動漫節Cosplay專區須登記申請 Coser稱配額不足失交流機會感「唔開心」

（獨媒報導）香港動漫電玩節今日開鑼，以往免費入場的Cosplayer專區今年改為付費區域，參與的Cosplayer和攝影師均需預先登記及購買通行證，每日設名額上限。對於新安排，有Cosplayer向《獨媒》表示難搶配額，有人因此放棄來動漫節，認為「唔開心嘅心情更加多」，不但失去與其他cosplayer 交流的機會，「感受佢（動漫節）呢個文化嘅機會少咗」；亦有cosplayer 批評主辦方倉猝公布安排，令人大失預算，令家人朋友未能到場支持並感到「掃興」。

專為Cosplayer而設的「CosParadise」專區以往為免費區域，Cosplayer、攝影師及一般持票人士毋須登記入場。不過，主辦方今年有新安排，包括加租會展三樓場館作Cosplayer拍攝專區，並要求參與的Cosplayer及攝影師均需繳付20元及80元登記和購買通行證，每日設名額分別3,500個及300個。而其他一般持票人士進入該區域，亦須從網上領取免費門票及按時段進場。

搶不到名額棄來動漫節 Cosplayer：少咗感受文化機會

香港動漫電玩節本月2日在社交媒體Facebook 公布有關安排，不過消息一出就引來Cosplayer 不滿。Cosplayer Martin認為收費「唔係問題」，主要問題是配額不足，他指主辦方凌晨公布收費方案後，早上所有日子已滿額，認為「有啲唔公平」。

Martin指，身邊有不少朋友因搶不到配額，今年沒有來動漫節，或者只到一樓展館逗留「同人迫」。他認為「唔開心嘅心情更加多」，因為「感受佢（動漫節）呢個文化嘅機會少咗」。

玩Cosplay已有3年的Martin認為，Cosplay 專區沿用以往免費入場、不設限額的做法較好，或者循序漸進地改變，例如先加收入場費，適時再設名額。

批主辦方無為Cosplayer 着想 促早半年通知

Cosplayer 魷魚則批評主辦方推出有關安排時，未有為Cosplayer著想，「一睇呢個政策就知，佢係好趕急咁講出嚟，而無思考過大全」。她指，有海外Cosplayer為是次動漫節，提早三個月規劃行程及訂機票，「突然間收到話搶門票，佢哋又唔同國家，又唔係即刻download 到個app 去搶到，佢哋嚟到應該喺場外邊？」魷魚提到，有部分Cosplayer 團體人數達20至30人，他們難以確保每位團員均有入場證，最後團員只能各自玩。

魷魚同行友人虎虎提到，主辦方對Cosplayer實施嚴厲的規管，包括不能帶大型道具、硬性物料的道具、扮演軍人及執法人、必須穿着裝扮入場等，惟今日現場不少Cosplayer未有遵守規矩。虎虎批評主辦方「佢定咗咁多規矩，原來入到嚟咁多人違規，都無人理⋯⋯我唔知點解佢定啲規矩好嚴，但執行得好鬆」。

虎虎表示，身邊很多Cosplayer 今年都沒有來動漫節，甚至想來支持她的家人亦因為搶不到入場配額而沒有到場，「真係好掃興」。

魷魚則認為香港經濟仍在復甦，主辦方表明控制人流即如「叫人唔好嚟啦」，她身邊的Cosplayer 朋友寧願參加海外動漫展亦不參加香港動漫節，「認真，佢再咁樣搞落去，我下年就帶佢（虎虎）離開香港（出cos ）」。

她們認為，主辦方應早6個月作出通知，讓Cosplayer 作出更好安排。

攝影師稱80元入場費「十分佛心」 促增配額

到動漫節攝影已有6至7年的Akki表示， Akki認為收費問題不大，價錢亦合理，付款入場可以確保Cosplayer 免受行為奇怪人士的騷擾。不過，Akki就認為名額可再增加至600個，指主辦方倉猝公布收費方案，不少人申請不到通行證，「我啲friend話，嗰朝公布，晏晝12點已經買唔到想要嘅日期」，他們只能靠買「黃牛」或靠一般入場人士名額進入專區。

攝影師在Cosplayer 專區必須使用相機拍攝，亦不能在地面放置打燈腳架。《獨媒》在現場所見，有不少攝影師改用人手打燈，或邀請朋友協助打燈。

攝影師馬馬表示，去年動漫節已有有關規定，認為不影響攝影，Cosplayer 反而有更多空間展示自己亦更安全。馬馬認為，有關規則有其用處，攝影師應根據場地選用適合的裝備，亦不認為設立規則影響動漫節氛圍。

不過，馬馬同樣認為專區配額不足，又稱收費80元「十分佛心」，內地動漫節門票一張為100元，「其實開多個hall 加錢無乜所謂，因為攝所影呢一個興趣本身都洗錢⋯⋯所以玩得呢個興趣都無乜所謂，興趣大過一切」。