中學教師問成功之道 葉劉稱做得耐、好捱得：俾人𢫏完幾巴當冇嘢
（獨媒報導）行政會議召集人、新民黨主席葉劉淑儀昨日出席書展講座，一名中學教師問到其成功之道。葉劉自評優點及缺點，先細數自1975年加入港英政府，出任政務主任至明年即將50年，自詡能力較現代年輕人來說只屬一般，「有人嚟聽我講吓嘢，因為做得耐咁解啫」：「今日有個位，大家嚟聽我講吓嘢，完全係因為我勤力，我好捱得㗎，我可以接受挫折，我俾人𢫏完幾巴，我當冇嘢。」
葉劉淑儀今年出版《從零開始再去闖》及另一本英文書籍《Regina’s English Works for you 8》，她周日在香港書展舉行講座，由港大副校長王于漸任嘉賓講者。
港大校政風波中被調職 葉劉三問如何稱呼王于漸
在港大校政風波中，原任港大首席副校長的王于漸，及後被調職至港大副校長（大學拓展）。在講座開始之前，葉劉淑儀先問到：「我點正式稱呼你？」王于漸回覆稱：「Richard。」
葉劉再問王于漸：「你正式title係？」不過，葉劉未待王于漸回應，便繼續說：「好多校友喺度，嚟捧你場，我今年真係天大面子，請到Richard，你係咪常務副校長呀？係呀，好忙，都要嚟。」
書名受夏寶龍講話啟發 王于漸稱「世界已經變咗」
談到書名《從零開始再去闖》，葉劉稱受到港澳辦主任夏寶龍講話的啟發，香港人必須順勢而變，並重申《維護國家安全條例》已通過，本港必須全力拼經濟，惟承認本港的經濟受到挑戰。
在講座上，本身是經濟學家的王于漸就提到一件事，指一名居住在奧地利、來自俄羅斯朋友，其孫女欲來港做交流生：「佢同我晚飯之後話，我孫女決定一定要嚟你間學校度做交流生，你記得留意佢嘅申請，幫吓佢啦。」
該名俄國朋友又對王于漸表示，兒子「唔走得」，原來要到內地東莞開拓商機，其紙張業務原本在俄羅斯、哈薩克及烏克蘭經營，但隨着打仗，在上網搜尋後決定「到東莞試吓」。王于漸最後稱，俄羅斯人在奧地利居住，兒子要到東莞做生意，孫女則到香港讀書，「世界已經變咗」，又指年輕人讀醫科不一定好。
批ChatGPT「反駁我寫嘅嘢」 喚局長利用AI將演辭譯英文
講座談到人工智能發展，葉劉淑儀自言「唔係一個好識用科技嘅人」，其同事會將她的文章用ChatGPT譯成英文，但發現有不少問題：「我發覺佢哋譯英美嘅狀況，就好掂，唔使改，但譯到香港嘅時候，就將我溝亂咗做另一啲政治人物，佢又未聽過新民黨。姓劉嘅政治人物，佢聽咗第二啲，有陣時仲會無端端加啲嘢，甚至反駁我寫嘅嘢。」
葉劉特別提到，近日曾向部份問責局局長提醒，在立法會的發言稿應譯作英文：「譬如你係航運中心，你面對全球航運界，點解你咁重要嘅演辭，你冇英文呢？佢話你睇我網頁就得，我話宜家人人都用AI，你叫你啲手下用AI啦！」
教師送高帽 葉劉謙稱銜頭、地位不重要
在發問環節，一名中學教師向葉劉淑儀稱，帶學生到書展講座聽「成功人士」：「葉劉議員係第一個女性行會召集人，都係新民黨嘅主席，都係匯賢智庫嘅主席，都係立法會議員，都係前保安局局長。其實我希望我啲同學呢，從你嘅身上，學到點解你可以咁成功，因為我覺得我哋啲學生，需要出去見識吓，趁呢個機會希望可以同葉劉議員學吓有咩成功之道。」
然而，葉劉淑儀不認同對方口中的「成功」：「你後先提咗咁多銜頭，同地位都唔重要。」她認為，自己的能力較現代年輕人來說只屬一般，因為很早便揀選文學科目，數學亦相對「豆泥」，自言能力不全面：「唯一搵到食就係，語言能力叫做可以啦。主要今日有人嚟聽我講吓嘢，因為做得耐咁解啫。」
葉劉：我個人唔夠數口，如果出去做生意一定仆
葉劉細數其過去50年的生涯，自1975年加入港英政府成為「AO仔」，「即係出年我做咗50年」：「同埋我個人唔夠數口，如果出去做生意一定仆。」她提到，50年來除了做官、9年的大學生涯：「撳地游水啫，我唔係真係咁叻，然之後返嚟都係搞政黨，搞智庫，做公共服務嘅嘢，搵錢我唔得嘅。今日有個位，大家嚟聽我講吓嘢，完全係因為我勤力，我好捱得㗎，我可以接受挫折，我俾人𢫏完幾巴，我當冇嘢。」
葉劉淑儀補充指自己有好奇心，亦會隨着時代改變學習新事物，勉勵學生如成績不好亦不緊要，只需要繼續學習，吸收新事物作創新。
葉劉： 美國大選邊位勝數高，大家都心裡有數
有市民問到對美國總統大選的看法，葉劉淑儀認為：「邊位勝數高，我諗大家都心裡有數。」她指西方傳媒亦關注特朗普、萬斯的共和黨組合，指上任後或會提升關稅，令美國通貨膨脹、美元較弱：「但對我哋都有好處嘅，香港同美元掛鉤，我哋啲嘢好貴，好難搞。」
葉劉認為，美國最大問題是隨時「累街坊」，在2008年已因次按導致全球金融風暴，而現時國債已高達35萬億：「美國表面好強，佢哋完全政治掛帥，未來我哋都一定有啲壓力。但一個國家，如果採取咁嘅政策，佢害咗自己，最怕佢累街坊。」葉劉認為，香港必須審慎做事，「你點強、點橫都好，做好自己啦」。
另外，多名新民黨成員均有出席講座，包括立法會議員容海恩、李梓敬、何敬康、創新科技及工業局政治助理廖添誠等，容海恩更攜同兩名女兒到場，廖添誠妻子、民建聯區議員郭芙蓉及女兒亦有出席。