市民北上消費趨勢持續 邵家輝籲商界「攞多啲優惠出嚟」

【獨媒報導】港人北上消費趨勢持續，近月更有代購替港人到深圳山姆超市採購日用品。自由黨立法會議員邵家輝指本港是免稅港，售賣不少國際品牌產品，正貨正品亦能吸引市民及遊客消費，而消委會、食安中心對貨品食品要求高，同屬信心保證。不過，邵家輝指市民對內地產品有信心，便難免會與本地產品作出比較，呼籲本港商界提供優惠：「攞多啲優惠出嚟，俾多啲著數香港市民。」

上周六經陸路口岸北上錄得逾33.7萬人次，創今月新高，南下則只得12.8萬人次。邵家輝今早在港台節目《千禧年代》指在一小時大灣區融合下，加上本港市民過去三年疫情期間未有離港：「交通咁方便，性價比上又有咁多優惠，市政府甚至乎推出一啲方便措施，令到啲香港市民上去玩，都係明白嘅。」他更感謝內地朋友歡迎香港市民，認為大灣區有逾7,000萬人，需要想方法吸引對方來港旅遊。

邵家輝

承認北上消費對本地零售有影響 「廁紙、豉油都用少咗」

本身是零售及批發界代表的邵家輝，他承認港人北上消費必然對本地零售有影響，舉例指港人周五至周日到內地：「自然你嗰啲廁紙呀，嗰啲豉油呀，其實都會用少咗。對於民生呀、日用品呀都係會有一定影響。」邵家輝指零售數據顯示，現時已回復至2018年水平的87%，因為有遊客來港光顧。

至於如何平衡港人北上消費，及本港的零售數據，邵家輝就稱要多構思「好嘅吸引點」，既能方便本地市民，亦吸引內地及海外遊客來港。

主持問香港仲有咩競爭力 邵家輝：消委會、食安中心是信心保證

對於有報道指市民到內地的山姆超市購買日用品，或尋找代購，主持問邵家輝：「香港其實仲有咩競爭力呢？連日用品都要去內地嘅市場買。」邵家輝稱本港是免稅港，「全世界其實好少地方係咁嘅」：「我哋嗰啲產品華洋雜貨呢，好多國際好嘅品牌嘅產品其實都喺香港，而正貨正品等等都吸引到好多人喺香港買嘢。」他指消委會、食安中心對貨品食品要求高，同屬信心保證。

主持追問邵家輝：「其實覺唔覺得你後先講香港嗰啲各類型優勢，其實慢慢俾內地城市追上，人哋都可能有呢一啲優勢？」邵家輝再三重申本港是免税港，產品價錢佔優，安全及信心保證一向是重要指標，但指租金及人力不足令成本艱難，期望當局盡快補充人力，以提升服務質素及提高競爭力。

倡推演唱會經濟 維園球場舉辦中型演唱會

邵家輝認為，本港有條件推動演唱會經濟，政府可牽頭協助歌手在戶外多舉辦大型免費活動，有助吸引市民、遊客參與，帶動本地零售及酒店業。

在場地方面，邵家輝建議可在中環海濱舉行大型活動，維園球場則可以間中舉辦中型演唱會：「時間唔好去到咁夜啦，唔影響到居民作息嘅話。相信都可以吸引到周邊嘅居民、遊客嚟聽吓。」另外，他亦建議放寬一周一行，讓更多內地遊客來港。