【潮廳】來自潮州的講究美味
疫情底下少去中式菜館，這次來到中環的潮廳當然要食返夠皮。
講起潮州菜很多人都首先想起地踎打冷，但作為粵菜其中一個大派系，其實食材講究、煮法也可以十分精緻高雅，潮廳就是如此的高級菜館。
先來滷水拼盤有鵝片、鵝腸仲有豆腐，鵝片雖厚切但肉質鮮嫩不鞋口，鵝腸也相當爽脆且無肥膏，一流！至於豆腐則只有淡淡的滷水鹹香味道不會過重。
再來的潮式滷鵝肝是必吃之選。這鵝肝來自獅頭鵝，大而無筋食落入口即融更飄出清新酒香，妙哉！同時不似西式鵝肝一樣膩，可以食多幾舊，可惜菜館方供應量不多，想食大家記得預訂。
吃完前菜，來碗鎮店的胡椒鹹菜豬肚湯。胡椒辣而順喉果然好飲，鹹菜鹹度剛好，配有𡁻口的豬肚，已經心滿意足。
再來的是 off menu 的滷水鮑魚豬腸煲，這煲滷水更濃味，蛋、肉厚豬腸卻滷得剛好，鮑魚已經不理是幾多頭了，因為滷水汁加條菜好送飯！
再來香煎九肚魚酪，類似蠔餅只是換上九肚魚，九肚魚肥美無骨，用料吃得出上盛，可惜今晚煎得稍稍不夠香脆。
糖醋黃金伊麵煎至金黃酥脆，夾上韭黃粒配陳醋和砂糖，酸酸甜甜再帶點鹹，口感味道複雜有層次。
最後來的是糕燒甜三寶。糕燒是潮式甜品的一種常見烹調方法，做法是先將食材微微煮熟，然後再將之放進糖漿中文火燒煮。今次糕燒的是南瓜、蕃薯與芋頭，糖漿甜以來很清新亦吊出各食材本身的味道，很不錯。
性價比：3.8/5
好食：3.9/5
衛生：3.8/5
潮廳
地址：中環皇后大道中 9 號嘉軒廣場 2 樓 The Galleria
營業時間：周一至日 12:00–15:00 18:00–22:00
電話：25268798
原刊於作者 Instagram