黃耀明5月歐洲巡唱 將為四個城市設計獨立歌單

（獨媒報導）香港歌手黃耀明今年5月將舉行《邊走邊唱》歐洲站，是入行多年以來首次歐洲巡迴演唱會。明哥表示既興奮又期待，將會為四個城市設計獨立歌單。他指歐洲每個城市都有朋友居住，包括填詞人黃偉文：「如果有機會長住嘅話，都係會揀倫敦，因為有晒我最鍾意嘅嘢。」

黃耀明今年1月曾到台灣舉行兩場演唱會，今次歐洲巡迴演唱會共有四站，包括英國倫敦、曼徹斯特、荷蘭阿姆斯特丹及德國柏林，對於演唱會出現撲飛潮，明哥就表示：「好多英國朋友1月開始已經問定幾時有得訂飛，好擔心到時睇唔到。」

談到演唱會的歌單，明哥就表示會與台灣站大大不同，並指希望能夠為每一個城市設計獨立歌單，音樂班底則有多年老拍檔、人山人海成員李端嫻，及《絕命青年》結他手Soni。

左起：李端嫻，黃耀明，Soni

嚮往英國文化及流行音樂 The Clapham Grand屬最喜歡場地之一

今次歐洲巡迴演唱會首站是曼徹斯特，第二站就是倫敦，會在黃耀明最喜歡的場地之一The Clapham Grand 舉行。

明哥就提到，成長時吸收的文化及流行音樂，不少都來自英國，所以尤其嚮往：「英國嘅night life 係好有趣，除咗舞台演出，dance culture都係好盛行。」而他在第一次踏足英倫的時候，便在Clapham 住了足足一個月：「Culturally 倫敦對我嚟講係一個開心嘅地方。」

門票明日公開發售 四個城市設獨立海報

《邊走邊唱》歐洲站的門票將在明日當地時間，即英國早上10點，荷蘭、德國早上11點公開發售，並設VIP Package，可以優先進場及在演出後meet and greet。

另外，黃耀明亦邀請了好友兼插畫師黎達達榮，重新設計海報，而且更是「一站一款」。明哥大讚好友細心，「倫敦一站係香港人一睇就會聯想到嘅郵筒同埋巴士嘅紅色，我身上係一架巴士，上面有我鍾意嘅 New Music Express 音樂雜誌，同埋文化節guide book《Time Out》。至於小狗，選用哥基因為係英女王嘅愛犬。而柏林嘅公仔造型係根據我最鍾意嘅一隊德國電子音樂樂隊 Kraftwerk 重新灌錄嘅精選大碟封面《The Mix》，狗狗就係正在咬著德國啤酒杯嘅德國牧羊犬BB 。」