【無劇透】試當真一周年的立志宣言
試當真一周年，是給認真毛的 Inside Jokes，也是一個立志宣言。
睇完，只想講這是一場很有勇氣的騷。
一個人家口中的「YouTube Channel 仔」，夠膽搞騷，去九展 Star Hall。賣飛方法香港少見，但賣哂、坐滿，今場好好反應。
很多人把他們和毛記類比，當成市場奇蹟。但兩者的成功是無法複製的，也是截然不同的。
買得飛，不一定是 Die Hard Fans，很多是湊熱鬧的。而主辦方的目標很明確，這場騷是給忠粉的大禮物，笑位是滿滿 Inside Jokes。
很多不用說出口的話，他們選擇了「有啲嘢明就明啦」。對於 Haters，對於批評，他們擺上枱面，他們知道的，游學修自己最清楚。
比起討好大眾，他們大概希望對住「自己友」、「認真毛」，不如誠實一點。
咁樣勇唔勇，都好勇。
YouTube 是跑演算法的，懂 SEO 就會明，流行熱門需要跟風、規律，用以培養觀眾習慣。
但試當真不玩 SEO 策略，甚至不斷改內容方向。咁樣，對行家來說好勇，因為風險大到癲。
場騷好唔好睇，坦白講，Fans 一定滿意。如果你唔係 Fans，咁……你仲買飛，就唯有睇多幾條片做多啲功課。
但信我，場騷你喜歡與否，睇完都會想開 YouTube，睇下咩叫「試當真」。
試當真就是想玩，想玩大，愈玩愈大。
這個年代，有人成功不知幾好。戥你開心，下次再玩吖！
【商業】試當真的營銷二三事
講明先，無收任何人錢的，純分享。
試當真完哂兩場騷，不怕劇透，就簡單講講營銷重點。
兩場都有的，是 Dear Jane 唱《外賣修澧賢》。
這是硬性植入，本身已經實爆。但試當真的處理非常加分。
Dear Jane 正經唱一首歌，之後游學修揸咪道：「我哋唱返首《銀河修理員》啦！」。
之後去到中段，廣告商戶戶送的 Logo 才現身，後面屏幕變成戶戶送主題色，歌詞當然也變了改版的《外賣修澧賢》。
聽來簡單，就是驚喜而已。但其實搞過騷就明白，門票收入看來豐厚，其實利潤並不多。
一場表演，要賺錢必須有贊助商，而且需要很多個。Title Sponsor、食物化妝道具衣服燈光，你想到的都可以有。
有的會俾錢，有的會俾資源，但無論如何，所有贊助商都會有要求。
最重要當然是出現的頻率，和品牌在活動留下的印象，如畀得多錢，甚至可以要求表演者宣傳該品牌的特定活動。
而戶戶送搵埋 Dear Jane 唱 Live 咁大件事，竟然唔主動事先印大 Banner。
兩個可能性：
一：在試當真和戶戶送磋商的過程中，彼此都同意用節目效果為先。
二：做客的未必想畀埋場內 Banner 費用。
但無論如何，驚喜不能預先張揚，夠低調反而能留下爆炸性印象。結果，在場的人絕對感受到驚喜。
而試當真的表演編排，就是按情況做了驚喜處理。效果好好，計埋觀眾是三贏，好抵讚。
另外，但凡大型表演，最後必然有感謝贊助商的環節，讀哂啲品牌名都係基本，觀眾要拍下手掌都係例牌。
但游學修在尾段講了一段好反叛的說話。
「唔逐個讀喇，一讀我又會嬲。唔通我讀哂啲名，大家就真係全部記得咩！大家自己攞住張嘢，出去爆買啦！」
之後全場拍手掌。
試當真夠膽提出，贊助商願意接受。證明，試當真好有牙力，贊助商亦算很開明。
搞過騷就明，Rundown 和佈置全部都有血有汗。表演是藝術，商業也是藝術。
而一場 Good Show，從來不是必然。
（標題為編輯所擬）