【獨媒報導】港超聯周日迎來煞科戰，大埔主場以3：1擊敗北區，以2分反壓理文，並繼2018/19年球季第二度贏得港超聯冠軍。在贏得冠軍後，大埔主教練李志堅先感謝領導層支持，包括會長葉吳彬彬、領隊兼副主席葉志雄，並球隊在早前多場大戰中十分緊張：「由上一場對流浪，好彩絕殺，到對傑志打返起信心，今場完全放開包袱，我覺得好開心。大家要欣賞足球，就係要欣賞呢啲嘢，唔好成日雞蛋裡面挑啲骨頭去講，你見到班人嘅努力，我覺得我哋值得攞冠軍。」

大埔今場陣容變動不大，謝家榮、李家豪、馮冠鳴及羅振庭均正選上場，陳肇鈞因傷繼續缺陣。此外，大埔3名哥倫比亞外援都不入比賽名單，包括伊達里奧、奇雲巴迪及奇雲莫雷拉。據了解，球隊已與他們解約。北區正選則有4名外援，包括基拿美、丹尼路、古杜拉，及有傳下季轉投傑志的隊長肯迪，艾利安今場停賽。

盧卡斯先拔頭籌 大埔半場領先兩球

上半場14分鐘，馬卡雷拿左路傳中，盧卡斯遠柱頂入，大埔領先1：0，看台上歡呼聲此起彼落。大埔大軍壓境，32分鐘，大埔右路角球，馬卡雷拿頭槌攻門，龐焯熙飛撲，加比爾近門再起腳，龐焯熙用腳再擋出。上半場補時階段， 伊高沙托尼左路爆開黃偉國再傳中，帕特華維迪力壓丹尼路頂入，「綠戰士」半場領先兩球。

在下半場換邊，大埔球迷獲悉理文踢少一人後，多人在看台上歡呼。流浪及後有安沙射入世界波，看台上又傳來歡呼聲，但經視像助理裁判覆核後，入球被裁定無效。在59分鐘，盧卡斯左腳力壓波比射門得手，大埔贏到3：0。68分鐘，舒拉普接應肯迪助攻，扭過韋法頓及加比爾，一度為北區追成1：3較接近的比分。

借將比迪高建功 大埔球迷看台慶祝

不過，大埔借將比迪高及後為標準流浪射成1：0，看台上的大埔球迷傳來慶祝之聲。80分鐘，丹尼路侵犯馬卡雷拿，球證廖國文先直指十二碼，他及後翻看視像助理裁判片段取消十二碼。那邊廂，劉智樂再下一城，標準流浪領先理文2：0，大埔球迷更高呼「香港華迪」；大埔最後以3：1擊敗北區。

大埔今季簽入多名外援球員，劍指港超聯聯賽冠軍，但球隊今年1月先後不敵港會、傑志，一度失去領先優勢。「綠戰士」其後曾回勇，惟今月初又遭冠忠南區逼和，在爭冠形勢上失去主動。此外，大埔主力陳肇鈞、馬高斯山度士等先後受傷，對球隊有一定影響。

在今場賽事前，大埔落後理文一分。由於理文以0：3不敵標準流浪，大埔以24賽17勝4和3負得55分排榜首，理文則24賽17勝2和5負得53分排第二。「綠戰士」在主場後上「正式宣埔」，來季代表香港出戰亞冠二賽事。

李志堅感謝大埔領導層 「佢哋無限度支持」

今場入場人數為1,486人，大埔主教練李志堅在賽後表示必須感謝女友，並應記者要求親吻對方。他同時感謝球員、教練團，及領導層即會長葉吳彬彬、領隊兼副主席葉志雄：「佢哋嗰個信任同支持，所有嘢都係有budget，但起碼喺我哋個budget，佢哋無限度支持，令到我好做啲。」

今季港超聯採用三循環，李志堅認為十分刺激，賽制相對上對大球會較有利，但認為球圈要包容一點，「佢哋都無辦法嘅，要維持返比賽數量」。他自言早在理文反勝九龍城的賽後已放下，形容當時的感覺是無語問蒼天：「我都問，點解要俾個希望我哋呢，真係好痛好痛。經過嗰晚之後諗返轉頭，係你就係你。」他表示曾對球員說：「如果我哋今年攞唔到冠軍，即係你未夠資格攞冠軍。」

李志堅又提到，大埔今季面對傷兵，最後在理文失分下贏得冠軍是「有運氣」，「但足球就係咁樣」、「足球聯賽係應該睇到最後」。談到今次奪冠的感受，李志堅重申，希望能夠回饋球隊領導層，認為贏得冠軍一點都不簡單：「希望外面正面啲，今日我哋贏咗，亦都唔等如第隊差。」對於借將比迪高入波，李志堅大讚對方不但是好球員，更是有情義的球員，即使外借到友會，仍不斷探望己隊。

失落兩項盃賽後曾反思部署 李志堅：諗嚟諗去都諗唔到答案

大埔今季一度有機會成為三冠王，惟先後失落菁英盃、足總盃，李志堅與記者分享感受：「我不斷都去反問自己，係咪部署錯呢，係咪有啲嘢應該唔要呢？但諗嚟諗去都諗唔到答案。」李志堅認為，一班年輕球員在菁英盃分組賽努力出線，球隊亦作相應調配，但及後在四強出局，陳肇鈞更傷出至今：「大家覺得要搵人問責，要公審一啲人，我好希望唔好再發生呢啲。今日我哋贏，唔等於人哋差，人哋都好努力，大家保護吓大家。」

他續表示，由於足總盃冠軍亦可以獲得出戰亞冠二資格賽，大埔沒有不去盡的理由，指球隊在早前多場大戰中，均十分緊張：「因為有好多十二碼出現，由上一場對流浪，好彩絕殺，到對傑志打返起信心，今場完全放開包袱，我覺得好開心。大家要欣賞足球，就係要欣賞呢啲嘢，唔好成日雞蛋裡面挑啲骨頭去講，你見到班人嘅努力，我覺得我哋值得攞冠軍。」

被問網上球迷「有聲音」 李志堅稱「最緊要知道自己做緊乜嘢」

《獨媒》問到大埔來季的組軍情況，李志堅稱現有外援都會留效，「今日贏咗之後梗係會再諗一諗」：「之前⋯⋯坦白講，都唔敢再諗住啦。老闆點樣好都好，都係人嚟啫。」他希望，大埔來季作為香港的代表，能夠「打好啲」。

在奪冠後，大埔球迷多次大喊「李志堅」，李志堅亦脫下球衣並拋向球迷。被問到今季面對不少起伏，外界一度有很多聲音，李志堅有一番見解，認為「喺呢度啲球迷基本上都無咩問題」：「係網上啲球迷啫，我哋啲球迷唔上網㗎嘛，你見到佢哋啲年紀啦。我啲老友成日話俾我聽，唔好睇啦。其實好慘，我真係唔睇，不過你側邊啲人會睇，睇完就send俾你，咁咁咁⋯⋯我話你唔好俾我睇啦，我覺得無問題，最緊要知道自己做緊乜嘢，做到就做，做唔到都無辦法，唔係你講兩句我就可以做到。」

葉志雄眼泛淚光 大埔是否改名將與球迷共議

在奪得冠軍後，大埔領隊兼副主席葉志雄眼泛淚光，他自言一向眼淺：「好希望佢哋攞到獎勵，今季咁多人受傷，咁多人出唔到賽，咁多人話我哋點點點點點，佢哋都贏得，咁咪好囉，最難得！」

此外，葉志雄表示，由於不希望給予球隊太大壓力，在賽前未有商討如何獎勵球員，稍後將與李志堅討論詳情。談到來季獲得亞冠二參賽資格，葉志雄只稱組軍事宜將交由李志堅負責。

被問到大埔來季是正式改名「大埔追夢」，葉志雄重申會與球迷商量共議，「如果覺得大家需要咪做」，強調持開放態度：「如果覺得唔好，唔過癮，咪OK囉。」會長葉吳彬彬則指，「佢哋個個都有夢想」：「又想入港隊，又想攞獎。」葉志雄補充說，現時不少政府項目都使用類似名稱：「咩共創明Teen，咩追夢經理人。」

馮冠鳴：邊度開心就邊度踢 肯迪承諾來季留港

據了解，大埔中場馮冠鳴獲東方青睞，馮冠鳴在賽後表示，「邊度開心就邊度踢」，稱作為球員希望不停進步、向冠軍進發：「希望成隊波一齊進步，下年望遠啲，亞洲賽都可以踢到成績」。

另外，有傳北區前鋒兼隊長肯迪獲傑志招手，他在賽後承諾，來季必定留在香港，惟現時未能透露詳情，「我知道我嘅計劃，但我而家唔知」。

版權: 
禁止衍生