深水埗足球隊聯熱心球迷義賣球衣籌班費：畀大家知道我哋都有努力

深水埗足球隊球衣贊助商的ATACAR負責人Travis及Roy、總監高俊基、捐出球衣的球迷Stanley

【獨媒報導】港超聯深水埗體育會足球隊在足總盃決賽，力戰至加時不敵東方。雖然球隊輸波，但表現贏盡口碑。不過深水埗足球隊上周（6月6日）表示，如七日內未能籌募約150萬經費，來季或無法續戰港超聯。球隊周日表示訊息公布後，收到大量球迷支持，宣布周二及周三（6月11日及12日）聯同兩名捐出球衣的熱心球迷，於贊助商ATACAR的場地舉行義賣活動。總監高俊基表示，目前收到多於一個贊助商聯絡，對此感到樂觀。他重申球隊無論如何會繼續營運，「畀大家知道球迷有努力，我哋都有努力。」

深水埗體育會足球隊（SSPFC）於6月6日公布下季欠缺150萬班費後，兩名熱心球迷Stanley與Ricky捐出球衣義賣，今日及周三於ATACAR的場地舉行。《獨媒》記者現場所見，售賣的球衣包括深水埗今季的港超聯主客場落場版球衣，亦有開售不足三小時便售罄的港隊球迷版主場球衣等，合共超過60件。除了球衣以外，現場亦出售印有港足代表隊球員的合味道杯麵、足球小將環保袋等，供球迷選購支持。

在場的深水埗足球隊總監高俊基向《獨媒》表示，義賣活動主要目的是向潛在贊助企業展示本地球迷的熱誠，增加球會獲得商業贊助的機會。他明言「如果冇（商業贊助），我哋係好難獨立靠政府同自己就可以營運到。」對於能否於七日內達標，高俊基笑稱：「唔知佢哋會唔會最後一刻反口」，但指目前收到多於一個贊助商聯絡，對此感到樂觀。他重申無論如何球隊亦會繼續營運，望「畀大家知道球迷有努力，我哋都有努力。」

捐出球衣的球迷Stanley稱，球隊即便班費少，但球季的發揮令人佩服，不論結果亦會繼續支持球隊。他盼各方做好自己的崗位，「有心人士啦，一個好嘅教練、好嘅團隊啦，好嘅backup啦，我哋都好需要政府嘅支持、好需要足總嘅支持嘅。」

本身是深水埗足球隊球衣贊助商的ATACAR，負責人Roy指球迷對義賣活動反應正面，今日早上便派出約30個籌號供球迷前來購買球衣。

多名球迷到場選購球衣，球迷Winston指自己一直收藏深水埗球會的球衣，自己雖然即將赴英求學，但會續支持球隊。另一名球迷John亦特意前來，稱「覺得本地球員好慘，值得有個平台留喺度」，「有多一隊球隊留就多一隊留」，望與香港足球一起走下去。深水埗球迷Jimmy雖然對結果悲觀，但仍望「盡快」，即便球隊因班費不足需降班，自己仍會繼續支持。

到場支持的深水埗球迷黎先生