【亞洲盃專訪】從壞孩子前程盡毀到入選港足 林衍廷：向好嘅方向做緊
【獨媒報導】港足下月出戰亞洲盃決賽周，上月首次入選香港足球代表隊的林衍廷，力爭進入決選。林衍廷原本是球圈公認的壞孩子，曾性騷擾及侮辱女球證，被罰停賽10場，隨港足U23到日本期間亦醉酒鬧事，更因為踢私人聯賽，遭對手侵犯後踢向對方頭部，可以說幾乎前程盡毀。不過，林衍廷今年首次奪得比賽最佳球員，再首次入選足球明星選舉最佳十一人，然後首次入選港足，已重新贏得教練及球迷認同。林衍廷接受《獨媒》訪問，形容「已向好嘅方向做緊」：「做任何嘢之前諗一諗，諗多少少。」
林衍廷，24歲，現效力港超聯球隊標準流浪，無論朋友、隊友及球迷都叫他Fat Gor。Fat Gor 踢了8年職業足球，今年終於入選香港足球代表隊，早前作客伊朗出戰世界盃外圍賽亞洲區第二圈賽事：「呢次入到選其實好鼓舞。嗯，我哋同伊朗真係差好遠，人哋世界級，無得比。人哋都未出盡力，我第一次對咁嘅水平嘅球隊。」
如果成長是和自己的比賽，林衍廷的比賽才剛剛開始。Fat Gor 不愛讀書，中學時候更是班上的搞事分子，常常要見家長，更沒甚麼我的志願：「我細個淨係玩，去到15、16歲先有想踢職業嘅諗法，果陣以為自己好叻，我同老豆講，我有自己嘅計劃，跟愉園丙組踢上去嘛。」
學體操變踢足球 曾學鋼琴被老師彈鐘
5歲開始踢足球，與足球的緣分來自父親一次帶他學體操。林衍廷看到窗外踢足球的孩童，便嚷着爸爸要讓他到草地踢波。父親之後替林衍廷報名科化足球學校，更認識了現為國足代表隊成員的戴偉浚。
他們一邊踢巴塞足球學校，一邊踢由戴偉浚父親戴文康與其他家長合辦的球隊小南國。在這裡，林衍廷說了一個秘密，他其實還學過鋼琴，但彈了三堂，老師便向他父親「彈鐘」說：「你個仔唔係好適合學鋼琴。」
後來加入車路士足球學校，林衍廷原以為會與袁世傑、朱偉鈞及張俊軒等人替愉園從丙組聯賽踢起，但曾任巴塞足球學校教練梁志榮找他踢R&F富力，「𡃁仔價」月薪6千元。父親與林衍廷到廣州簽約，Fat Gor還記得爸爸的一句說話：「老豆坐喺我隔離，老細坐喺對面，佢講6千蚊人工。我老豆就話『好！無問題呀，錢唔係好緊要！』」
中堅出身 富力起步改踢右閘
簽了富力，在佛山三水基地「一站式」練波、集宿及健身，Fat Gor初嚐職業足球員滋味。林衍廷踢中堅出身，奈何受身高限制，在富力便改踢右閘。即使位置如何，林衍廷腦中只想爭取上場，但踢了一季便不獲續約，他收到球會的微信短訊，「多謝你對俱樂部的付出，祝你前程似錦」。
不過，林衍廷認為該季獲益良多，打下的基礎較其他年輕球員好：「體能都唔錯，但跑到仆街。宜家嘅年輕球員，無可能體會到嗰陣嘅生活，咁專注做一件事，就係足球。最多就去三水廣場食吓嘢，無啲咩好嘅娛樂。」當說到「仆街」的時候，林衍廷瞧一瞧記者，再笑一笑。
返港後追隨梁志榮，加盟新成軍的港超球隊夢想FC，2017/18年的首季，林衍廷自言「得個跑字」，翌季才明白如何踢職業足球，「真係學識用腦踢波」。看見同齡的謝家榮、林樂勤已入選香港U23代表隊，Fat Gor開始想，自己「係咪都有機會」，後來成功入選2018年仁川亞運的代表隊名單。
先後效力夢想、愉園同解散 如沒散班信一定贏冠軍
然而，夢想FC兩季下來便散班，林衍廷重返R&F富力，球隊已成為爭標分子，球隊人腳、住宿均已大大提升：「我踢過最勁嘅球隊喎，職業生涯，但一個冠軍都攞唔到喎。唉，不過無辦法啦。」林衍廷認為從練習中進步了不少，踢同一位置的盧均宜是他的學習對象，而富力的月薪亦非常可觀。「不過跟住之後愉園就無錢啦！」說到這裡，林衍廷大笑起來。
富力解散，林衍廷獲林燦彬邀請加盟愉園，但與張俊軒，及當時仍踢右後衛的潘沛軒撞位，被安排改踢左閘，直至前年加盟流浪才改踢中場。記者問：「如果宜家踢返閘位又得唔得？」Fat Gor 則這樣說：「要少少時間，但唔會話適應好耐吧。嗯，望嘅嘢唔同，你中場望嘅嘢同閘望嘅嘢都唔同，要搵返啲感覺返嚟，唔係一時三刻，打FIFA 擺落去就得。」
「我隊隊波都踢得好開心！」林衍廷在愉園同樣踢得開心，他還記得小時候與謝家榮、朱偉鈞及袁世傑說「第日一齊踢職業」：「呀，原來又真係得喎，幾開心。」然而，愉園最終欠薪自降，隨著該支老牌球隊再次淪落，林衍廷帶著遺憾離開。Fat Gor 忽然嚴肅起來：「嗯，我覺得球隊成績幾好，我相信愉園同夢想有個共通點，如果接住搞落去，點都會有一個冠軍，兩隊都係！我好相信呢樣嘢，我哋一定會爭到個冠軍返嚟。」
今年奪三個首次贏認同 此前衰三次幾近「永不翻身」
回顧今年，林衍廷在4月首次奪得比賽最佳球員，5月首次入選港足名單，兼首次入選足球明星選舉最佳十一人，這三個首次，令他贏得球迷及教練認同。在此之前，林衍廷卻幾乎「永不翻身」。
「我會話，球場內唔計脾氣係OK，其他嘢都係還好，唔係識死⋯⋯嗯，點講呢，橫衝直撞吧。好似Gigi個單嘢，就係喺愉園衰咗出嚟。」說的是林衍廷在前年3月的一場比賽後，性騷擾及侮辱女球證羅碧芝，他最終被罰停賽10場。「有時少少控制唔到自己，我好少對住隊友會咁樣鬧，嗯，多數對球證，個次就衰咗。」
識死未？林衍廷就稱少少、未去到好完全：「仲有人俾機會嘛覺得。」去年9月，林衍廷在私人石地比賽時，遭對手侵犯後踢向對方頭部兼爆粗，並怒擲球衣。流浪事後指林衍廷未經批准參與該場球賽，違反球隊紀律守則，將無限期停賽，更或會終止合約。
控制球場內情緒 林衍廷：做任何嘢之前諗多少少
「你話真係識驚？上年衰完麥花臣吧。有機會被人炒嘅地步⋯⋯嗯，你無地方去㗎啦噃。終於識諗，有轉變。」對於「壞孩子」的稱號，Fat Gor 不太介意：「無話鍾唔鍾意，無乜所謂。」記者追問：「你會形容乖返未？」林衍廷想了想說：「做好緊囉我會話，向好嘅方向做緊，好似家榮一樣。」
「個推動力係⋯⋯無啦，真係無啦。講到話炒啦，無啦，呢個係最主要原因。嗯，好似真係要改，試吓囉，控制吓自己囉，又唔係話做唔到嘅嘢嚟。」Fat Gor 帶點肉緊地說，其實每次都有反思，直至第三次才明白嚴重性。
談到做好的第一步，林衍廷說是控制在球場內的情緒：「做任何嘢之前諗一諗，諗多少少囉，上年其實都幾重要。」Fat Gor 的說法是爭勝心重：「球場外我唔係咁，一入到球場就『嚟料』，爭勝心重囉，如果好聽啲講。唔好聽就波牛、爛仔！」
林衍廷父親很支持他踢波，會入場觀賞兒子比賽。在犯錯的時候，父親會喚他「唔好再咁啦」、「唔好出咁多夜街，早啲返屋企」、「控制下自己啲脾氣，再係咁就死啦」，Fat Gor 帶點靦腆地說：「我會覆知啦，OK啦。哎吔，個個兒子同老豆講嘅都係呢啲啦。」
指球迷動力很重要 自小「肥底」決心減肥
覺今是而昨非，Fat Gor 覺得球迷動力亦很重要，他不時都會看球迷在社交網站，及討論區的留言：「全部人由都係鬧你，到撐你喎！開心囉，呢個都係一個幾大嘅動力嚟。」
代表「大港腳」上場，林衍廷試過一次，被問到有多渴望代表香港，Fat Gor 再想了想說：「上一季攞咗個獎，覺得『咦，好似有機會喎』。你問有幾渴望，不過我諗要減肥先，我有認真去嘗試做呢樣嘢，真係第一次。」
從小到大，林衍廷都是「肥底」，他在9歲的時候跟隨東方到內地清遠集訓，被改了「Fat Gor」之名。在社交網站Facebook，林衍廷的名字是Lam Topaz：「嗰個名，我阿爸阿媽改，不過唔用㗎啦，擺設嚟。」
盼到外地踢波 佩服戴偉浚努力「球迷鬧佢我都理解」
減肥，林衍廷不是沒有試過，他仍會照食照飲。然而，今天的Fat Gor 已戒糖、減少食碳水化合物，尤其對涷檸茶說不：「係呢一、兩個月事。加埋做gym，出去上體能訓練。」進入港足本地集訓的第五日，Fat Gor 已減去了4公斤。
說甚麼浪子回頭金不換，也許太老土。這刻的林衍廷只有一個目標，在職業足球員的道路上走得幾遠得幾遠。Fat Gor 特別感謝流浪會長莫耀強、總監李輝立的支持，並且給予機會，及每名曾教導自己的教練，包括岑國培、招重文等。
小時候去過西班牙、葡萄牙出外比賽，Fat Gor 長遠目標是外流：「睇吓有無機會囉，目標吧！我唔係好介意去邊，咩都要試吓。」他在16歲那年曾到葡萄牙球隊科瓦彼達迪試腳20日，該次機會正是由戴文康推薦。林衍廷指當時水平與對方球員差太遠，亦未能用外語溝通：「無得踢，真係無得踢。我覺得盡咗力，無咩後悔或者遺憾。」
球迷或許不知道，林衍廷與戴偉浚認識多年，Fat Gor小時候會到戴的家中天台練波。林衍廷曾到英國探望戴偉𠗕，指對方當時已每日練足三課，父親更會安排外國教練作指導，「我都幾佩服佢」。
二人現在會不時見面及食飯，在杭州亞運期間亦有傾偈交流。 林衍廷大讚戴偉浚很努力，「球迷鬧佢我都理解」：「但係佢有今時今日咁嘅成績，真係自己練返嚟，我諗香港無一個可以好似練到佢咁，真係咁有料，佢真係好努力好努力。」
林衍廷的三個目標 入選、贏波、出線
在過去兩個月來努力減肥，有球迷說Fat Gor 已變成Fit Gor。林衍廷透露，早已下定決心戒糖、減少食碳水化合物，做更多健身，爭取繼續能夠代表香港：「決心講出嚟無用，做出嚟先最實際，『減肥』可以係我講俾你聽，我行動表現出嚟先實際。」
「香港隊出到去，要贏到波唔係一件容易嘅事，甚至乎攞一分都可能唔係容易嘅事，但球迷要繼續支持我哋，我哋一路會俾足120%你哋。我哋唔會俾場難睇嘅足球你哋，我哋甚至乎會爭取出線。」
港足決選名單公布在即，林衍廷就表示，只希望在球場上盡量做好本份：「展現我叻嘅嘢出嚟。我自己可能係防守嗰part 叻少少啦⋯⋯叫做。做好自己強項先。」
「我啲期望好唔合理㗎喎，我諗住出線㗎喎。安達臣同我哋講，無嘢唔好可能，亞運我哋入四強都得啦。如果要攞一分就算，呢個唔係目標啦！我唔覺得呢個係夢想，因為呢個係有機會，雖然係好難。」
記者：麥馬高、周頌謙