【港超聯】38歲謝德謙季尾掛靴 大局出發甘任後備予後生接棒
【獨媒報導】38歲前港隊成員、現效力港超聯冠忠南區的謝德謙，今季季尾後將會掛靴。謝德謙接受球隊官方訪問，對於過去數季均退居後備，他從大局出發指，任何工種均需要後生接棒，而20歲的隊友伍瑋謙已為港隊成員，更需要上陣機會：「你無可能一個老師傅坐到尾，做到退休。佢可以坐到退休，但後面接上嚟嗰個人毫無經驗，咁佢上唔到手，對最尾件事係唔好。」
謝德謙又感謝足球帶給自己的所有，「無足球，無謝德謙」，認為每人都沒有太多時間能找到喜愛的工作，並可以走到最後：「行到尾係一件好難嘅事，因為你要克服好多傷患、機遇，好多唔同嘅環境，你克服到先可以行得到去最尾。」
謝德謙（後排右一）
感謝貝鈞奇賞識 鄭兆聰有要求令自己進步
在職業生涯期間，謝德謙先後效力香港08、公民、太陽飛馬及南區。謝德謙在2003年以學徒球員身份加入香港08，翌季獲公民挑選入隊。訪問中有不少有「感謝」，謝德謙點名感謝公民主席貝鈞奇的賞識。自2015年轉投南區，謝德謙稱當時獲球隊主教練鄭兆聰招手，初時不熟悉對方，後者對球員要求高，令球員有進步：「雖然佢個人怪怪地，但佢係一個好有要求嘅人嚟，佢嘅要求先令到我嘅進步咁大。」
鄭兆聰（左一）
謝德謙在2018至2019年球季曾當選最佳十一人，並以884分鐘保持香港頂級聯賽最長時間不失球的紀錄，指有賴隊友撐起自己。他表示，南區與公民的形式接近，同屬家庭式的球會，隊友如兄弟，教練和管理層關係密切：「至少呢度無話邊個係大佬先，由大到細，我哋又肯教啲細嘅，細嘅又肯聽我哋一班有經驗嘅去講。」
職業生涯未獲冠軍成遺憾 望今季最後衝刺
在本地球壇馳騁近20年，謝德謙稱慶幸「行咗咁長嘅路」。對於職業足球員的身份進入尾聲，謝德謙則稱越來越有感覺，「好似要完啦噃，自己咁鍾意做嘅嘢，可能要去轉變」，他強調踢足球是自己的理想，但人越大便要思考日後的路。
不過，謝德謙在職業生涯從未獲得冠軍，他承認是遺憾：「我哋曾經入過決賽，但都把握唔到，有時入到去決賽或者盃賽，係有少少運氣喺裡面，始終臨場發揮，我哋真係球員經驗少啲，未必可以發揮得咁好。」
冠忠南區目前已殺入足總杯、菁英盃四強，對手均為標準流浪，謝德謙期望球隊今季可以最後衝刺，殺入決賽及奪冠而回：「如果我呢一年完嘅話攞到冠軍，掂一掂都無憾。」
謝德謙的不爭 指「總要有人接棒、可以將香港足球推前啲」
廉頗老矣，尚能飯否？謝德謙一直是球隊守門員的不二之選，過去數季則退居後備。守門員的巔峰普遍較其他位置的球員遲，45歲的意大利守門員保方亦未言退，謝德謙則知所進退。談到其不爭，謝德謙認為總要有人接棒，更反問既然接棒的人已出現，為何不放手：「我可以選擇同球會講，點解你唔俾我踢？我覺得我狀態好，練足、俾晒你，但你無謂要球會難做，同埋係可以令到球會進步嘅話，點解唔嘗試？」
隊友伍瑋謙現時是南區正選守門員，20歲的他已是香港足球代表隊成員。謝德謙盡顯無私，指對方可為港隊貢獻，自己出任後備「可以將香港足球推前啲」：「無謂因為自己想要嘅嘢，一時嘅自私。反而啲嘢睇遠啲，對任何人任何事都係好。」
謝德謙認為伍瑋謙有潛質、願景成為更好的守門員，希望對方繼續努力，才可以走得更遠。至於另一守門員蔡子濤，謝德謙讚揚他勤力，但職業足球就是「好波不如好運」，「時機未到你，就算你幾好都發揮唔到」，期望對方裝備好自己，靜待機會的來臨。
伍瑋謙（資料圖片）
寄語年輕球員多裝備靜待機會 「你無可能一世做後備」
被問到對年輕球員的寄語，謝德謙指「自己懶過，飄飄然過」，尤其在首年踢甲組聯賽，便入選香港足球代表隊兼奪得最佳年青球員，感到不思進取：「到你真係感覺到要再去努力、去進步嘅時間，真係會遲。」
謝德謙認為，年輕球員在等待正選機會期間，必須更要認真訓練，「任何機會一嚟就把握到，正選位就係你㗎啦，你無可能一世做後備。除非你好甘心做後備，一世咁hea落去。」
南區影片截圖
在訪問中，謝德謙最後感謝妻子的支持，自言太專注足球及工作，對方協助了自己很多，他在訪問期間更一度眼濕濕。
冠忠南區周六的港超聯賽事，將在主場香港仔運動場迎戰傑志，是球隊今季最後一場主場賽事。鄭兆聰已表示，謝德謙將會正選上場。