《Spider Man：No Way Home》電影海報

 

【文：Nala 】

（少少劇透啦）

即係，當 Peter 今次搞出個大頭佛出嚟，而個起因係因為流言滿天飛時，麻省理工（ MIT ）事前乜都冇問冇講，就直接出信話唔會考慮取錄佢（ & MJ、肥仔），你話係咪睇到嬲先？人哋 Auntie May 都教後生仔要畀人有 second chance ，反而係間學校就連畀人自辯嘅機會都冇？（OK，戲嚟啫，希望真嗰間學校唔係咁）

如果我係 Peter ，讀緊 high school 就已經跟過 Iron Man 闖天下，識整咁多科學同機械嘢，仲要去過外太空打外星人，我仲使跪求 MIT 收我？佢出埋獎學金叫我讀我都仲要諗吓啦！

咁女朋友同兄弟點呀？唏，肥仔阿 Ned 電腦咁叻，唔愁出路啦！MJ 都應該係叻女啩，咁三個人拍住上，冇話唔掂嘅！

「咁佢哋仲青春，都要讀書嘅。」咁都係，但正所謂：東家唔打打西家，全世界得一間名校咩？人哋唔賞識你，你咪去第二度讀囉！重點係咩呀？係原來你喺自己屋企都整到晶片、化學藥品同啲不知名高科技零件出嚟，咁你去創業都仲得啦，唔賣 product 都可以去賣專利啦！你用實力證明返自己，之後慌冇學校收你咩！

「學校係話你有殺人嫌疑先唔取錄你呀！」咩事先？名校就可以未審先判，咁嘅態度㗎喇？如果學校話有 concern ，要延長時間考慮，或者要見個面先，都 ok 吖。「唔服氣就要上訴嘛！」問題唔應該係要學生上訴，證明自己ok嘛，咁到之後救咗個副校後，又有偈傾嘅，學校係咁做嘢㗎咩？

即係：
．佢之前救過無數咁多人，學校唔理；
．之後蒙上殺人嫌疑，「嘩你真係窮兇極惡呀，我哋好驚呀，我哋學校係唔會唔收你呢啲咁壞嘅學生，你慳返啖氣啦 bye 」；
．然後因為救咗你哋學校個副校，就「呀原來你又真係好人嚟㗎喎，我哋再諗吓啦 baby ！」

喂，Peter ，做人有返啲骨氣啦！你值得獲大家尊重㗎！

可惜 Auntie May 只教 Peter 做人嘅道理，Dr. Stranger 只教佢逃避現實，Peter 喺成套戲嘅上半部，正正就係差咁個mentor。你話，如果 Tony Stark 仲喺度，佢會唔會都戥 Peter 入唔到 MIT 而可惜吖？唔會啦，直接叫佢入佢公司做 MT 仲好啦！仲 MIT ！