《蜘蛛俠：不戰無歸》：「三代同堂」史無前例 見證蜘蛛俠成長
【文：我看電影 － My Opinions On Movies 】
電影系列嘅新作品搵返上一代嘅人物去幫新一代抬轎，其實都唔係咩嘢咁新奇嘅事。唔好講其他類型嘅電影系列、淨係講超級英雄電影，2014 年《變種特攻：未來同盟戰》已經玩過呢一招。當然，玩到好似 Marvel 今次玩得咁大，號稱「三代同堂」，搵返好耐之前演出過嘅蜘蛛俠反派返嚟，又真係史無前例嘅。加上係 MCU 喎，影壇史上票房最勁嘅電影系列喎，嗰個期待嘅程度自然高過當年《變種特攻：未來同盟戰》啦。
廣告仲要賣到猶抱琵琶半遮臉噉樣，一直都淨係攞上兩代嘅經典反派嚟賣廣告，唔肯白紙黑字話俾狂迷聽，究竟第一代蜘蛛俠杜比麥奎爾、第二代蜘蛛俠安德魯加菲，會唔會出現；好奇感行銷手法更加令觀眾期待《蜘蛛俠：不戰無歸》。好啦，咁鬼萬眾期待嘅嘅電影終於上映啦，值唔值得睇呢？
重要事情講夠第三次。絕對唔會透露電影故事裏面重大轉折，只會引述本身喺官方預告片裏面已經畫蛇畫出腸嘅情節。
呢一點可以連繫去小弟第一樣想講嘅嘢：《蜘蛛俠：不戰無歸》嘅故事背景設定，實在係太過白痴；如果個別觀眾接受唔到呢一系列反智嘅決定，甚至可能會影響對於後面故事嘅觀感。
淨係睇上一回《蜘蛛俠：決戰千里》同埋今次《蜘蛛俠：不戰無歸》嘅預告片，都已經知道：神秘客係噉意拍條片，屈蜘蛛俠用鐵甲奇俠嘅科技濫殺無辜，就全世界都信晒佢。冇人去探究點解：「點解神秘客喺倫敦打打吓元素妖魔，突然間會煙消雲散、變晒做投射影像嘅呢？連神秘客自己都係投射影像嘅一部分嚟喎！件事冇咁簡單嘅……」
鐵甲奇俠咁大間公司、咁多員工，又冇一個夥計會問：「 Quentin Beck 呢個名咁熟嘅？咪同以前個同事同一個名？咦，係喎，睇佢條片，個樣都好似我哋舊同事喎，吖，等我打個電話畀佢，聚吓舊先。」
唔講上一齣戲啦，淨係講今次，之前出咗預告片之後，網民已經將下面呢個漏洞已經插到開晒花啦：「唔係話嘛奇異博士，你搞清楚少少，究竟條𡃁仔想叫你幫手做乜嘢先唔得嘅。係要唔知頭唔知路就開始施咒，跟住搞到一鑊泡。咁大個人，又明知蜘蛛俠真係𡃁仔，就好心問清楚蜘蛛俠究竟想點，先至開始施咒啦。」
當然，如果電影世界裏面嘅人用腦嘅話，《蜘蛛俠：不戰無歸》嘅故事就冇得發生啦。所以，上述嘅白痴背景有冇佢嘅必要性，視乎個人觀感啦。
因為奇異博士搞鑊咗，所以上兩代嘅經典反派，好似喺預告片裏面出現嘅八爪魚博士、綠魔、電魔等等。一方面，見返十幾年前飾演反派嘅艾福摩連拿、幾年前嘅占美福斯，返返嚟《蜘蛛俠》嘅電影裏面，係正嘅；雖則 Marvel 擺明車馬販賣往日情懷，但係真係開心嘅。而且今次佢哋再次返返嚟、飾演穿越咗去不同時空嘅同一個角色，令到有機會補足返一啲嘅遺憾：例如話喺預告片裏面都見到㗎啦，占美福斯飾演嘅電魔，今次用返漫畫裏面經典嘅造型出現；其實電影裏面唔單只呢啲表面嘅嘢，更加有一啲深層啲嘅補足，算係回應返咁多年嚟，《蜘蛛俠》狂迷對於不同電影裏面不同嘅演繹，所表達嘅不同回應，當係一個心理補償啦。
但係另一方面，有以前《蜘蛛俠 3 》一次過出新綠魔、沙魔、毒魔，三個反派咁多，搞到唔夠時間描繪塑造呢啲人物嘅前車之鑑，都基本上估到今次《蜘蛛俠：不戰無歸》裏面咁多個反派，會搞成點啦。冇錯係嘅，今次呢啲反派嘅人物性格塑造更加薄弱，對比佢哋喺以前嘅電影裏面有嘅深度或者個人動機，簡直係天同地比、雲泥之別。如果有觀眾睇《蜘蛛俠：不戰無歸》之前未睇過以前嘅《蜘蛛俠》電影（咁當然要問，呢一類嘅觀眾點解仲要睇《蜘蛛俠：不戰無歸》啦），基本上只會當呢一啲再次出場嘅八爪魚博士、綠魔、電魔等等反派係路人甲乙丙丁。
仲有一個反派，上次已經見過㗎啦：JK西蒙斯回歸，再次飾演嘅J鍾納占美森，一個極度憎恨蜘蛛俠嘅記者。如果睇過第一代《蜘蛛俠》系列，一定會對佢好深印象：把口唔收、脾氣火爆、孤寒度縮、市儈到可以話係「荒謬」；有佢出場一定笑到冧櫈。
J 鍾納占美森喺上次電影嘅片尾片段出現，震驚全場觀眾之後，今次喺《蜘蛛俠：不戰無歸》有更多演出嘅機會；不過可惜嘅係，佢上述嘅突出性格完全無影無蹤，淨係淨返一個戾橫折曲、不惜一切抹黑蜘蛛俠、而且毫無笑點嘅閒角。講真，電影搞唔掂嗰班超能力反派，我就預咗嘅；但係搞到 JK 西蒙斯飾演嘅 J 鍾納占美森咁悶，真心冇癮。
從「反派狗尾續貂」呢一個缺陷，亦可以引申出《蜘蛛俠：不戰無歸》一正一反嘅特點。講咗反面先：唔單止反派，其他配角都一樣，冇深度。用之前啲《蜘蛛俠》電影嘅配角第一代或者第二代嘅 Harry Osborne 、Gwen Stacy 、甚至係 Mary Jane ，去對比呢一代嘅肥仔 Ned Leeds 、Michelle Jones ，就會見到：前者各自有自己嘅生活、動機、追求嘅嘢、人物發展，獨立於蜘蛛俠；而後者衰啲噉講，可以話係蜘蛛俠嘅附屬品。如果冇咗蜘蛛俠嘅話，根本定義唔到 Ned Leeds 或者 Michelle Jones 。
但係引申出嘅正面，就係《蜘蛛俠：不戰無歸》真正嘅反派、蜘蛛俠真正要戰勝嘅，係自己嘅幼稚、唔成熟。喺 5 齣 Marvel 電影裏面飾演𡃁仔嘅蜘蛛俠，終於要長大成人啦。小弟唔只一次批評 MCU 版本嘅蜘蛛俠，認為電影公司對呢個人物非常之冇信心，所以先用鐵甲奇俠、再用 Nick Fury、今次又搵奇異博士，去傍住蜘蛛俠，好似揍細路噉樣。但係今次喺故事裏面，的的確確見到蜘蛛俠成長，見到佢建立自己嘅形象、而且 fit 返經典設定，呢一樣嘢係好緊要，喺小弟心裏面畀好重嘅分。
究竟故事情節發生咩嘢事，實在係好難詳細談論，因為好容易一唔覺意，就講咗一啲入場睇戲之前唔應該知道嘅細節，影響咗各位睇戲嘅第一觀感。不過概略噉樣講吓一啲感覺啦：節奏合宜嘅，有啲位要令觀眾感受到電影裏面人物嘅感覺，係有 feel 嘅；不過唔只一兩個位，係欠缺解釋囉，有啲電影世界裏面嘅技術性問題，輕輕帶過就算數，令到故事鬆散囉。
大家應該會察覺到，小弟不斷來回，講少少正面嘢，又攞啲負面嘢嚟插兩句；皆因呢一種搖擺不定正正就係小弟對於《蜘蛛俠：不戰無歸》嘅感覺：係有好多嘢好值得鐘意、而且小弟真係鍾意嘅，但係同時又有太多嘢，影響小弟唔能夠全心全意去享受呢齣電影，冇辦法扮睇唔到。
大家自己衡量一下，小弟所列舉嘅優點缺點，再決定去唔去睇呢齣電影啦。
咪玩啦，你哋又點會因為一條友噏幾句，而決定唔睇呢齣咁萬眾期待嘅《蜘蛛俠：不戰無歸》吖？小弟噏乜都好，你哋都一定會睇㗎啦。
（文本無題，現題為編輯所擬）