37 歲男警去年任觀塘區區議員謝淑珍義工期間，涉嫌向因租務糾紛求助的街坊，索取共 2,400 元作調解報酬。他否認 3 項代理人索取利益罪，今（ 18 日）在觀塘裁判法院受審。事主供稱，她向謝就糾紛索免費法律意見，其後謝淑珍介紹男警幫忙。男警代約涉事人相見後，以 WhatsApp 索取酬勞，「話今晚用私人時間幫我調解，可唔可以收我 800 蚊」，事主在兒子提醒或犯法後，封鎖男警。

男警在庭上指，他從沒說服務免費，事主也一度覆「收到」，多次大聲質疑事主易受人擺布影響口供，又指事主「孤寒」、「打完齋唔要和尚」。對此，事主手執佛珠，多次說，「阿彌陀佛呀靚仔，唉呀」、「好驚呀真係」，獲裁判官杜浩成表示不用擔心或緊張。案件押後至本月 28 日再續，料傳 4 名辯方證人，包括被告的精神科主診醫生。

男警今早自行抗辯時，曾質疑過往做義工都是他作主動，指謝淑珍轉介訊息沒寫明義工性質，但一般調解員都會收費，盤問時質疑：「我係咪就係一世係你義工？」(另見報道)

被告陳家霖（ 37 歲，警員）被控 3 項「代理人索取利益 」罪，指他於 2020 年 10 月 22 日，作為區議員謝淑珍的義工，分別向李佩君 (業主)、雷曉程 ( 租客 ) 及李菊洪 ( 地產代理 ) 索 800 港元，作為協助處理三人租務糾紛的報酬。

2021 年 12 月 24 日，事主李佩君作供後離開法院。

事主：找區議員索免費法律意見

向區議員謝淑珍求助的事主李佩君下午供稱，她與丈夫共同持有油塘一個寫字樓單位，托地產代理李菊洪放租，由雷曉程接租。雙方簽訂租約後，雷曉程在去年 10 月中搬入單位，惟當時租客未遷出，揭租約中起租及免租期出錯。雷要求取消租約，及退回租金、按金，其後向李索償 20 萬損失費。雙方談不攏，李遂報警。李原擬到民政署尋求免費法律意見，中途想起有區議員，遂改赴謝淑珍辦事處求助。

李續指，謝淑珍安排警員陳家霖協助調解，李與陳 22 日在辦事處會面，陳之後替她打電話給租客及地產代理，相約當晚在地產公司談判，過程中沒有提及收費。被告其後 WhatsApp 她，「話今晚用私人時間幫我調解，可唔可以收我 800 蚊」，又說「今晚唔好叫我陳 Sir，叫我陳生就 OK」、「不過畀錢就唔好話畀仔仔聽，下次見面先畀我」。她當時覺得奇怪，但仍覆「收到」，並將對話截圖轉告兒子。兒子告知有犯法風險，「跟住我就琴琴聲刪咗佢」。

李佩君續指，不久她兒子接獲雷小姐來電，「話我咁反覆，點解又改時間又取消」，「我話咁搞笑嘅，陳生都打嚟講話改期同取消」，再問地產代理也是同樣說法，三方遂繼續在約定時間見面，發現被告均有向他們各人要求收取 800 元。

2021 年 12 月 24 日，被告陳家霖自行抗辯，散庭後捧著文件離開法院。

被告：你為我好，你可以唔做證人㗎喎　事主：阿彌陀佛

被告盤問事主時，事主一直轉佛珠。被告問李佩君，「如果謝淑診講呢位休班警，係有精神病、有精神分裂，如果你知，仲會唔會揾佢幫你」。李佩君轉著佛珠答，「唉唷我一定唔制喇」，被告即答，「同意，畀我都唔制喇」，並取出俗稱白卡的傷殘人士登記證，指自己有永久性精神病。之後又問李，為何主問時特別提到他遲到，「其實我做義工，點解咁執著義工遲唔遲到呢？既然你都唔係請佢」，李佩君答，「做警員時間管理好重要，法官問我緊係照講喇」。

被告續指，案發時仍有社會事件，「當時好多警員被攻擊，唔願將身份透露」，但指自己有派卡片給她，上面有他電話等個人資料，「角色調換，如果你係我，我需唔需要畀哂電話地址你」，遭官制止指問題與本案無關。被告又質疑，李的兒子知悉他是警察後，才極力反對他幫忙，又叫李封鎖他。李表示不同意，「你之前話收錢個啲，我哋都係為咗保護你。我個仔話，你封咗佢，費事畀佢講咁多嘢，就封咗你」。被告問，「你同我好熟㗎？」遭官打斷，「佢基於宗教信仰，所以同熟唔熟都無關係」。

被告亦質疑，他與李佩君會面時，沒提及服務免費，李同意，但說「我求謝議員，佢係免費嘅，幫助市民。以前有啲咩都去揾涂謹申、余若薇，都係唔收錢」。被告表示，當晚達成協議，李只需賠約 1.5 萬元，而非 20 萬，談判成功，李同意。被告續指，「想向你指出，你呢啲叫打完齋唔要和尚，當你知我要 800 蚊調解費，因為你係，我直接講，你係孤寒嘅人，乜都唔願畀錢，要免費。當你知唔使我，都可以完成調解後，你就飛起我」。李指不知如何回應，「唉呀阿彌陀佛呀真係！如你一早係議員到講要畀錢，我同意梗係畀你啦。如果我哋 3 個畀 800 你，後果咪仲大件事」。被告聞言冷笑，「你唔使擔心我，我相信法律係公正，所以我先企係到。」

李佩君其後又指，「本來我都好感恩你，我成日叫你靚仔，想寫信畀你多謝你，點知講啲咁嘅嘢。800 蚊畀你好閒啫，但我真係驚害咗你呀，真係驚害咗你呀真係，唔想你學壞，想個個都好嘅，都係想你好嘅」。被告覆，「多咗，多咗」，又說，「你為我好，你可以唔做證人㗎喎」，遭裁判官打斷，「證人，你做證人無壓力，無人可以同你講你可以唔做證人。如果有任何人走嚟提你可以唔做，呢個係妨礙司法公正」。李佩君即快速轉動佛珠，「我學佛都係想人好......」，其後又說「畀你咁窒法，驚㗎嘛大佬，唉呀真係阿彌陀佛」、「好驚呀真係」。

案件編號：KTCC1136/2021