【初選47人案】涂謹申鄺俊宇等8人續保逾3年 李桂華：案件仍在調查中
【獨媒報導】民主派初選47人案今日裁決，在16名不認罪的被告中，14人被裁定罪成，劉偉聰、李予信罪名不成立，律政司已提出上訴，警務處國安處總警司李桂華隨即在裁決後見記者。《獨媒》問到，同遭國安處在2021年拘捕的人士，包括涂謹申、鄺俊宇及劉凱文等8人至今仍無被起訴，續保逾3年。國安處在今次案件進行裁決後，將如何處理，李桂華只稱案件仍在調查中：「如果我哋有足夠嘅證據呢，會同律政署商量，考慮是否會繼續控告，或者進一步行動。」
劉凱文今日亦有到庭旁聽。
在裁決後，國安處在西九法院見記者，李桂華表示歡迎法庭裁決，稱雖然有兩人脫罪，但法庭判詞可見「呢件事好嚴重」，被告有串謀犯罪企圖，並且有不同角色：「雖然佢哋嘅參與度有所不同嘅，但係呢班人士全部都係目無法紀，以身試法。嗱，今日法院呢，喺毫無合理懷疑嘅定罪之下，將佢哋定罪呢，再加上義正辭嚴嘅裁決呢。我哋可以話佢哋嚟講，係當頭棒喝！畀佢哋知道，佢哋當時做嘅事係錯、係犯法嘅！」
批初選只是晃子 最終目的是「攬炒」
在見記者時，李桂華重提2021年1月6日的拘捕行動後，對傳媒進行的簡報會：「我好記得呢，當時有位記者朋友問我，點解初選會係違反國安法，係串謀呢個顛覆國家政權罪呢？」他稱其當時使用基本搜集證據作簡介，但就稱在經過118日的審訊後，將海量搜集回來的證據在法庭向傳媒、公眾及法官展露：「大家都應該明白，初選只係一個幌子，最終目的係想點呢？喺2020年9月嘅立法會選舉70席取半數，所以佢都叫自己計劃35+。」
李桂華斥該些人士在當選後迫令特首解散立法會，然後再重施故技：「唔能夠通過呢個嘅財政預算案，最終特首需要根據《基本法》第52條辭職，希望政府癱瘓。」
他又稱判詞已點出該計劃必然嚴重干預、阻撓、破壞特別行政區政權公關，依法履行職責：「我相信大家都唔會反對啦，3年幾後嘅今日，我哋香港相對好平靜㗎喇。但如果我哋當時無當機立斷，將呢啲人呢係完全抽咗出嚟，我哋香港就可能踏上佢哋『攬炒』十部曲嘅結果咁樣，繼續有好多唔同嘅示威、制裁啦，社會繼續咁樣停頓落去。試問大家係咪想有咁樣嘅生活？」
李桂華感謝同事付出 回應2人脱罪稱「調查質素相當之高」
李桂華及後感謝其同事就案件在拘捕、調查及法庭保安工作上，「付出咗好大嘅努力」：「你見到涉及咁多嘅人，同埋一個咁長嘅審訊，可想而知佢嘅難度，同埋佢嗰個壓力有幾大。」他又分享另一個「觀察」，稱在審訊期間有很多外來抹黑、恐嚇，對參與審訊的人造成很大壓力，但他們仍能肩負任務、履行職務：「我自己覺得呢，係真係好敬佩佢哋，能夠決心無畏無懼執行國家安全嘅職務。」
在發問環節，李桂華僅回答了四條問題。記者關注，今次是首次有國安法案件的被告罪名不成立。李桂華稱「審訊係睇證據」：「雖然今日案件有2位人士，暫時脫罪，但唔好唔記得呢，我哋有45位人士都係成功入罪。有部分係經過審訊，有部分係自己認罪，我覺得嚟講呢，我哋調查質素相當之高！不過我哋一定要尊重法庭嘅決定。」