（獨媒報導）政府將於今晚舉行「香港夜繽紛」啟動禮，有過百年歷史的廟街曾經是夜市地標，廟街商會主席陸興發今早在電台節目直言現時「無遊客」，只有少數內地及馬來西亞散客。他批評政府太倉促推動夜市，「唔係好似魔術棒咁，揮一揮就好多人嚟」。對於有人不時重提大笪地模式，他反問「成日話大笪地大笪地，見過大笪地未先你哋」，「賣杏仁餅啊？龍鬚糖啊？而家細路仔有無人打波子吖？有無人打工仔紙吖？無㗎嘛」。他認為時代已不同，建議於剛拆卸的油麻地停車場空地做「橋底試點」，賣東風螺、炒蜆、鮮榨橙汁等特色食物，亦可以供人表演，成為新的「平民夜總會」。

政府急推 最終結果會有落差

陸興發在港台節目《千禧年代》指，以往廟街主要做遊客生意，但現時是「無遊客」，只得零星來自內地及馬來西亞的自由行遊客，大多遊客抱著「（廟街）值得去行嘅」的心態，但「買嘢唔係十分多」。原因之一是廟街貨品「全部都係大陸嚟」，遊客「係上面已經睇哂」。對外國遊客而言，主要是買「I Love HK」T恤、耳環、首飾手袋等「精緻嘢」，他直言「唔係好吸引我覺得」。

對於政府想推動夜經濟，陸興發指「其實支持一定係支持嘅」，不過實在太倉促，「求其話下個月要搞好經濟，就搵啲檔口增加流量」，他指用什麼方式擺檔、貨品種類等問題仍未解決，「唔係好似魔術棒咁揮一揮就好多人嚟」。他認為政府想像中的夜市，最終或會有出入。

他認為在甘肅街剛拆卸的油麻地停車場，天橋底的用地可以用作「試點」，為期5年至8年，讓不同檔主「賣東風螺，炒蜆，唱歌表演」。主持問他現時廟街亦有同類攤檔，會否爭生意？陸興發指不會，因為他的建議是經規劃的「平民夜總會」，經過食環署門檻，檔主只會「擺幾張枱，食下嘢飲下啤酒，好舒服㗎，睇下你感覺點囉」。

「成日話大笪地，見過大笪地未先？」

對於有人重提「大笪地」模式，陸興發就激動反問「成日話大笪地大笪地，見過大笪地未先你哋」，有人提倡業界賣「精緻嘢」，「點為知精緻啊，賣杏仁餅啊？龍鬚糖啊？個啲細路仔年代食㗎嘛，而家都無人食啦。而家細路仔有無人打波子吖？有無人打工仔紙吖？無㗎嘛！」，他強調時代已經改變，思維要追上時代。

另外有聽眾致電給建議，指應該善用各區天橋底空間，例如深水埗、荔枝角通往九龍的天橋底，聽眾稱可以做飲食業、酒吧。

小巴業倡凌晨後撤禁區 可入大型屋苑

政府未有公布有何交通政策配合夜市，香港公共小巴車主司機協進總會主席張漢華在同一節目建議，政府應放寬小巴的禁區範圍，例如午夜12點後可以進入大型屋苑「開入去做生意」，亦可以開放青衣禁區，他指小巴比地鐵靈活快捷，只要政府在夜市附近提供泊位，「就可以配合到政府」。

張漢華又稱，不擔心人手不足問題，相信只要有生意，「多人搭，自然吸引人揸返小巴。如果搵到錢，自然會返嚟」。