【亞洲盃】港隊憾負伊朗 胡晉銘：原來同亞洲一線距離唔係咁遠

【獨媒報導】港隊在亞洲盃決賽周分組賽第二場賽事，一球不敵伊朗，錄得兩連敗。港隊今場畫面、內容均不失禮，但始終未能追和對手。港隊球員胡晉銘在賽後表示感到不甘心：「吹完場雞嗰吓，先至察覺到原來自己同亞洲一線距離唔係咁遠，好唔甘心。我哋做得好，但最後一分都攞唔到。」

《獨媒》記者麥馬高、周頌謙 卡塔爾直擊

在去年11月世界盃外圍賽，港隊淨呑伊朗四蛋，在兩個月後狹路相逢僅負一球。胡晉銘在賽後向《獨媒》指，港隊今場在落後之下仍然逼搶，在無後顧之憂下繼續壓前，令對手犯錯：「所以畫面上比起嗰次更加好。」

西亞球隊一向是港隊的剋星，然而，今場賽事完結下來，或許發現，西亞球隊原來並非想像中的牢不可破。胡晉銘形容，今場比賽印象深刻：「原來同亞洲一線距離係咁近，出發之前邊有諗過同伊朗踢成均勢。到宜家呢一刻都幾震撼，但更多嘅係可惜。」

談到港隊與伊朗的差距，胡晉銘認為，香港多年來在處理埋門一腳均有所不足：「呢個係咁多年嚟嘅通病，我哋希望都會每日再進步，push吓自己再練多啲，有朝一日可以好似對手咁，將皮球轉送為入球嘅時候成熟啲。」

港隊與西亞球隊的距離？ 葉鴻輝：做好細節、改善埋門

港隊守門員兼隊長葉鴻輝就認為，香港球員在質素上與西亞球隊或者有差距，未來更要做好細節、改善埋門：「我哋可以演繹到安達臣嗰個踢法，但去到最尾埋門嗰啲位，可以做得更加好，尤其啲細節位，呢啲就係點解強隊會贏波，弱隊難贏波。」

自2009年起代表香港隊，至今即將第15個年頭，對過無數支強隊。葉鴻輝認為，港隊在面對強隊時應先不要懼怕：「過往對住比較強嘅球隊，踢法首先就縮咗落嚟先，宜家喺安達臣嘅調教之下，我哋調返轉，壓返上去，的確係後防嘅壓力細咗好多，做多一啲攻勢出嚟。」

陳晉一：對外界評論不會太上心 最重要一條心

在上一場對阿聯酋的賽事中，陳晉一曾經犯錯，今場續任左閘，表現脫胎換骨，甚至是港隊表現最好的球員之一。一仔向《獨媒》指上場有不少犯錯，對自己亦感到失望，但感謝安達臣繼續信任：「感覺到呢場波，大家決心好大，而真係的確有機會喺佢哋身上攞到一分，真係覺得好近，證明我哋係有機會做到。睇吓下一場波，我哋不無機會做啲成績出嚟。」

被問到是如何調整過來，陳晉一則有感而發指：「職業生涯可能仲後生，都叫經歷咗大大小小嘅事，16歲到宜家，傷患低潮都克服過。」一仔表示對外界的評論不會太上心：「坦白講，我唔係好介意出面評論我，讚我也好，唔好嘅負面也好，唔會好影響到我。」

在亞洲盃分組賽，港隊即將迎來重要一戰，必須贏波才有機會以最佳小組第三名晉級十六強。

陳晉一強調對自己有信心，球隊、教練亦對他有信心：「最緊要係一條心！唔止呢度26個球員，同教練團，而係希望聯繫到香港700萬人、800萬人喺旅程度，征服到一啲嘢。」

另外，今場賽事在哈利法國際體育場舉行，大會工作人員嚴格執行球場規則，即攝影記者不得參與賽後記者會，及到混合採訪區訪問球員，只准文字記者進入。

多間香港傳媒因此未能在賽後第一時間訪問球員，更有記者要趕到港隊下塌的酒店守候，詢問球員回應。