【足球明星選舉】東方再包辦最佳青年球員獎 盧比度冧莊最佳教練
【獨媒報導】足總周二舉行足球明星選舉頒獎禮，東方主教練盧比度繼去年再次贏得最佳教練，陣中的余在言、馬希偉亦雙雙奪得最佳青年球員，巴科爾則成為球員之星，葉鴻輝更獲頒港超聯上陣最多球員獎，成為頒獎禮大贏家。被問到是否有意成為港隊主教練，盧比度則表示，如能成為代表隊的教練是美妙的事：「呢個係一個好大嘅挑戰，亦都係每個教練嘅夢想，當然我宜家唔會諗呢啲，我只係想知安達臣發生咩事，或者佢唔會走呢？我唔知道。」
現年47歲的盧比度踢而優則教，在球員年代效力傑志，在2010至11年球季奪得香港足球先生、最佳十一人及及最受球迷歡迎球星，退役後曾任傑志、東方助教，在2021年「坐正」出任東方主教練。東方連續兩季採用青春班，並成功培養了不少年輕球員，周六會與深水埗爭奪足總盃冠軍。
盧比度：三名候選人都值得呢個獎 證重用年輕球員方向成功
盧比度認為，證明球隊重用年輕球員是成功的方向：「今年對東方嚟講係成功嘅一年，唔理嚟緊星期六會發生咩事，我哋攞咗好多獎，咁證明我哋係成功嘅。「我覺得一班年青球員正在冒起，上年兩個最佳青年球員都係由東方出嚟，今年都係。係好事，對吧？只要繼續就可以了」。
此外，盧比度今屆擊敗理文的曾昭達、大埔的李志堅，第二度贏得主教練殊榮，他感謝球員、教練團隊對其支持，認為兩名對手同具實力：「理文係今屆港超聯冠軍，佢哋做得好好，堅Sir 亦都喺聯賽度攞咗第二，佢哋兩個絕對可以攞到呢個獎。唔關幸唔幸運事，係關邊個可以贏到，今季我哋三個球會都做得好好，所以我先話我哋三個都值得呢個獎。」
接手教港隊？ 盧比度：我只係想知安達臣發生咩事
對於港隊主教練安達臣或會離任，足總周三中午將舉行記者會交代，盧比度表示對消息感到震驚：「今日個個都討論緊呢樣嘢，我哋到聽日之前都唔知道發生緊咩事。」
被問到會否有意成為港隊主教練，盧比度則表示，如能成為代表隊的教練是「美妙的事」：「呢個係一個好大嘅挑戰，亦都係每個教練嘅夢想，當然我宜家唔會諗呢啲，我只係想知安達臣發生咩事，或者佢唔會走呢？我唔知道。」
巴科爾成球員之星 盼來季續效力東方
早前與安尼亞平分神射手獎項的巴科爾，則成為球員之星，他感謝所有投票給自己的球員及支持者，認為獎項對其意義重大：「我覺得（今季個人表現）唔錯，球隊今年都表現得好好，如果球隊表現得唔好，我都攞唔到呢個獎，呢個獎係靠大家團隊合作得返嚟嘅，（獎項）俾咗我更大動力喺下季做好啲，亦俾咗我更多力量去努力啲。」
談到東方今季成績亮麗，巴科爾形容今季對東方「很好的一季」，個現階段會先專注足總盃決賽：「我哋嚟緊星期六仲有足總盃決賽，對球員同埋球會嚟講都好重要，我哋知道唔容易，但如果我哋贏埋就會係完美嘅一季。」
至於來季動向，巴科爾希望能夠留隊：「東方係好好嘅球隊，好似一個大家庭咁，我覺得可以效力東方係每個球員嘅夢想，但呢一刻大家都將所有注意力放喺足總盃決賽，呢樣都係我唯一諗嘅嘢。」
另外，東方在上屆包辦最佳青年球員，由孫銘謙、黃皓雋囊括獎項，今屆亦再次由余在言、馬希偉雙雙贏得該獎項。
東方連續兩年囊括最佳青年球員獎 余在言：期望每年都會有進步
22歲的余在言，他在2020/21年球季效力愉園，首次在港超聯登場，及後轉投標準流浪，曾到日本J3球會鹿兒島聯試腳。余在言今季加盟東方，表現更上一層樓，成為球隊常規正選，早前亦代表香港出戰亞洲盃決賽周，在對阿聯酋的比賽中後備上陣。
余在言稱獲選「最佳青年球員」是其近年目標：「始終我係最後一年可以攞，咁我都未攞過，好開心終於可以攞到呢個獎，但我宜家就想要更多！」他指今季個人表現超出預期，但就否認是「自我突破」的一季：「我覺得自己今季都係有好大嘅進步，呢個係我期望嘅，因為我期望我每年都會有進步，唔覺得係好breakthrough 嘅season，但我期望自己會繼續喺呢個軌道度改善。」
另外，余在言對《獨媒》表示，增強自信令自己在年青球員中突圍而出：「我覺得我今季個自信會比上季好咗好多，即係我嘅sense of confidence 去表現自己，去放膽踢返我自己嘅足球，我覺得呢樣嘢係我今季比較突出嘅characteristic。」
放膽表現自己 馬希偉：得獎的感覺夢幻
至於20歲的馬希偉，今季表現同樣能登大雅之堂。對於有指原屬東方主力、已轉投中超滄州雄獅的孫銘謙離隊，為其帶來機會，馬希偉不否認該說法，認同今季具時機和運氣：「上季嘅表現都唔係咁好，應該話唔穩定，咁今季都keep 住每場都有表現，無話好好，但好平均。」
此外，馬希偉稱今季較以往更放膽表現自己，得獎的感覺夢幻：「上年我都有過嚟呢個頒獎禮，但都係坐喺度睇孫銘、Anson，無諗過今年自己可以有機會上台攞獎，所以都好開心。」
記者：麥馬高、劉苑嫻
攝影：周頌謙