飲食業界推七一優惠 張宇人：當日起碼食四餐

（獨媒報導）下周一（7月1日）是香港回歸27周年，飲食界今年繼續推出七一飲食優惠，有逾2,000間食肆參加，包括大家樂、美心、牛角及部分蘭桂坊酒吧等，當中美心 MX推出「鮮茄焗豬扒飯」 71 折、牛角Buffet推出晚市套餐71 折，肯德基則推出7.1元一件葡撻等。自由黨張宇人今日聯同飲食界代表召開記者會，他笑言當日不只吃三餐，「見到呢個七一優惠，食三餐都唔止，最起碼要食夠四餐」。他又稱飲食業界「唔係為生意」，而是希望慶祝七一回歸，強調「完全係慶祝心態」，「慶祝的初心」十年不變。

牛角放題套餐七一折

今次「飲食業慶回歸優惠活動」有多間大型連鎖食肆及餐飲集團參與，包括大家樂、美心、牛角、富臨及蘭桂坊集團等。大家樂今年繼續推出「冬瓜盅二人小菜晚市套餐」 71 折；美心 MX及美心 Food2「鮮茄焗豬扒飯」 71 折；牛角「日本黑毛和牛及國產牛組合」 71 折、牛角Buffet推出「晚市精選極上和牛套餐」71 折；炑八韓烤「炑八秘製豬肉拼盤 」7.1 折；富臨則有七一回歸宴。

蘭桂坊多間酒吧亦推出七一折優惠，包括Studio 31 、Tai Tai Bar、The China Bar、Balady Lounge、The Sanctum等推出飲品餐單 7.1 折。另外，OK 便利店各款果汁推出71 折優惠，肯德基推出7.1元一件葡撻。

張宇人：業界不為生意 「完全都係慶祝嘅心態」

張宇人表示，希望今年有2,000至3,000間食肆參與，惟目前「三千未到，二千就過咗」，還需努力邀請更多食肆參與。他指，有食肆因人手不足，外勞又未到位，不敢在太多分店推出優惠，期望十一國慶食肆有較多人手，到時有3,000間食肆參與。

張宇人

被問到如何預料七一生意額，張宇人表示飲食業界「唔係為生意」，「而覺得我哋啲市民喺七一回歸嗰日，大家都開開心心，嚟到我哋食肆有優惠畀佢哋，咁幾好呢」。他指，邀請食肆參與是次活動時從來不會問生意如何，「由頭到尾個初心，到今日都唔會變，我諗再過十年都唔會變，我哋如果參與做回歸七一折、十一慶祝新中國成立七折，我諗我哋完全都係慶祝嘅心態」。

黃傑龍：希望更多人留港消費

優質旅遊服務協會主席黃傑龍表示，旗下集團大部分食肆都有推出七一折優惠，「有啲都減得幾堅，真係想大家開心，大家抵食啲，希望今年多啲人留港消費」，他又稱，隨著內地開放更多自由行城市，認為今次推出七一優惠可吸引更多旅客來港。

優質旅遊服務協會主席黃傑龍