【世盃外】港隊作客土庫曼「與世隔絕」 葉鴻輝指「上少幾日網」惟飛行時間太長

【獨媒報導】港足完成作客土庫曼的世界盃外圍賽賽事，轉飛土耳其返港。今場比賽不設直播，港隊球員在酒店以外亦沒有網絡，幾乎「與世隔絕」。一眾球員今日返港，隊長葉鴻輝向《獨媒》表示，作客中西亞國家有一定挑戰：「唔係環境同網絡問題，其實呢啲好小事。最緊要係飛機個時間太長，今次20幾個鐘，對球員嚟講都攰，當地環境或者網絡對我哋唔係好大影響，最多上少幾日網，反而係個旅程比較辛苦。」

被譽為 「中亞北韓」的土庫曼，今場賽事未有安排直播，香港球迷只能透過社交網站Instagram，從客隊球迷的限時動態了解戰況。對於兩地電視台都沒有直播，葉鴻輝稱感到可惜，形容情況不理想：「真係冇計，嗰邊嗰個情況係預計唔到，就算嗰邊有安排電視影場波，但最後都冇比到訊號出網上面，呢樣嘢我都覺得係唔太理想。」

足總圖片

葉鴻輝：冇一張電話卡啱用

今次作客土庫曼，港隊先飛往曼谷再轉抵土庫曼，回程更要到土耳其轉機，才能飛返香港。現時外國遊客如要前往土庫曼，亦先要透過旅行社才能取得簽證入境。今次作客對香港球員來說，可算是新穎的體驗。

至於當地環境是否能讓球員「專心」練習，葉鴻輝則認為沒有太大影響：「不嬲都係咁嘅，就算你有網絡去練波都唔一定拎部電話出嚟。」他表示，球員只能依賴酒店的無線網絡上網，當地亦沒有電話卡可供購買：「香港搵過冇一張喺土庫曼啱用，去到嗰邊都冇一張係可以用到，剩係得WiFi。」

隊友曾搵明加索夫幫手 黃皓雋笑言球員不可自行離隊

港隊前鋒黃皓雋則透露，部分球員在抵埗後曾聯絡傑志前鋒、來自土庫曼的明加索夫：「佢哋有問佢網絡、電話卡嗰啲嘢，睇吓佢幫唔幫到手，佢都話呢邊網絡真係唔太好，好彩酒店嗰度就有Wi-Fi，但得酒店有，去到其他地方，去到球場、機場都無。」

足總圖片

黃皓雋亦形容，今次作客的體驗獨特，並笑言球員不可自行離隊：「去返好舊式嘅出trip 方法，大家唔可以自己一個走開咗，如果失散咗就聯絡唔返。」

隨著港隊在世界盃外圍賽亞洲區出局，球隊將在明年3月轉戰2027年亞洲盃外圍賽第三輪賽事，賽事將在今年12月19日進行抽籤。