【港超聯】黃洋告別職業足球 感謝香港成就夢想
【獨媒報導】今季港超聯球季曲終人散，多名老將亦宣布掛靴。效力傑志、40歲的中場「大哥」黃洋今日亦告別職業足球，他將先返回上海陪伴家人，但感謝香港球迷對其肯定和支持：「唔捨得香港呢個地方多啲，因為我所有成就都係香港呢個地方俾我，我喺香港一路都係發夢，呢個係令我實現夢想嘅地方，但我返到上海就要開始認真生活，呢個好現實。喺香港所有野都係好奇妙、好驚喜、好多挑戰、好新奇，好好彩遇到咁多願意支持我，幫我嘅人，同埋俾機會我嘅人。」
現年40歲、司職防守中場的「大哥」黃洋，他自2011年從內地上海來港，及後加盟傑志兼在2012/13年球季成為香港足球先生，性格勤懇內斂，既是本地足球員的典範，亦是近年來港發展最成功的國援球員之一。
人生比喻高低 信傑志能捲土重來
在周日舉行的煞科戰中，傑志2：3不敵理文，在黃洋在72分鐘僅以後備身份入替。被問到是否「不完美」的結局，素來謙卑的黃洋就以人生作比喻：「呢個就係人生。我嚟嘅時候係傑志開始向上，最風光嘅時候。咁我走嘅時候，可能係傑志遇到最難嘅時候，但我相信傑志已經習慣咗咁樣高高低低，我信佢哋會好快企返身，下一季俾啲驚喜大家。」
在賽後，黃洋向傳媒表示，要與球員生涯告別是困難的事：「我為咗呢一刻，都練習咗幾年嘅時間，都係有啲失落，始終自己好鍾意足球，都係想繼續去體驗比賽嗰啲令人好高漲嘅情緒，自己係非常之珍惜。但覺得（踢落去）有啲捱時間嘅感覺，反而喺呢一刻退啱啱好。」
「大哥」今季在傑志兼任助教，但上陣時間已大幅減少，隨著年初失落亞洲盃周賽周決選名單，他已宣佈退出港隊。在今年3月，香港對烏茲別克的世界盃外圍賽賽事前，足總便在賽前安排儀式，讓黃洋、鞠盈智在球迷的見證下正式告別港隊。
黃洋：後備席望到獅子山 已接受「踢得少」的現實
在今場比賽後，傑志未有安排告別儀式，黃洋與一眾傑志球員向球迷致謝，在進入更衣室的時候被記者包圍。一眾記者邀請黃洋接受「最後訪問」，他有感而發稱，今日是球員生涯中最深刻的時刻：「呢個球場太多（回憶），因為我港隊第一場喺旺角場，其實旺角場嘅氣氛好好，同埋係傑志用咗好多年嘅主場。」
縱使今場坐在後備席，黃洋在賽後保持一貫的內斂：「咁多年坐後備，幾時開始慢慢習慣？係因為我見到獅子山喺度，之前咁多年都無睇到呢樣野，開始慢慢接受踢得少嘅現實，反而會去觀察旺角場周圍嘅靚景，咁呢個係一個時候可以退落嚟。」
傑志昨形容「史上最偉大的球員」 黃洋今預告先返上海
傑志昨晚在社交網站發文稱：「每年5月，球場上總會有很多告別。今年我們要告別的，是傑志史上最偉大的球員。明日並非最終章，請大家密切期待。」不過，本身是傑志助教的黃洋，他在今日賽後表示，現階段計劃先回到老家上海，但未來會與傑志保持聯絡：「暫時都會計劃返上海先，始終嚟咗咁多年，無咩時間陪屋企人，都係想返去陪下佢哋。」「大哥」最後承諾，在下季季初回港、再正式與香港告別。
對於「最偉大的球員」一詞，黃洋就稱在看到之後「嚇一嚇」，自言會擔心「受不起」，但認為這正是其與傑志的連繫。
在今場賽事，兩隊球迷在比賽至19分鐘的時候，均為黃洋拍掌致意。黃洋先笑言，「希望呢一分鐘過得快少少」，並感謝球迷對其肯定和支持：「唔捨得香港呢個地方多啲，因為我所有成就都係香港呢個地方俾我，我喺香港一路都係發夢，呢個係令我實現夢想嘅地方，但我返到上海就要開始認真生活，呢個好現實。喺香港所有野都係好奇妙、好驚喜、好多挑戰、好新奇，好好彩遇到咁多願意支持我，幫我嘅人，同埋俾機會我嘅人。」
黃洋勉球員專注練習、比賽 指港隊接班人已證明
《獨媒》最後問黃洋，有甚麼說話勉勵傑志及香港足球。黃洋認為，每名球員和教練都要「專注自己」：「你唯一可以控制就係自己，當每個人都係做好自己嘅工作嘅時候，香港足球就一定有得發展，唔好太理其他人做成點，關注自己就ok。」
最後，黃洋由衷地說：「雖然足球係團隊運動，但佢最細嘅單位係每一個球員，希望每一個球員都可以專注喺自己嘅發揮、練習同比賽，咁自然成隊波就會好返，我相信下一季傑志一定會做好。」他亦讚揚一班港隊「接班人」：「港隊呢幾個，佢哋已經證明咗自己係得嘅，樂仔（陳俊樂）、晉銘（胡晉銘）、Fat Gor（林衍廷）、光頭（顏樂楓）都係非常好。」
記者：麥馬高、劉苑嫻
攝影：周頌謙