【足球明星選舉】陳肇鈞當選香港足球先生 勉香港球員「一定唔可以睇小自己」
【獨媒報導】香港足球明星選舉頒獎禮晚上舉行，港隊中場、效力大埔的陳肇鈞就個人包辦四個獎項，包括香港足球先生、最受球迷歡迎球星、港超聯最佳港隊球員及最佳十一人。對於相隔八年後再有本地球員成為足球先生，陳肇鈞就認為：「證明俾大家睇，香港球員係可以，一定唔可以睇小自己！第一樣嘢，如果睇小自己，就已經輸咗半條街。」
港隊在今年年初出戰卡塔爾亞洲盃決賽周，本地賽事多次「讓路」。在今屆四項賽事中，理文成軍七年來首次奪得冠軍，傑志成功衛冕高級組銀牌冠軍，標準流浪則贏得菁英盃冠軍；足總盃決賽在周六舉行，由東方與深水埗爭奪冠軍。
去年嘆過得不容易 年初亞洲盃決賽周射入第1,000球
足球明星選舉頒獎禮在灣仔會議展覽中心舉行，規格與傑出運動員頒獎禮睇齊。陳肇鈞個人贏得四個獎項，是今次頒獎禮大贏家。31歲的陳肇鈞上季效力晉峰，贏得球員之星，他當時就感嘆，球員過去兩年間在香港過得並不容易。
現年31歲的陳肇鈞今季重返大埔追隨李志堅，為球隊取得10個入球，苦盡甘來以大熱姿態贏得香港足球先生。在亞洲盃決賽周為香港在對阿聯酋的比賽中，陳肇鈞更為港隊取得零的突破，該入球更是亞洲盃決賽周歷來第1,000個入球。
形容獲獎是一吐烏氣 陳肇鈞：香港人嘅一個獎嚟
在贏得四個獎項後，陳肇鈞接受傳媒訪問稱：「我覺得係放低咗好多包袱，放低咗辛酸，甚至乎係烏氣，成肚都係！」他感謝身邊不少人一直關心自己，希望將殊榮與他們分享：「想見到有一日係咁樣，想見到我最好一面，呢個獎唔係淨係屬於我自己，係屋企人，香港人嘅一個獎嚟，我好想幫華人一次掃晒四個獎。」
陳肇鈞希望球迷能為其感到「一晚驕傲」：「我想同好多人講，港超係有好多有質素嘅外援喺度，好多入藉喺度，但我做到嘅嘢，香港其他嘅球員都可以做到！佢哋日後比我做到更好，我可能淨返三、四、五年生涯喺度，我希望香港球員可以超越我，今日咁好彩攞到呢幾個獎。」
陳肇鈞：奪獎對華人球員屬「好大嘅證明嚟」
另外，陳肇鈞同時感謝傳媒厚愛，並形容打贏了自己：「我今日絕對唔會停低，我會一路踩到上去。我唔會自滿，一定會推爆自己，繼續去突破自己。」他自詡，身形、性格都難以與其他人比較：「我無佢哋咁高大，咁體力化，咪一路去搵自己嘅方法突破自己，其他獎項、錦標係好順其自然咁樣嚟，我覺得我呢樣嘢終於做到！」
翻查紀錄，對上一次由本地球員贏得香港足球先生榮譽已要數到2015/16年球季，由效力東方的葉鴻輝奪得。《獨媒》問陳肇鈞，今次奪獎對華人球員的意義，他就形容「好大嘅證明嚟」，葉鴻輝當年獲獎是實至名歸：「阿輝咁多年都係我嘅偶像，我覺得佢係年青球員需要參考嘅一個球員，雖然我唔知我日後係咪。相隔8年，證明俾大家睇，香港球員係可以，一定唔可以睇小自己。第一樣嘢，如果睇小自己，就已經輸咗半條街。」
資料圖片
不與他人比較 只想成為更好的自己
在訪問期間，陳肇鈞有感而發稱，自出道以來常常與別人比較，在懂事後學會要迫自己成為更好的人，認為心態註定命運：「我嘅偶像，我嘅最好一面喺聽日嗰度等我，我要一路追住佢，追到佢比任何嘅嘢重要。我成日都覺得今日係唔夠好，我要下一場好過呢一場，但我知道下一場都唔會夠，因為後一場係會更好。」
在獲得港超聯最佳港隊球員的獎項時，陳肇鈞在台上未有多謝港隊主教練安達臣，他表示就對方的去留不便評論，現仍未知悉具體情況，但個人十分欣賞對方：「不過足球就係足球，無一個教練會留喺度100年。」陳肇鈞認為，外界不應將矛頭指向足總，主席霍啟山為香港足球帶來正面的方向，喚外界給予更多時間作證明：「而無論安達臣留低、去邊度都好，都好感激佢為香港足球嘅貢獻。」
下季未有定案 陳肇鈞稱要先享受假期
談到下季去向，陳肇鈞稱目前未有定案，但指如果留在香港，就希望可以為大埔爭取佳績，但會先爭取時間休息，尤其要好好享受假期。他笑言已很久沒有「放一個禮拜假」，今季亦已耗盡身體所有精力。
除了足總領導層、港超聯球隊職球員外，文化體育及旅遊局常任秘書長黃智祖、體育專員黃德森都有出席頒獎禮，其中黃智祖便與足總會長貝鈞奇一起頒發香港足球先生的獎項予陳肇鈞。
陳健安：歌手身份出席頒獎典禮意義重大 未能入選港隊成遺憾
另外，足總邀請了歌手陳健安及電影《白日之下》導演簡君晉任頒獎禮嘉賓，二人頒發最佳教練獎予東方的盧比度。
作為前球員，陳健安對《獨媒》表示，獲邀以歌手身份出席明星足球選舉頒獎典禮的意義重大：「對我嚟講，因為足球係我第一個夢想，唔算話有啲咩成就，同埋覺得有少少遺憾嘅，好想入到代表隊，但最後無入到。我唔想再經歷呢個遺憾，咁好好彩有我第二個夢想就係做歌手、做音樂，我就全力將呢個能量轉去追我第二個夢想。」
陳健安又表示，希望能與黃洋、林嘉緯「聚舊」：「我想見黃洋，黃洋係我以前踢PolyU 嘅時候一齊踢咗三年球隊認識，睇住佢由PolyU，跟住到佢踢甲組、踢港超，跟住到突然間變咗香港足球先生，同埋以前踢香港08一啲隊友，梁振邦、或者林嘉緯，以前踢港青都係同佢一齊踢。」
簡君晉留意本地足球多年 最支持陳肇鈞、謝家榮
至於簡君晉，他就提到留意本地足球多年，對獲邀成為頒獎典禮嘉賓感到高興：「其實第一次入球場睇足球係山度士嘅退休，好細個，我唔係好記得，都數唔到（幾多年）。但我真係久唔久都會入去撐香港隊，我係香港足球嘅球迷，今次由球迷變咗嚟頒獎我覺得好開心。」
此外，簡君晉表示最支持陳肇鈞及謝家榮，自己多年前更曾為本地足球開設專頁：「我最初讀完電影返嚟，我都搞咗個細細哋嘅香港足球網站，做小嘅香港足球記者，訪問下學界。」
2023/24香港足球明星選舉頒獎典禮得獎名單：
香港足球先生：陳肇鈞（大埔）
最佳教練：盧比度（東方）
最受球迷歡迎球星：陳肇鈞（大埔）
球員之星：巴科爾（東方）
寶礦力水特港超聯最佳港隊球員：陳肇鈞（大埔）
最佳青年球員：余在言（東方）、馬希偉（東方）香港足球明星十一人：
守門員：謝家榮（大埔）
後衛：高素巴耶夫（東方） ， 徐宏𠎀（理文） ， 加比爾（大埔），丹尼爾（東方）
中場：陳肇鈞（大埔），米基爾（傑志），馬高斯（東方）
前鋒：巴科爾（東方），安尼亞（理文），艾華頓（理文）
記者：麥馬高、劉苑嫻
攝影：周頌謙