2021 年 12 月 20 日，立法會選舉設於灣仔會展的中央點票站。

狄狄仔、好重要

狄志遠成為宇宙唯一反對派。一個人等於上屆廿幾人、上年鄭松泰加陳沛然，亦係「唔搞清一色」，唯一一隻番子。

不過一隻番子，好似食唔到糊。

喂，臨時演員都係演員

十幾個「非建制派」，絕大部分都無晒影，選舉 hea 做都算，連點票都唔去蒲個頭。

呢方面，窄巷基、黃俊瑯有出現，算係有演員自我修養做戲做全套，唔知有無獎；另一邊，葉太太贏咗都唔現，相當唔俾面，應該無飯盒。

話急原來唔急

事後睇返轉頭，選贏嘅人一齊告急，輸嗰批悠然自得，都可算世界罕見。

例如陳恆鑌告急，結果佢有 8 萬票，佢唔告急嘅對手劉卓裕，得 1 萬票。

「民建聯必勝」

民建聯十個地區全部都贏，每個上台都會 call 齊人大叫「民建聯必勝」×10，頭兩次叫仲有小小尷尬，到中後段愈叫愈投入，唔講以為佢哋出盡全力，贏咗場硬仗，假戲真做，只要你唔尷尬，尷尬就係世界，而我好尷尬。

梁君彥終於有票，張華峰無咗隻蟹

你無睇錯，梁君彥由 2004 年第一次「當選」，之後 08、12、16 都係自動當選，到今次 2021，終於第一次有票，佢話覺得唔錯，但自動當選「都有自動當選嘅好」。

有人歡喜就有人愁，另一邊廂人稱「肥老闆」張華峰就連任失敗，比較值得憂慮係，之後應該去邊買蟹，考慮埋王定光亦已退出，少咁個人釣魚，立法會失色不少。

總體嚟講，成晚都好悶，候選人唔蒲頭、唔講嘢，記者無心機、無嘢問，市民唔關心、唔想知。

我宣布，完善立法會選舉，完～

 

原刊於作者 Facebook