【強制安心出行】不識字長者袋紙仔入街市 街坊高叫檔主送雞出門口 商販：影響好大呀！
街市強用安心出行一星期，街坊、職員和檔主依然未慣，街市處處怨聲載道。記者 5 日下午走訪北河街市政大樓，街市內人流明顯較以往疏落。街坊擠在街市門口「掃code」，有人填紙仔，「要你咁做有乜辦法呀，梗係麻煩啦！」亦有人無視強制措施，趁職員不為意時闖入街市，「啲人真係阿崩叫狗㗎喎！」職員嘆。不單職員和街坊嫌煩，連檔主都叫慘，直言少了3 成生意，「開咗十幾年，未試過咁慘！」
繼食環署、康文署和民政事務總署等場所要強制使用安心出行，政府亦正研究將強制措施擴展至 B 類食肆。據警方數字，單是過去一周（1 日至 4 日），就已巡查餐飲業務處所97 次，而其他表列處所，就報告及巡查 226 次，檢控 25 次。
警一周巡查 226 次 檢控 25 次
根據警方回覆數字，5 月至 10 月在餐飲業務處所的執法數字，報告及巡查共 1,993 次，檢控達 141 次；至於其他表列處所，5 月至 10 月則報告及巡查共 7,803次，檢控達 260 次。
而單是 11 月 1 日至 11 月 4 日，警方就在餐飲業務處所，報告及巡查97次，不過未有檢控，只發出 12 次定額罰款通知書；至於其他表列處所，就報告及巡查 226 次，檢控 25 次，發出 53 次定額罰款通知書。
婆婆隨身帶紙仔 職員代填資料
北河街市政大樓每個街市入口，都有兩位食環署職員把守。雖然強制措施實施了一個星期，但仍有街坊不懂得使用安心出行。一位婆婆從褲袋抽出一疊散紙和卡片，裡面夾了一張紙仔。親人替他在紙仔寫上個人資料，她把紙仔遞給門口職員，代為填寫個人資料。她坦言未習慣強制措施，不懂用安心出行，「唔識用，我都唔識字嘅！」
王婆婆家住元朗，但習慣每三個星期都出深水埗走走，順道入街市買餸。她說自己為了買魚才入街市，她沒有安裝安心出行，要填紙仔代替，「有乜慣唔慣，要你咁做有乜辦法呀，梗係麻煩啦！」
職員：街坊愈叫愈走
除了掃安心出行和填紙仔，也有人趁職員忙於照顧其他街坊，沒有交資料就行入街市。記者在街市門口觀察，每分鐘至少有 3 人沒填資料就入街市。
職員做到手忙腳亂，替一個又一個街坊填紙仔。職員亦向記者嘆道，叫不停不用安心出行，又不填紙的街坊，「啲人真係阿崩叫狗㗎喎！」
檔主：生意跌 3 分 1
下午時分，街市人流明顯較平時少，部份檔口十分鐘都沒有生意。就近街市門口的凍肉舖，檔主趙女士指，自從實施強制安心出行措施，生意一落千丈，街坊都轉到街邊檔口買餸。「跌 3 分之 1完全係有，一日少 2、3 千蚊。頭一日仲好啲，啲人唔知，之後一日比一日差。」她直言，開檔十數年，從未試過像這一星期那麼淒慘。
趙女士指，很多客人都是老人家，要不是不懂用安心出行，就是不懂寫字。她說，曾經有街坊在街市門口叫她，望她送雞出門口，「啲婆婆喺出面嗌：『靚女！』我話做乜嘢，佢話：『幫我攞隻雞』，我攞出去送畀佢，佢話入唔到嚟喎。」她亦見過街坊沒有裝安心出行，而年紀太大，沒有帶身份證，又記不住身份證號碼，於是不能入街市。
豬肉檔賣少兩隻豬 「慘就係啲檔主啦！」
行到另一個入口，就到大利豬肉檔。「梗係有影響！影響好大呀！」檔主劈頭第一句就呻慘，他說平時劏八隻豬全部賣光，如今劏六隻豬都賣不完。
「冇以前咁墟冚，車水馬龍咁出出入入，𠵱家直頭係冇。」他直指安心出行措施是影響生意的主因，街坊寧願到街邊檔買餸，直言減價也無助銷情，「減價都冇用㗎，人哋都唔入嚟買。」
面對生意逆境，檔主坦言束手無策，又指生意大減，連帶令業主縮水縮人，最後家庭生計也遭殃。「慘就係啲檔主啦！你傾傾啦同政府，反映下啲意見啦，咁樣搞法你搞死啲檔主咋嘛，唔係搞死咩嘢你明唔明呀！」
二樓人流稀疏 菜檔銷情慘烈
行上二樓菜檔雜貨，人流更為疏落，每行約有 6、7 位客人。菜檔檔主馬女士指生意「一落千丈，跌落深淵」，本身已受疫情打擊，「又無啦啦整壇咁嘅嘢」，令她由朝到晚拍烏蠅。記者跟馬女士談了大約 15 分鐘，她一共做了兩宗生意，收了 13 元。
她愈說愈激動，提到超級市場和街舖愈來愈多，但卻不用掃安心出行，直斥政府厚此薄彼。「大家安全起見都好嘅，但你唔能夠一個政府轄下街市做，應該超級市場，任何領展都要出行！淨係街市，尤其是二樓添，死X梗啦！」她坦言菜價已經減無可減，自己亦無欲無求，只想賺一個飯盒錢。
食環署：明白市民需時適應
食環署回覆《立場》查詢時指，明白市民需時適應新措施，措施實施初期會較着重公眾教育、勸喻和宣傳，並提供技術協助；亦會因應實際情況彈性處理。在適應期內，如個別人士因真正困難而暫時未能使用程式，署方會以務實體恤態度處理，例如容許他們填寫「訪客資料記錄表」作為替代措施，盡量避免妨礙市民前往街市購物。
康文署就指，自新安排實施後，署方未有發現任何使用虛假程式代替安心出行進入場所的個案。