【專訪】左閘變身低組別神射手 最被低估的前港超球員——許宏鋒
（獨媒報導）29歲的許宏鋒，兩年前離開港超聯球隊冠忠南區，現時是足球教練，周日踢業餘波。在九年職業生涯期間，許宏鋒大部分時間被安排出任左閘，但他其實是前鋒出身，退役後「做返自己」，去季在九龍城變身成為乙組神射手，今季效力甲組中西區，同位列神射手榜第二位，可說是最被低估的前港超球員。
在職業生涯期間，阿鋒未曾為香港足球代表隊在A級賽事上陣，他不認為是懷才不遇：「我覺得反而係問心無愧，證明過自己嘅價值。可能會有遺憾⋯⋯但只係運氣唔好。」
《獨媒》訪問當日，許宏鋒剛剛教完波，赤膊上身露出近乎鋼條身形，「你好，我係阿鋒。」「你睇佢，好似匹馬咁快。」中西區前隊友梁子駿這樣形容阿鋒，不過這匹馬似乎從未遇上伯樂。九年的職業生涯，許宏鋒曾挫敗過，徬徨過，猶豫過，但他内心始終堅毅。
職業生涯越踢越後 許宏鋒：其實我係前鋒
在北區上水長大，性格好動，阿鋒是不折不扣的體育狂熱，小學已是田徑、足球、籃球校隊成員。小二那年取得全港足球比賽冠軍，立志要成為職業足球員，在青少年期間「轉隊成性」，阿鋒近乎一年轉一隊，踢過北區、傑志、大埔、深水埗及流浪等，由中堅踢到翼鋒，再踢到前鋒。
在外援當道情況下，本地前鋒球員被安排踢其他位置，包括翼鋒可說是「正常不過」。在職業生涯期間，許宏鋒同被安排「越踢越後」，在去季效力乙組九龍城，以及今季甲組中西區才可以「做返自己」，在前線衝鋒陷陣：「嗯，其實我係前鋒。」
陳浩然帶出身 元朗正式出道
中學畢業後，許宏鋒在一個選拔賽表現優異，年僅18歲的他獲李志堅相中加入橫濱FC。從「𡃁仔」做起，阿鋒與梁冠聰、陳肇鈞及劉卓軒等一起兄弟班，那是2012年的事，但那一季上陣機會不多，翌年自薦轉投元朗。
縱使球隊已埋班，陳浩然還是叫了許宏鋒去試腳兼「踢住先」，阿鋒認識了趙俊傑、鄭璟昊及張志勇等球員。球隊沒有小圈子，像一班朋友般一齊踢波。不過，許宏鋒苦笑說，當遇上好教練則有差的老細，反之亦然。
踢了半季，陳浩然建議球隊與許宏鋒續約，並且加人工。許宏鋒到球會老闆的辦公室簽約，但發現合約寫的是另一個數目，不禁說：「可能寫錯咗，我問一問先。」
許宏鋒等了約半小時，未見接待的職員再進來，便「因為要事」先行離開。豈料翌日，球會老闆竟興師問罪，指許宏鋒「好唔尊重」，原來負責接待的職員是其太太。球會老闆一怒之下，阿鋒連約都不用簽。
見盡老細足球 曾向球會老闆陳情盼獲留效
翌季港超聯成立，公民退出，球隊數目減少。該名曾任足總董事的球會老闆在季尾與職球員一起食飯，但球員未有與他打招呼。他不滿被當透明，飯未食完便自行離去，翌日更對教練表示「唔再簽」，用現有人腳踢下季就算，無合約則要離開。許宏鋒曾寫千字文，向該名球會老闆「陳情」，希望留在球隊繼續與手足拍住上，不過對方只讀不回。
誰是金主誰話事，球圈一向如此。許宏鋒很早已明白何謂老細足球。離開元朗，趙俊傑介紹許宏鋒加入港甲公民，那是阿鋒首次踢非職業賽事，陳浩然希望來季能再簽入許宏鋒。
曾任地產經紀 去年始上手足球教練
球圈現時有不少球員任職保險經紀，許宏鋒則做過地產代理。那是2014年的事，在踢港甲那半年，隊友趙俊傑介紹了一名球迷予許宏鋒認識，對方「好睇佢」，帶他去西九四小龍做地產經紀。阿鋒早上到元朗跟操，中午就做地產代理，搵多一份糧。他差點便做成一宗1,400萬元的賣盤，但最後臨門一腳未能成交。
阿鋒又感謝趙俊傑邀請自己教波，教練工作至去年年初才較為上手，「原本無咩興趣，教吓教吓見到啲好嘅小朋友，先多啲動力。」
南華邀試腳 即獲公民安排美國試訓
在公民待了半季，21歲的許宏鋒，獲班霸南華邀請試腳，班主兼「油王」張廣勇向他開出合約。不過，公民突然推薦阿鋒到美國足球聯賽球隊勞德代爾堡前鋒試訓，「後生仔有呢啲機會好正，可以去外國試下點都係好嘅，去南華可能只係坐半年。」
阿鋒在2015年到美國試腳，獲本港多份報章廣泛報道。瘦田冇人耕，耕開有人爭，從美國返港後，數支港超聯球隊相繼聯絡許宏鋒。在美國邁阿密的一個月，每日練兩課，許宏鋒一心一意踢足球，更在友誼賽取得入球。但奈何球隊外援名額已滿，更要留一個位置予班主朗拿度，阿鋒未能留在美國，教練希望他能「留效」等候機會，但當時港隊23歲以下代表隊有比賽，便決定回港。
「你問我宜家再去，我都唔係好夠薑，始終個陣後生，越大越多顧忌。」這次美國之旅，阿鋒笑言最開心是見識了何謂大屋。
讚鄭兆聰是有料嚴帥
流浪，是許宏鋒的最後歸宿。回港後獲教練羅國豪第四度招手，終於重返流浪，阿鋒位置是左翼，不過就只留了一年。鄭兆聰在2016年再次邀請許宏鋒加盟南區，他點頭答應，結果一踢便五年多接近六年，不過就再次被推後一格成為左閘。
直至加盟南區，許宏鋒才練好基本功，「其實一直都係雜牌軍，踢天才波、街波。射門唔準，回波又唔好。」數年下來，許宏鋒在球迷眼中，就是默默耕耘的那位「南區左閘」。許宏鋒讚鄭兆聰是有料的嚴帥，對本地球員尤其有要求，「佢唔鬧外援，因為外援踢得唔好，出年一定無約，所以華人一定要做得好。」
2021年離開南區，除了與疫情有關，亦和球市不景有關。許宏鋒大概想過一百種告別職業足球的方式，沒想過最終如此：「因為疫情，好多球隊都減少咗資源，變相市面有好多球員流出，喺求大過供嘅情況下，好容易被淘汰。」
職業生涯未如樂園 「足球係享受的事情」
九年下來，職業足球生涯未如樂園，除了未能為港隊在A級賽事上陣，只曾征戰省港盃，阿鋒亦被「越踢越後」。許宏鋒絲毫不感後悔，職業足球對他來說不但是人生經驗，而且是享受的事情，「返工時數好短，每日練幾個鐘，無壓力，可以做自己開心嘅事。」
「除非你入到香港隊囉，咁你都仲有少少價值。」許宏鋒自嘲高不成低不就，即使效力傑志的丹尼提早退休，自己亦早已被定型，「拉伕而成的左閘」：「所以咪卡咗喺度，踢到幾多年就踢埋落去囉，我一直係咁諗。」
前季離開南區，許宏鋒曾獲港會、晉峰邀請加盟。阿鋒最終選擇離開職業足球，投入更多時間教波，另一邊兼職踢乙組九龍城，今季轉投甲組中西區，亦輕鬆成為球隊神射手。
被問與丹尼比較 自覺不比任何左閘差
「你覺得自己值唔值得入港隊？」記者不禁問道，許宏鋒想了想說：「可以試吓嘅。」不過現實沒有如果，輕舟早已過萬重山。「嗯，好多朋友、教練都話，我叫有速度、打左閘，又叫成熟啦，一般鬼佬都未必過到佢，點解唔試吓佢？同埋丹尼都老啦。」
在入籍兵當道的情況下，華人球員要付出更大努力爭取入選香港隊。球迷多年來都會將許宏鋒，跟前港隊成員、入籍兵丹尼比較。阿鋒欣賞丹尼的入楔、路數和走位，「點解佢踢到咁多年，係有原因。我唔敢講我優秀過佢，後生都只係贏力氣。但當然事實證明，無丹尼都唔會揀到我。衰乜？其實我無刻意搵原因。」
「我唔會覺得自己比任何一個左閘球員差，even丹尼，我都唔會覺得差佢好多，只可以話各有優點。」
執著已過 許宏鋒：最大遺憾係拎唔到冠軍
「你啱，其實我想負責進攻多啲。」「轉任」前鋒已有兩年的日子，阿鋒今季已為中西區射入22球，雖然是低組別賽事，但入球形式多元化，左右腳、窩利、頭槌及罰球應有盡有，教練、隊友及球迷都讚不絕口。
「入唔到A隊（港隊）係遺憾，但最大遺憾係拎唔到冠軍。」阿鋒自言，最執著的時間都已過去，「其實都睇得好化，用嚟用去都係嗰啲球員，港隊教練又成日轉，要靠其他教練推薦球員。」
說許宏鋒是最被低估的前港超球員，絕不為過。阿鋒顯得不以為然：「只要球迷係認同，對我係讚多過彈，就係一種肯定。人哋會覺得我出嚟係穩陣嘅，咁樣已經好足夠。」
記者：麥馬高、周頌謙
延伸閲讀：
【專訪】疫下兼職保險今季復出爭入港隊 劉浩霖：想證明自己