【從政青年】政政系學生關靖豐／最年輕直選區議員周潔莹
（獨媒報導）2020年後，不少民主派政黨及公民組織相繼解散，在「愛國者治港」下，過往民主派從政之路已絕，建制派亦有新的任務和角色。今日的青年，為何仍選擇從政？
（編按：早前曾錯誤刊出修訂前版本，僅此致歉）
＊＊＊＊＊
「我地一陣喺民女等啦」，身穿白色T恤及淺啡色扯布褲、手持梁莉姿小說《明睸如是》的關靖豐，與記者相約在大學站A出口空地，坐在本該屬於「民主女神像」的位置前。在中大校園一隅的長櫈上，這位「山城」少年隨手拾起地上的小石頭，把它握在手上，然後述說他的故事⋯⋯
中大政政系四年級生關靖豐
從政保住公民社會
中大政政系四年級生關靖豐對「從政」一詞有著與以往不同的詮譯，「2019年之後對從政諗法都唔會係傳統sense嘅從政，而係持續關心政治，同埋想嘗試做啲改變，或者唔好講做啲改變咁大野心，都最少想保住公民社會某啲土壤。」
關靖豐認為現時（民主派）從政階梯斷裂，有志從政的青年難以覓得身位。他舉例指，「以前可以做選舉助理，跟住做議助，有機會又如果你想嘅話，可以做區議員、立法會議員。」「但其實自從19年之後大家對呢一方面都知係冇希望，DQ又好，辭職又好，甚至可能被捕，仲拋緊（還柙）咁樣。」
他坦言，現時香港公民社會難以再塑造政治人物，較少人有足夠的資源、魅力、能力，以及承擔風險的勇氣，以公開身份發聲。
信仍有空間「從政」
關靖豐認為即使政治環境如此，亦絕對不代表香港人沒有方法在政治方面「做啲嘢」。例如運用學術研究能力或透過社交媒體，關注土地正義、關注性別權益等議題。
關靖豐關注的範疇眾多，包括囚權、中大政政系合併及油旺重建等，自己不時會寫信及探訪囚友，稱「呢啲土壤好多人都守護緊，佢哋未必係從政in traditional sense，但佢哋係從事緊政治嘅事，佢哋的確令某啲嘢變得公開，俾大家知道講土地、性別、囚權，唔係一樣要好隱匿嘅事。」
記者問他在從事相關工作時，會否感到疲累？他聞言先是一笑，稱自覺不是做得很多，稱「當然體力消耗係會有，但我覺得心力係完全有 。」他認為比起身兼多職，看到不公義而袖手旁觀的狀態更磨蝕人心，叫人稱累，「你覺得世界好撚仆街，有啲手足佢嘅日子好難捱，但你乜都唔做，我覺得嗰種磨蝕會更加攰。」
關靖豐（右二）曾以「政政合併關注組」成員身份受訪，回應中大政治與行政學系擬「重組」一事。（資料圖片）
學習與恐懼共存
問到未來的新法有沒有對他構成新的恐懼，關靖豐稱「如果恐懼係有嘅話，咁呢個恐懼本來就存在，而我諗好多人都已經學識點樣同恐懼共存。」如何共存？，關靖豐抬頭凝視遠方、停頓十數秒，「我諗做在囚支援嘅時候，會見到一啲前輩點樣去衡量風險。」「當你持續關注時事，你唔係見到一個人被人拉，或者諗好慘好嬲，而係諗點解政權會盯上呢個人呢？呢啲嘢其實你不斷思考嘅時候，你會開始摸索到嗰種思路。」
他對言論的「底線」是「首先我唔可以講大話」，但若提及某些字眼需要付上代價，便要思考是否值得、可否為香港帶來改變，「可能你好威咁講完一啲字之後，好多人讚賞你『真係好叻呀，好勇氣』，但香港冇改變到，咁樣我覺得係唔值得㗎喎。」
「點樣去唔好招惹風險嘅同時，去做到你想做嘅嘢，咁呢啲係一種持續嘅操練同學習嚟。」。」「如果我哋唔出聲咗30年，冇人可以話得埋30年後，有人搣咗我哋口上面嗰膠紙嘅時候，我哋仲識得講嘢。」
對於未來，關靖豐思考片刻，「我覺得我需要敢膽想像香港未來」，「如果我唔敢想像香港未來嘅話，我唔會敢於喺當下接受無了期嘅等待。」
＊＊＊＊＊
工聯會葵涌東直選區議員周潔莹
現年25歲的工聯會葵涌東直選區議員周潔莹，她17歲開始，先後於李鄭屋居民協會擔任義，其後於經民聯前區議員陳鏡秋深水埗選區任職社區幹事，再到2018年「311立法會補選」擔任鄭泳舜選舉助理。2019年現任立法會議員陳穎欣介紹加入工聯會並出任其議員助理，2023年「完善」後的區議會選舉，更代表工聯會出戰葵涌東直選獲勝。
她的議員辦事處仍在裝修，周潔莹暫時借用陳穎欣位於石籬石安樓辦事處，接受《獨媒》訪問。300多呎的辦事處，不時有街坊到訪及電話鈴聲，頗為嘈雜。周潔莹身穿粉紅色西裝外套，一頭啡金色長髪，略施脂粉，訪問時略顯緊張，多次向記者表示自己初癒新冠，頭腦未算清醒。
出身基層家庭故選擇工聯會
被問到如何定義從政，周潔莹思索一會，指「其實我唔覺得我係從政8年，因為我以前只不過係一個做服務嘅小妹妹」，「但後來可能真係成為咗議員或者論政，先至為之從政，即係真係公開去講一啲議題。」
為何會選擇加入形象較「老牌」的工聯會？周潔莹指工聯會「旗旘鮮明」，為基層、為打工仔，自言自己亦出身基層家庭，家住新界西南的公共屋邨，認為與工聯會服務基層作為切入點，「其實都好合適。」
記者問到，對周來說，是否一早已經舖好從政階梯？周潔莹回應「唔係囉，完全唔係」，「我細嗰時冇特別諗話要做區議員呢一樣嘢，只不過係覺得有個機會去做吓服務都幾開心，咪落去做，做社區主任」，指自己2019年後除「做區」外，亦有於網上拍片，在網媒「屈機TV」擔任「屈姬主播」，亦曾嘗試應徵非政府組織，可惜面試後不獲聘請。她形容「嗰陣時條路都好闊、好多選擇」，中間有許多探索的過程，「不過依家你哋（外人）睇到我又做咗區議員，先覺得嘩好似一路走嚟都係咁樣。」
2023年10月，周潔莹（右三）與其他工聯會的區議會參選者一起見記者。（資料圖片）
作為建制派一員，那麼是否可以預想未來從政生涯發展？周潔莹笑指有不少人詢問她會否出選立法會，但她稱「邊有諗咁遠，我先當選咗兩個月，我嗰區我都未做好，依家叫做我哋新嘅選舉制嘅第一屆，好多嘢大家都仲喺一個探索階段，講緊我哋作為直選區議員10個區（舊制下的選區），我哋係非常之難去每一個區都做得好好。」
新選制下，不屬「根正苗紅」會否較輸蝕？周潔莹聞言笑稱「呢個問題咁搞笑嘅」，「應該唔會掛」。她認為完善後的選舉制度後更有利年青人從政，政府制定《青年發展藍圖》，亦設不同途徑讓年青人加入政府，包括「青年委員自薦計劃」及「連青人網絡」，形容這些皆是任何人都可以去登記參與的議政論政的平台。「咁其實只要你有志服務嘅心，人哋又睇得到，你就可以加入到，咁我相信同其他嘢唔係太大關係。」
信社會開始和解
作為「愛國愛港」的一員，周潔莹憶述自己2018年協助鄭泳舜助選時接受港台《鏗鏘集》訪問，已經表明自己立場，至今仍然維持相同看法，「咁大個國家，有好多嘢都會值得我哋去學習」，「甚至依家區議會都有一啲培訓課堂，係要了解內地街道辦（街道辦事處），或者係一啲工作組係點樣服務市民。」
她亦重申自己「好鍾意香港」，「都希望繼續說好香港故事，同說好中國故事」，「我哋係要愛呢個國家，如果國家都唔安定，香港又唔穩定嘅時候，我哋又點樣安定都自己生活呢，甚至我哋又點樣去提振我哋經濟呢，各方面大家都係相輔相成。」
2019年至今已經5年，社會仍然撕裂或是開始和解？「好撕裂就睇唔到啦，依家係咪？」，「和解我相信係有咁嘅跡象，即係可能大家之間都唔會再去談論太多政治」，「撩交嗌咩，唔好講啦呢啲，係咪？」，「反而可能會回歸番日常，即係回歸番大家點樣去發展」，「或者依家個社會好多都係講緊點樣可以重振個經濟，可能同學之間大家傾計都會話，可能會傾點樣創業，做咩生意，香港發展係點，大灣區發展係點，無論以前係點樣政見，大家都會去番理性討論入面。」
＊＊＊＊＊
記者最後問到，周潔莹接受《獨媒》訪問，會否擔心訪問出街後被「大師姐」陳穎欣追究？周潔莹聞言笑指，「我唔知佢（陳穎欣）鬧唔鬧喎，但就我覺得我冇必要拒絕呱，我都覺得香港都和解緊，同埋我覺得冇咩所謂，咩媒體都好，我哋作為公眾人物都唔應該去避。」