【12.9 強制安心出行】美容院預料流失 1 成半客人 指已有兩重登記 批多此一舉
政府早前宣佈周四（9日）開始，市民進入美容院、所有類別食肆及主題公園等場所，必須先使用「安心出行」應用程式。有復業約 10 個月的美容業界東主估計，至少流失 1 成半客人，强調政策在實行會員制的美容業並無實際需要，批評政府「搞著各行各業先安心」，並指若程式進一步加入追蹤功能，將再流失逾 3 成客，「政府為做而做，希望全部人打晒針、全部人都用安心出行，好似大陸咁用健康碼，你去到邊就監控到你去邊，唔係控制疫情，係控制人咋嘛！」香港美容業總會創會主席葉世雄則指，強推加上移民潮對業界造成雙重打擊，呼籲政府放寬長者可填紙代替。
推開太子一間小型美容院的大門時，馬上聽到店主陳小姐響亮的聲綫：「麻煩除鞋換拖鞋，洗個手先啊！」還未脫鞋，轉眼間一雙全新的布拖鞋已在眼前。一入内，鞋櫃上整齊地排列了多瓶消毒用品，有消毒酒精、噴霧、濕紙巾，伴隨一陣陣空氣清新機的隆隆聲。
「得啲 Auntie 先會掃 Code」
陳小姐的美容院主要提供單次美容療程，客源主要為 30 歲以下的學生。自政府要求美容院在 2 月復業時，客人須填資料或使用「安心出行」，她指大約 50 至 60 個客人才有一個嘟「安心出行」，「我啲客全部都細個，得啲 Auntie 先會掃 Code。」不過，政府早前宣佈在 12 月 9 日起，市民在進出所有場所包括美容院、食肆等，必須使用「安心出行」應用程式，惟至今依然未提及長者及小童等有需要人士可否填紙取代。
批政府「搞著各行各業先安心」
談及强制「安心出行」，陳小姐連續幾次表示「無聊、無聊、真係好無聊。」她認爲政府多次一舉，無視美容院預約制、會員制的實況，而她的店鋪更最少有 3 重的登記功夫，「我哋本身電腦會 Save 客人資料，又會手寫一次，來到又再嘟（「安心出行」），其實就做三重嘢…… 根本就冇咁嘅需要，係嘥時間」她慶幸客人並非長者，否則更勞民傷神，「好彩我呢度冇老人家，如果要去醫院複診啲阿婆冇電話，甚至半身不遂，其實真係好多餘！」
不過，美容院在法例規定下，只可以無奈地跟隨政府政策。陳小姐批評政府「搞著各行各業」，「如果我哋唔做，又話會告我哋，又停業，個客又要罰 5000 蚊。依家啲客自己有兩聲咳都唔嚟，佢自己都驚傳染人，但係政府係都要搞著各行各業咁先安心！」
預料流失 1 成半客人 曾表明「企硬」
陳小姐估計，強制使用安心出行的政策實施後，起碼會流失 1 成半的客人，「武漢肺炎一玩就玩到而家，仲搞個安心出行，梗係有影響啦。」不少客人曾向她表明若，政府强推，將「企硬」不來美容院，「我都知道有啲客係話，要嘟安心出行的餐廳係唔會食，但係 9 號之後我唔知道，有啲客可能好唔鍾意嘟咪唔來做 facial！」亦有客人搜羅平價電話作「安心機」之用，「今日先有客 Send 畀我，你要唔要買返部（「安心機」）？」
加實名追蹤功能或再減逾 3 成客 批評目的為控制港人
政府早前宣佈正與中國官員磋商重開關口，推出港版健康碼並配合「安心出行」，再度引起對私隱問題的關注。陳小姐估計若「安心出行」加入使命實名追蹤功能，將至少再減三分之一客人，「依家連（美容）機都唔敢買咁貴，你唔知佢之後玩啲乜，如果你政府再搞咁多嘢其實係會令更多人走。」倘若有日政府强推實名、具追蹤功能的健康碼，陳小姐說，「如果你行到好似大陸咁紅燈黃燈綠燈，突然之間話紅燈，邊度都話唔去得只可以留喺屋企，唔好講好多妹豬，我自己都唔接受你監控啦！」
她質疑，政府所謂的防疫政策目的在於控制人，「我成日就覺得政府為做而做，希望全部人打晒針，全部人都用安心出行，好似大陸咁用健康碼，你去到邊就監控到你去邊。政府唔係控制疫情，係控制人咋嘛！」
做足消毒 質疑開刀並不合理
她質疑政府爲何經常向美容業開刀，「基本上咁耐以來都係得兩、三單（確診），就唔係好似嗰啲跳老母群組，都唔知點解我哋乜嘢嘢都要俾人拖埋落水。」她說絕大部分美容院已做足消毒措施，「不嬲都做到好足！講真，我仲驚過你，掂個客之前又會噴（消毒），掂完又會噴…….一日洗手洗到嚡曬。」
以陳小姐的店舖為例，客人在門外須腳踏光觸媒地毯，進門後亦須更換一次性的拖鞋，全身再被噴消毒藥水、量度體溫、洗手、填紙仔或嘟安心出行，才獲准進行療程。美容師在療程期間則會戴手套及防護面罩，每間獨立房亦設有空氣清新機。
不足兩年內 美容院三次停業逾 150天
疫情在 2020 年 2 月開始至今，不足兩年内美容業已停業三次、合共逾 150 天。首次停業是因大量海外港人回港造成多宗輸入個案，美容院等場所在 4 月 10 日起，停業 28 天。復業僅 2 個月，因海員免檢疫造成社區感染，美容院再次在同年 7 月 15 日起停業 44 天。最近一次停業則是「跳舞群組」確診者傳染美容院職員後，再次在 12 月 1 日起停業 79 天，至翌年的年初七。
談及三次停業，陳小姐不願意亦不敢估算損失，「聖誕新年最搵錢嗰排，就喺屋企食緊風.......不斷停停停，停到啲客冇心機做，啲客話停業期間自己買其他嘢自救。」她指生意至今依然未能恢復疫情前的水平，最明顯的是星期天，由以往的 9 個客人，大跌至不夠一般的 3 個，疫情前平日下午的檔期排到密擠擠，現時卻是「有 2 至 3 個鐘吉咗（空缺）。」
政府在疫情期間，曾三次向美容業等受停業影響的商戶派發補貼。在停業日數最多、達 79 天時，為一人美容院的陳小姐只獲 3 萬元，在報稅後更是所餘無幾，更遑論支付兩個月、合共 6 萬多元的租金及分期供美容機器的固定支出，「其實政府俾我哋嗰啲補償，根本連租都未夠交，都唔好講出糧，今年報稅仲要報埋落去，真係食蕉，多餘！」
打壓致移民潮持續 或成生意低谷
被問及疫情結束後，美容院生意會好轉，迎來另一高峰嗎？陳小姐無奈搖頭，慨嘆即使疫情過去，生意低谷依然未見底。
陳小姐的美容院鄰近太子警署，在 2019 年反送中運動期間，經常被警方發射的催淚彈影響，「成日都食 TG（催淚彈），食飽咁滯。每晚 10 點就趕住同客噓噓聲走，送埋佢哋上車或者落地鐵站。你知啦，細細個客係目標嚟㗎嘛！」在該段期間，美容院平均一日只可以接 3 個客人，在周末下午 3 時便要「關門大吉」，以免客人遇到危險。
屋漏偏逢連夜雨，社會運動過後再遇上疫情，不過亦不及移民潮的影響來得大。陳小姐估計顯示已有至少 2 成客人移民，不能想象日後再流失多少客人，「其實依幾年好辛苦好大壓力.......呢個政府又唔配合就更加辛苦。」
療程尚餘一年拒用「安心出行」 客人：寧願屋企敷多啲 Mask
有客人就表明會「企硬」，寧願「嘥錢」亦不想冒上個人資料外泄的風險。
正就讀大學的張小姐，約在一年前在有 4 間分店的中型美容院，購入價值 19,800 元、列明不得退款的「兩年無限次」激光脫毛療程，療程期限尚有約一年。不過，在 9 日强推使用安心出行後，她說暫時不考慮到美容院進行療程，「嘥錢都係一個 Concern，但係安心出行又會好似畀人監視住咁，個 Package 都仲有一年，觀察下係咩情況先，唯有喺屋企敷多啲 Mask.......都總會有啲犧牲，但衡量完之後都覺得接受到。」
「安心出行」推行逾年，張小姐說至今依然未曾下載，「根本唔安全，睇好多都係話喺 Background 攞資料，好冇私隱，唔想好似比佢哋跟蹤咁.......寫紙仔都唔係好煩」她補充，估計安心出行最終也會變爲實名制，因而未有預備一部俗稱鬼機，即沒有電話卡的電話以使用「安心出行」。
坦言「唔避得幾耐」 估計將推行打針才可堂食等政策
她形容現時猶如「去邊都好似都冇得揀」，亦令一直堅持不適用安心出行的她有所猶豫，「我暫時會企硬到，好似就來堅持唔到，好似唔避得幾耐…….. 好似街市咁我咪去 Supermarket 買野食，但係依家係餐廳、美容院，（越來越）冇得再避，佢根本就係想所有人都要跟著嘟」對於較早時，政府放風指有機會要已打針的市民才可堂食或到某些場所，張小姐直言並不覺得奇怪，「依家咩都唔算誇張，佢地絕對有可能咁做。」
業界代表：强制後難以避免影響生意
香港美容業總會創會主席葉世雄指，據他了解現時約有 2 成顧客選擇「填紙仔」，估計在強推「安心出行」後，在一定程度上會影響美容院的生意，「我地真係掌握唔到客仲選擇來不來，所以業界有憂慮都係好合理的，始終不同開飯，佢地真係可以唔做療程。」
移民潮加上強推成雙重打擊
葉世雄指復業約 10 個月，生意一直都有改善，達到疫情前的 8 成，近期的結業數字亦未有很大波動。不過，他引述不少商戶的觀察，指因移民潮最少流失百分之 6 的的客人，「依種現象以前未嘗試過，經濟唔好係暫時，停業又係暫時來唔到，但係總會有來返的一日.......移民的人消費力都唔差，但現在完全離開，係整個香港都流失這個客源。」
在移民潮加上疫情持續令客人消費能力意欲不高下，政府再有新的措施限制客人，更令美容業界擔憂，「其實由頭到尾都講緊我地有曬客人記錄，萬一美容院有爆發，你要通知佢地係完全沒有難度，宜家加辣措施又有我地份，真係好無奈！」
質疑政府邏輯 籲放寬長者可填紙
對於美容院被納入《預防及控制疾病（規定及指示）（業務及處所）規例》（ 599F章） ，葉世雄質疑政府如何選擇該些行業，「又唔係選擇最多爆發的行業？我哋成日都唔明白政府邏輯，同專家的邏輯係點樣的。」據他了解，不少長者亦會到美容院接受按摩療程，質疑政府不提供填紙仔的選項，是漠視長者的需要，「好多成熟客人做 Body massage，點解冇 Options？」
食衞局上月 23 日宣佈收緊各類食肆的防疫規定，由 12 月 9 日起，使用「安心出行」流動應用程式的規定將擴展至所有受法例 599F 章規管的處所，包括 A、B 類食肆、戲院、美容院及主題公園，屆時所有進入這類處所的顧客均須先使用「安心出行」，不可以填寫個人資料代替。局方稱，措施是為提高確診個案的追蹤效率和準確度，應對傳染力更強更快的變異病毒株。