（獨媒報導）政務司司長陳國基上周到訪香港珠海學院，在出席活動後與該校新聞及傳播系學生對談，他以家庭作類比，及「唔好俾賊入屋」比喻國家安全：「你自己家庭安全呀，爸爸媽媽都會教你哋，離開屋企記住鎖好啲門窗，唔好俾啲賊入嚟，或者可以講埋呢，煮嘢食都要安全啲，啲食物都要安全。我哋用啲電要小心呀，唔好燒咗嗰啲電掣。」

國家安全教育中心上周六（10日）舉辦首屆國家安全教育（導師培訓）證書課程的畢業典禮，活動在位於屯門的珠海學院進行，陳國基任主禮嘉賓。

在出席活動後，陳國基與該校的新傳系學生對談，新傳系日前上載對談的影片，學生問他：「年青人點解要多啲了解國安法？」陳國基以家庭安全作類比，「其實呢啲呢，推而廣之同國家安全嘅概念一樣，不過屋企就容易理解，國家安全係一樣咁重要。」他強調，國安法對香港、全世界及中國均非常重要。

圖片來源：珠海學院Facebook
圖片來源：珠海學院Facebook

陳國基：國家不安全 難有安全生活

陳國基重申，如果國家不安全，便難以有安全的生活，對屬於未來社會主人翁的年輕人更重要：「如果未來要靠我哋年青人，但如果無一個國家安全意識嘅話呢，咁就好弊。」他舉例指2019年「黑暴」期間，年輕人遭有心人煽動，不重視及錯誤理解國家安全，並鼓吹港獨、組織反對政府，加上外國勢力滲入：「又汽油彈，通街都係，你諗吓，嗰時我哋嘅生活點可以好舒服好正常呢？」

對於家庭的比喻，陳國基其後再對學生解釋指，如果要保護家庭，便必先認同自己是一份子，並會愛家庭：「推而廣之喺我哋國安法都一樣，你應該有個國民身份認同，你認同你自己係中國人，你認同呢個國家係你一部份，你都要愛你呢個家庭，所以你要愛國愛港呢個情操，同埋你要認同你自己係中國人。」

《港區國安法》自2020年6月30日頒布，被問到年輕人如何了解國安法。陳國基就建議，年輕人要多接觸、了解國安法，因為當中有不同範疇，鼓勵學校多教授相關知識。他認為年輕人必須培育對國家的尊重、愛戴、愛國愛港意識及對國家有歸屬感，便會自覺地維護國家安全。

圖片來源：珠海學院Facebook
圖片來源：珠海學院Facebook

籲年輕人到內地發展 非有心人煽動「講到咁差」

另外，陳國基亦向學生推介「大灣區青年就業計劃」，呼籲年輕人到內地發展，認識祖國，從而培養愛國情操、國民身份認同：「係唔係好似有啲別有用心嘅人煽動，講到內地咁差呢？其實唔係！」

陳國基最後表示，年輕人只要擁有愛國愛港的心，及努力裝備自己，將來從事自己喜愛的事情，便是最好的支持中國及香港，「散發正向能量，影響身邊嘅朋友，向著正向支持國家、支持香港嘅方向去發展。」