有 7 個月身孕的 4 旬婦於土瓜灣被警員截查身份證，一度疑遭警反鎖雙手拖行，孕婦 3 天後誕下早產兒，今（24 日）被裁定阻差辦公罪名不成立（另見報道）。被告劉笑芬於庭外激動流淚，向記者表示，「終於有一個勝利，攞返個公道，捱咗好耐...終於天有眼啦真係」。

被告劉笑芬指出，她會考慮就案件向警方索償，而她早前亦已向警察投訴課作出投訴，「希望可以比返個公義嘅判決比我...對於啲差佬咁做嘢，係唔啱嘅，我想問下鄧炳強係點回應呢個問題？」

鄧炳強年初稱：慰問事主 但不認為同事「唔啱」

時任警務處處長鄧炳強今年年初就事件，回應立法會議員查詢時，對事主表示慰問，但不認同「基層同事唔啱，好似講到係不必要武力咁。」，強調警員是根據當時情況作出行動，盡量不影響他人，「用最低武力完成行動」，而警方亦已收到相關投訴，及尋獲獨立證人，會作公平及詳細調查，並相信案件調查結果可以還大家清白。

被告劉笑芬又認為公道站在她的那邊，「唔會幫晒啲警察囉，我覺得今次終於天有眼，呢個判決我等咗好耐」，被告指她被官司折磨了一年，而她早產的兒子現時健康情況仍屬中下，「後期都唔知點」，她希望兒子可健康成長，日後做個勇敢的人，並指「每年呢一日，我都會同我BB出去慶祝，呢日對於我講好重要，終於可以解脫」。

她又指，家人及朋友於官司期間一直陪伴左側，「佢哋一直陪住我一齊行，而家我終於行咗出嚟」，她對裁決感到滿意，「啲人話我做show，終於唔係我做show啦」，她又感謝傳媒關注事件，希望同類事件不要再發生，「其實查張身份證姐，唔應該做到咁大，我已經好配合㗎啦，所以可以證明到我唔係阻差辦公。」

被告認為自己遭濫捕濫告，「鎖我手銬其實就唔啱，過程中我一直都無反抗，阿官都係咁講，我好堅定（認為）呢個官真係幾好，所以我對差佬真係好失望。」