黃傑龍稱商業活動以誠信行先 「無可能詐詐諦諦繼續收人咁多錢」

【獨媒報導】百年老字號「廖孖記」兩度被驗出腐乳樣本含菌量超標，其後被揭白腐乳並非香港製造，第四代傳人廖晃業今日在一個電台節目承認，30年前受排污條例限制，從內地廠商購入白腐乳加工。敘福樓集團主席兼行政總裁、稻苗飲食專業學會榮譽會長黃傑龍事後在社交媒體評論事件，指商業活動均以「誠信行先」，如因社會或法例改變，某一種生產工序不能在香港進行，應向消費者坦誠及交代，「絕對冇可能詐詐諦諦靜靜雞換咗唔話俾人聽繼續收人咁多錢」。

憶父親教導 保留價值觀比成本效率更重要

黃傑龍父親黃耀鏗在90年代創立敘福樓，全盛時期在港擁有33間酒樓。工程師出身的黃傑龍，2006年加入叙福樓集團，繼成父業並集團推行改革。黃傑龍今日在社交媒體Facebook表示，2017年接手經營敘福樓時，餐飲業開始講究「中央工場」，即是買現成點心、包裝上湯，而當時敘福樓的經營模式相當傳統，點心每日由師傅現場新鮮製作、所有上湯由師傅即場熬製。黃傑龍稱當時以改革者自居，便與一位包裝上湯的供應商見面，後來被父親斥責，「試吓都唔准，行入嚟門口都唔准，俾人見到佢行入嚟人哋都以為我哋用呢啲咁嘅嘢！」並禁止供應商再步入酒樓。

黃傑龍（資料圖片）

黃傑龍表示，當時對父親「咁嬲」感到愕然，但這件事令他明白，「我哋敘福樓係要貨真價實嘅，有啲嘢係會貴啲成本，有啲嘢係比較效率低，但係更加重要嘅係保留某一啲價值觀」。不過，黃傑龍指童話故事不會只有完美結局，最後一間敘福樓在2020年9月結業，堅持人手製作食品不代表生意好，「但係到結業之前最後嗰一日，我哋所有點心、上湯都仲係現場造。」

商業活動以誠信行先 「冇可能詐詐諦諦」

他認為，若因為社會或法例原因，某一種生產工序不能在香港進行，只能夠與消費者坦誠，「係唔係繼續買係消費者嘅決定」，「如果30年前某一個生產腐乳重要過程已經變咗唔係自己做，咁之後你啲宣傳、訪問、點可以繼續講返真嘅一樣現場做？」。他認為，所有商業活動都是誠信行先，並非限於「老字號」。

他亦以其新開的日本餐廳「挽肉と米」為例，指為了跟足日本社長要求，每日使用日本牛肉新鮮製作漢堡牛肉，在餐廳興建一個10度的玻璃冷凍房，「既然係公開講咗承諾咗，就當然係一直會咁做」，並稱若為了成本，在深圳購入漢堡扒，會先向市民交代，「絕對冇可能詐詐諦諦靜靜雞換咗唔話俾人聽繼續收人咁多錢」，「我亦都冇咁蠢會走去咁樣做，因為我爸爸17年前已經好認真咁教咗我做生意講誠信呢個終極道理」。