【專訪】好青年球員密密加操盡戒快餐 袁世傑：想同香港搏盡
【獨媒報導】新一季港超聯開鑼，22歲、效力香港U23 的袁世傑，今季以超齡球員註冊。袁世傑就讀城大四年級，是球圈中罕有的乖乖仔。他不但密密加操，為了保持健康飲食習慣，更早已盡量戒掉快餐店食物，又將每月薪金交給媽媽：「好開心球隊將超齡位俾咗我，係身份認同。希望可以幫到一班啱啱踢職業嘅年輕球員。嚟緊呢一年，我仲想同香港打亞洲盃，想同香港搏盡。」
香港U23 去季新軍成立，袁世傑已是球隊常規正選，今季迎來個人第四個港超聯球季。他決心以爭取入球、助攻為首要任務：「好坦白講，我都想踢香港隊，54年後再踢亞洲盃，希望自己都有一席位。」
冀追上偶像C朗步伐 踢職業後生活按部就班
基斯坦奴朗拿度是袁世傑的偶像，「好想可以追上佢嘅步伐」。袁世傑講得出做得到，在選擇食物上有要求，他會盡量烚雞胸、多吃蔬菜，「我宜家盡量都唔食麥當勞、KFC，踢咗職業後無咩點食過。一嚟唔係特別好食，而且對運動好大影響。」
袁世傑的故事正面得很，他的另一個身份是大學生。自小已是運動健將，小學便參加跑步、手球、籃球及乒乓球，而足球給他的挑戰性最大；10歲加入元朗區隊，12歲入選港青，翌年和一班隊友，包括林樂勤、林衍廷、謝家榮等加入車路士足球學校，再一起轉投愉園。
在愉園踢乙組那年，被球隊外借到東昇，教練岑國培喚他出去「浸下」，累積更多上陣經驗，後來隨球隊升上港超聯，主教練鮑家耀同讓他嘗試不同的位置，「好多謝佢哋俾機會我，等我感受到職業同業餘嘅差距。」
張健峰邀請加入香港U23 首要學習孭飛
崔護重來的愉園，最終高開低收，結果不似預期，班主陳志實拖欠職球員薪酬，至今尚未找數 。袁世傑仍有六位數人工未取回，他形容是遺憾，「外在因素控制唔到，球員只能夠做好本份，踢好每一場比賽，做好每一次練習，真係咁簡單。」
在快活谷短短兩年的港超生涯，袁世傑仍記得，曾和一班同齡隊友曾迫和傑志、東方龍獅和理文，「對傑志同東方都係入波先，足以證明對強隊唔係俾人㩒住嚟踢吧，我哋亦都有能力入到波。」
告別愉園或許感到難過，但去季季前獲張健峰邀請加入香港U23，袁世傑想也不想便答應。他感謝對方的信任，尤其在沒有外援的情況下，年輕球員首先要學習自己「孭飛」和策劃攻勢。
香港U23 去季贏過港會，亦曾被東方大炒七球，球季最後因疫情無奈腰斬。袁世傑形容，每名球員落場均「希望爭取啲啲嘢」：「大家都知道時間有限，想之後可以上到去踢大會，代表香港，甚至外流。」
健身增強對抗性 踢港青獲金判坤改造成翼鋒
早在第一年踢港超，袁世傑已習慣加操，他會到康文署健身室健身，直至現在仍不間斷，每周至少去三次，在球隊練習前便找岑國培練基本功，在球隊練習後再和隊友加操練好體能，加操已是他的生活一部分，「自己知道身體對抗性係好重要，失去咗對抗性好難喺港超聯立足。」
說到對抗性，這裡有一個小故事。在入選港青後，袁世傑獲金判坤改造成翼鋒，「佢話我既然咁鍾意盤扭，與其喺中場扭不如去邊路扭啦。」
每月薪金交母親 平衡學業踢好職業足球
袁世傑很早便立志要做職業足球員，小時候已對媽媽說，想將踢足球變成職業，「唔係落去街場，或者練完區隊就走。」家人都很支持袁世傑踢足球，媽媽是他的最大支柱，三名弟妹都會入場支持他，「我同媽咪講，如果我決心做好嗰樣嘢，我一定會用盡自己嘅方法、俾心機去做好，唔會去嘥時間拖幾年。」
袁世傑會把每月薪金都交給媽媽，「我如果要用錢就同媽咪講，佢會知道我係咪真係有需要，俾屋企人管，就唔會用突咗。我哋成日都會傾計，咁會容易啲規劃自己將來。」
學生運動員 多次獲獎學金
跟同齡球員很不同，與其說是生性、識諗，袁世傑更清楚自己想要甚麼。現就讀城大四年級，主修歷史和文化遺產，他早前再獲得獎學金，包括政府資助的職業足球員獎學金計劃，「我一旦踢唔掂，點樣支持屋企生計呢？點都要讀完同讀好個學位。唔可以咁自私，為咗踢波就要屋企同自己捱。」
既要平衡學業，亦要踢好職業足球。在剛過去的球季，袁世傑「日日都好爆」，早上9點至11點在將軍澳足球訓練中心練習，操練後乘的士，趕及中午回到城大上堂，下午3點落堂後則要和同學傾功課，傍晚6點半再到聯合運動中心參與城大足球隊練習。
「想證明可以兩樣都兼顧到，做運動員唔一定讀書差，都可以有好好嘅時間管理。唔會影響到生活，而且仲有好好嘅效果。」
助城大奪四冠王 學界最有價值球員
袁世傑性格內斂，直至去年，城大足球隊教練邱德民將隊長臂章交給他，他開始學習成為領袖，漸漸變得成為更主動、愛連繫隊友的球員，「我好想多謝返教練」。
城大足球隊在剛去的球季贏得學界四冠王，包括大專盃、成龍盃等。作為隊長的袁世傑，更贏得最有價值球員，他歸功一班隊友踢出兄弟波，全因對城大有歸屬感。
除了學界，袁世傑更有踢五人足球。他形容，五人足球是自己的轉捩點，因為更着重配合、個人技術和走位配合，及後通過選拔入選代表隊。
袁世傑早前更代表五人大港腳到馬來西亞參加亞洲盃外圍賽，港隊今屆在踢法上作出不同嘗試，球員亦更有歸屬感：「陣容年輕化，更有壓迫性，以前防反為主，宜家曾sir（曾偉忠）就好鼓勵我哋有自己一套。」
訂五年限期 27歲前未能踢大會或放棄足球
袁世傑早前已考取足總D級教練牌，他給自己定了限期，「如果27歲都仲未話上到大會，或者入到香港隊嘅常規球員呢，咁就放棄足球。」
「因為我覺得27、28歲都算係要發展新方向，唔可以再停留喺足球。我會覺得足球唔係踢一世，有時都要部署同規劃下將來，喺轉嘅過程需要時間去適應。」
數年後的事沒人知曉，袁世傑今季的目標是「擔起支旗」，為香港U23在前線衝鋒陷陣，爭取獲得安達臣的垂青。問到作為超齡球員會否有壓力，袁世傑就眼神堅定：「踢職業如果唔識面對壓力，你已經無能力成為職業球員。」
記者：麥馬高、周頌謙