還是比較懷念招積得起時的二少
《藍血坐竵嘍囉升呢》
一國兩制改隊型，今時往日要分清。
嘍囉上位充先進，藍血讓路做花瓶。
當年統戰官商富，此日揸旗工農兵。
土共發圍底氣壯，少爺坐竵嘆孤零。
當日睇返那個所謂立法會選舉論壇，見到阿鼎指住田二少個鼻話佢係二五仔嘅時候，只覺得「係咁㗎啦」，都幾 juicy 吖！而家啲左仔層層交心，越左越好，以文化大革命的作風不斷扣帽子、打棍子，預咗㗎啦！有乜出奇？事後又上演了兩次阿鼎說要向二少道歉，只覺得幾可笑。「抽完你水呵返你」這一招，真係幾十年都冇變過。以前作政治鬥爭，先用盡一切卑劣手段把政治對手鬥跨鬥臭，一段時間之後又話會為佢哋平反，仲要大鑼大鼓搞追悼會，充分彰顯個黨幾正確，永遠正確，今日一定正確過昨日，就算今日唔正確聽日都會正確番。這種伎倆真係長用長有！
本來做得建制派，大家都係同一個老闆，有咩好爭論！事後阿鼎同二少也是齊齊順利當選，攞哂當區兩個立法會直選席位。大家都有交待咯，咪當做咗場戲囉！個戲框唔係咁寫定嘅咩？
但估不到二少原來一直耿耿於懷。立法會當選議員見記者的時候，佢已經呻咗一次，埋怨阿鼎拖佢落水打泥漿摔角。要勞煩第一大黨主席搭着二少膊頭，又俾條腰二少扶一扶。嗱，冧返啦，唔好嬲啦，咁咪算囉！點知原來二少仲係頂住條氣，又唔可以發惡，結果接受《香港 01》專訪嘅時候又再呻多次。
二少的大佬田少早在 1988 年已經被委任成為立法局的議員，二少雖然只係細佢大佬三年多，但直到 2001 年底政府委任佢成為九廣鐵路公司主席之後，他才逐漸為人認識。二少給人的印象，是比較招積，少爺氣焰比佢大佬更濃烈。過往都曾經與二少在一些電台節目及論壇等場合碰過頭及對談過，表面上佢確實較為招積，講嘢又較為直接，有嗰句就講嗰句，但沒有逼人太甚的感覺，而且比較坦率，私底下也是客氣有禮的。
自從他在公眾視線出現之後，給人的印象確實是一個較為寸的人物，事實上我覺得佢都寸得起。大家印象最深嘅故事，應該都係 2002 年公開落前高官楊啟彥面那一幕。
楊啟彥以前在官場一向予人印象係火爆及官威十足。退休後入地產公司做高層，連老闆都唔俾面！後來被委任成為九廣鐵路公司的行政總裁及管理委員會主席，將九廣鐵路公司搞到成個私人王國咁。特區政府要整頓，就諗到要將管理及行政分開，然後委任二少做管理局主席，楊官只留任行政總裁一職。二少也不負所托，多番高調主動介入九廣鐵路的事務，儼然成為港府鐵路發展政策的代言人。到 2002 年發生「西門子事件」，在西鐵項目上因為無法依合約如期交貨，西門子公司卻反獲得楊啟彥同意，得到一億元的補貼。事件爆出之後，政府要作出調查。
當年 5 月在一個記者會上，二少與楊官一同出席，俾人問到有關問題。楊官向在場記者說，與「二少認識咗好耐」，更是他「本人的好朋友」。但二少即時不慍不火地指出，他與楊官「不是好好的朋友」。嗰一幕真係尷尬死，也開心死好多人！楊官燒枱炮，發官威，好多人都嘆過！二少真係幫佢哋乜仇都報哂。那可能是楊官一生最冇面嘅一鑊，搞到佢終於在 2003 年自己辭職！
二少在 2001 年出任九廣鐵路管理局之前雖然並不為人熟悉，但已經擔任政府的一些公職。他進入公眾視線 20 年，是否支持他都好，他的招積及他的闊少爺風格，也可以說是香港政壇的一道獨特風景線。除了上述九廣鐵路那一幕之外，他與自由黨鬧反及離開、後來加入新民黨之後又於 2017 年公開向葉劉逼宮那幾幕，都令人印象深刻。
二少無論出身、識見、社會地位、政壇經歷、競選立法會議員、出任立法會議員，都比阿鼎有把炮。阿鼎是 2012 年之後才挾着青年民建聯這個招牌，個個禮拜出席《城市論壇》舉手大放厥詞講歪理才開始引起人注意。2016 年選立法會，阿鼎也只是險勝！阿鼎與二少的實牙實鑿作風可以說是大異其趣。以阿鼎嘅出身同埋背景，睇埋佢哋嘅人品及表現，阿鼎頂多可以說只算是嘍囉一名。如果幾年之前，阿鼎真係連做二少嘅跟班都未必配，幫二少開車門都未必輪到佢。
但時移世易，今時唔同往日，水鬼升城惶，依家就係要喺香港大搞文革。土共左仔大哂，政治嘍囉當正自己先至係先進分子，才會上演阿鼎指住二少個鼻，七情上面痛駡佢係二五仔呢一幕充滿文革革命劇《紅燈記》氣息的畫面！
二少，又唔怨得咁多喎，呢一幕你作為建制派有份做成㗎喎！搞到俾一啲連做二少跟班都唔配嘅人公開奚落，不正是與一眾殖民地 AO 個個要鬥快扮京腔幹部，特首也要俾土共工會的工農兵代表在議事廳內當眾「小」同一樣邏輯及道理嗎！
明乎此，還是要勸二少睇開啲！起碼仲保得住個位吖，有另一啲建制派想繼續喺立法會議事廳瞓覺都冇機會啦。不知道二少還記唔記得另一件事？
楊官 2006 年底病重的時候，二少曾經向楊太表達過想去探望，結果被楊官本人拒絕！可見楊官對那件事也是一直耿耿於懷，可能到死前都唔能夠原諒二少。楊官於 2007 年病死，唔知同俾二少激親有冇關係。
為自己健康着想，二少，咪嬲啦！做得建制派，有啲嘢，預咗啦！而家要講共同富裕，招積再唔係賣點，又冇人逼你做建制派，二少又唔係好似佢哋咁等住開飯，既然自己拋得個身出嚟做建制派，今時今日唯有做鵪鶉，有咩好怨！唔到你招積啦，嗗聲吞咗佢算啦！就算招積唔起，都唔好搞到自己成個怨婦咁吖！就算冇熱血，話晒都係藍血，你話成何體統？
諗返轉頭，今時今日，香港選民才最招積得起，話知你又呃又氹，又拉又鎖，選舉日一於港九新界一日遊，睬你都傻，這才是暴政下的招積！
原刊於作者 Facebook