謝家榮向球迷致歉：我哋真係盡咗力 盼港足日後憑實力恆常入亞運四強

【獨媒報導】港足昨日四球不敵烏茲別克，與亞運銅牌緣慳一面。守門員謝家榮在賽後接受開電視訪問，他強忍淚水說：「好可惜差一步，我唔想講雖敗猶榮，因為我覺得好唔啱聽，我自己好唔鍾意雖敗猶榮。對唔住，爭一步就攞到個牌返嚟，但係最後都攞唔到，所以想講聲唔好意思，但係我哋真係盡咗力，呢六場入面。」他又希望，港足日後能憑實力恆常入亞運四強，盼球圈持份者努力、團結改善香港足球的環境。

港隊歷史性晉級亞運四強，但在準決賽不敵日本，在昨日銅牌戰第三度與「老對手」烏茲別克交鋒，惟在上半場完場前先失一球，下半場再連失三球，球員更出現體力不繼的情況。謝家榮在賽後接受訪問，談到今場比賽及香港足球發展，期間多次激動落淚，影片在網上廣傳。

在今屆亞運比賽中，現年24歲的謝家榮表現出色，替港隊屢救險球，是港隊歷史性晉身四強的功臣之一。謝家榮在賽後接受訪問時先提到，很希望取得銅牌返港，以答謝球迷支持：「但好可惜都係差半步⋯⋯我好希望香港隊遲啲有一日，係可以喺亞運度係真係可以爭奪到獎牌，而唔係好似今次咁，可能有啲運氣成份，加一啲可能我哋超水準嘅表現，有啲奇蹟我哋先入到四強。我希望香港隊會有一日可以好似烏茲別克、日本、韓國咁係一隊恆常入到亞運八強、四強嘅球隊。」

港協暨奧委會提供相片

指連失三球後「已散晒」 60分鐘後連跑都吃力

港足連續兩場不敵日本、烏茲別克，均淨呑四蛋，謝家榮再三向球迷致歉：「兩場都輸4:0，咁好可惜啦，攞唔到個銅牌返香港，咁我都想講聲Sorry 先呀喺度。」

謝家榮表示，球隊今場在連失三球後「已散晒」：「我怪唔到大家，我知道大家已經盡晒力，包括我自己。咁短時間內踢六場，我哋真係好吃力，我哋嘅輪換程度唔高啦。所以呢兩場到最後，下半場我哋都真係⋯⋯體能方面睇到係捱唔住，但我知道大家盡咗力，我哋兩場都上半場打得OK㗎，但下半場到失第二球，加上60分鐘打後，我哋可能連跑都吃力嘅時候，我哋諗到啲咩，都做唔到。」

港協暨奧委會提供相片

向隊友說不好意思 太想贏波致惡言相向

被問到有甚麼想對隊友說，謝家榮指出，在比賽期間較為激動，甚至惡言相向：「可能鬧佢地、喝佢哋，完咗場我希望大家明白點解我會咁樣，因為我真係好在意，好在意呢場比賽，真係好想攞返個銅牌返香港⋯⋯但係對唔住，我哋真係差一步，希望我班隊友唔會怪我⋯⋯啱啱咁激動話佢哋。」

在鏡頭前，謝家榮多次向隊友說「不好意思」：「因為太投入，太想贏呢一場波，所以有啲激動咗，咁我希望佢哋明白，其實我真係覺得⋯⋯佢哋已經做得好好，多謝我哋班隊友⋯⋯。」 在說罷後，謝家榮已淚如泉湧。

港協暨奧委會提供相片

冀球圈持份者團結改善香港足球環境 嘆已超額完成

記者最後問到，港足今次歷史性殺入亞運四強，希望香港足球日後有甚麼發展。謝家榮表示：「我希望首先係青訓啦，聯賽方面要做得更加好啦，去到一啲國際賽會失利，就係因為可能我哋港超聯強度唔夠高，當然呢啲嘢唔係一朝一夕可以改善。」

謝家榮最後表示，希望球圈各個持份者，能夠努力、團結改善香港足球環境：「咁我希望⋯⋯呢次入咗四強，其實我哋真係喺好有限嘅資源，同人腳入面⋯⋯我哋入咗四強，其實⋯⋯其實⋯⋯我哋已經超額完成。」

在完成訪問後，謝家榮最後昂首走向觀眾席，向球迷拍掌致謝。

港協暨奧委會提供相片