香港迪士尼樂園（資料圖片，來源：政府新聞處）

【文：arthayan_】

自香港迪士尼個城堡開返之後呢個暑假 Instagram 都充斥住唔同嘅朋友喺城堡下打卡。之後聖誕節又應該會迎來下輪迪士尼旺季，咁 arthayan 就喺度諗，到底迪士尼嘅魔力喺邊呢？

提出超現實概念（Hyperreality）嘅學者 Jean Baudrillard 形容迪士尼係超現實嘅佼佼者，絕對係一個「比現實更加現實」嘅一個地方。講起迪士尼，咁就一定要講吓佢嘅城堡。本身城堡呢個概念，係出於中世紀用嚟打仗同防守嘅。喺 9 至 10 世紀嘅歐洲貴族為爭奪土地而盛行去興建城堡劃地。城堡呢樣嘢同戰爭、階級、殺戮呢啲概念不可劃分，但迪士尼入面就成功轉化到呢個符號成為一個夢幻、浪漫嘅標誌。其實真實嘅城堡唔會係靚嘅，因為都係用石去建造，實用功能為主，但係迪士尼入邊嘅城堡小至外場用色，都有特別根據光線、環境調製，務求令到城堡喺日光下係金光閃閃嘅，大至整個城堡嘅線條都係以美觀作主要考量。另外喺「森林河流之旅」入邊，對遊客來講有住豐富嘅感官刺激得嚟又唔會有危險，唔需要等待唔需要運氣遇上動物，更加唔會有蚊蟲打擾到整個體驗。「小小世界」當中所講嘅共融又係欠缺咗種族、膚色之間複雜而又拉扯嘅關係。迪士尼嘅吸引之處就係佢建基於真實嘅場景，省卻當中黑暗、醜陋嘅歷史，呈現出只有美好、浪漫化嘅圖畫，轉化真實存在嘅符號，成為另一個真實嘅存有。

迪士尼另一個特別嘅地方在於佢好重敍事，就算係排隊／餐廳位都會用畫、文字、雕塑加入唔同嘅故事講返個場境當中嘅故事。但所創造嘅文化、歷史、人物但呢啲全部都係冇一個真實存在喺世界嘅源由（origin），只係由一虛構嘅故事產生。但同時間嗰度嘅建築又同樣摻雜咗唔同真實存有嘅文化、建築特色。例如：美國小鎮大街係參照 19 世紀嘅小鎮面貌，但其實當中嘅樣貌同真實嘅場景差好遠，只係呈現一條大家應該要有嘅樣貌。為咗令到大街更加似一條喺玩具入邊嘅街道，Imagineer（Disney 嘅 engineer）將地下嗰一層比真實喺 19 世紀美國出現嘅建築縮細 5%，第二層縮細 20%，第三層再按比例縮細。雖然咁樣嘅造價會貴啲，但就可以令到遊客置身於一條玩具街道當中。另外無論係城堡、「森林河流之旅」都係建基於一個真實存有嘅概念再加以改咗，成為一個夢幻、歷奇嘅地方。

喺迪士尼整個設計呈現咗一種小朋友嘅世界觀，讓人可以進入玩具場景，又將複雜嘅世界平面化，強調呢個世界讓夢想成真，讓整個地方彌漫一種純粹嘅快樂。Baudrillard 認為咁樣迪士尼俾到人一種劃分咗嘅地域概念 — 童真只可以喺迪士尼出現，出返去就要做返一個大人面對一個殘破嘅現實。我就唔完全認同呢種諗法嘅，始終去迪士尼可以只係暫時離開現實嘅一種方法，可以同去旅行冇分別，返到現實之中繼續為夢想進發。不過的而且確我自己入到迪士尼玩嘅時候不斷重重複複聽緊佢哋強調呢個係夢想成真嘅地方，我就喺度問點解夢想係建基於一個超現實嘅空間？喺迪士尼嘅夢想其實又係啲乜嘢呢？建基於一個純粹虛構，冇任何雜質嘅空間？難道現實之中就容不下夢想嗎？聖誕節，除咗可以去迪士尼浪漫一吓，喺真實嘅場景當中係咪有其他嘢可以都值得期盼呢？

 

參考資料：
Jean Baudrillard, Excerpt from “Simulacra and Simulations - I. The Precession of Simulacra” (1983)
Allen, David. “Disneyland: Another Kind of Reality.” European Journal of American Culture 33, no. 1 (2014): 33–47.

作者自我簡介：一個鐘意玩 IG 嘅藝術史系碩士研究生（IG：arthayan_）鐘意喺 IG 分享對藝術、文化嘅睇法，想讓真同善述說美。

原文載於作者 Instagram