身邊一些人，所有人都說兩位是有情有義之輩，竟然冇朋友？

「有嘅，全部都係小學中學朋友囉，出咗嚟做嘢之後，好少識到朋友。」

可能說到這裏，有些人也不覺得這個短短的故事有什麼重點。其實我想說，光是他們這句「我哋冇乜朋友」，已經是一股清泉。

我遇過太多，太多太多，太多太多太多，經常聲稱自己同邊個同邊個熟嘅人。

曾經跟某人有過這樣的對話。

「哦，冇，嗰排成日同 Riley 傾嘢，佢同我講佢都鍾意食 XX。」邊個 Riley？「Riley 喎，你唔識邊個 Riley 咩？」其實我淨係知道邊個 Pat Riley，即係嗰陣 NBA 熱火嗰個教練。「哦，冇乜特別，林若寧喳嘛。」

後來先 find out 原來佢只係見過林若寧一次。

又曾經跟另一位某人有過這樣的對話。

「係呀，嗰日先同 Richard 食飯，佢都有話佢嚟緊會同 XXX 合作，不過佢都唔係太 keen，你知 Richard 啦，成日都有大刁傾。」邊個 Richard？「Oh，sorry，我意思係 Richard Li。」

真的跟 Richard 打工的人跟我說，雖然 Richard 真係有機會同 XXX 合作，但其實 Richard 唔識嗰位某人，因為佢嗰晚請幾圍食飯，好多人佢自己都未見過。

再曾經跟另另一位某人有過這樣的對話。

「講開又講，我同嘉欣都幾有緣份，喺條街都撞過幾次。有次有朋友約埋一齊食飯，佢個人都幾 nice，都係有機會發展嗰類型。」嘩，邊個嘉欣？（呢下真心羨慕，好想知係林嘉欣定李嘉欣。）

最後佢講咗一個我未聽過嘅姓氏，所以我就沒有繼續追問下去了。

身處不同的社交場合，很多人總會想用九秒九的時間證明自己是非一般人，於是就搬出一些非一般的名字，希望在你心裏留下一個非一般的印象。可能因為自己的職業之故，我麻麻哋鍾意曬關係，sort of against our professional etiquette。

是的，出來做事，人脈很重要，但若然你珍惜這個人脈，你是不會隨便拿來「曬」的。

人與人之間的關係進化 — 交手、交往、交情、交心 — 能否由一個層次攀升到另一層次，依靠的是你的人品、知識、個性。

明明只是跟人交過手，就扮哂同人交緊心，醜唔醜？

真正有很多朋友的人，其實好唔鍾意宣揚自己有好多朋友。

（標題為編輯所擬）