【獨媒報導】港超聯鬥到最後一周，只要贏波即封王的理文在煞科戰下半場踢少一人下，以0：3不敵標準流浪，被大埔後來居上，未能衛冕。會長李文恩賽後表示今季人腳「唔係絕對嘅統治」，球隊發揮不會每次都理想，並預告來季組軍已有定案及將聘用華人教練。被問到成績反覆會否影響投資，李文恩坦言：「其實足球嘅嘢係好多面組成，唔會話你投資咗好多錢，攞唔到冠軍，唔玩啦，呢個唔係應有嘅態度。從中學習返今年係攞唔到冠軍啦，應該做啲乜先可以呢？」他最後又笑言：「當然，足球嘅嘢無錢真係唔得㗎，不過有錢都未必得㗎。」

鄭兆鈞再任正選 伊巴謙列後備

理文今場沿用對九龍城一仗正選陣容，由陳嘉豪把關，並盡用六名外援，包括泰花蘇尼、立花稜也、金旻奎、保利臣、安尼亞及羅沙，鄭兆均亦再次正選登場作攻堅，支援艾華頓。剛入選大港腳決選名單鬥曼聯的劉家喬在後備名單中，惟保連奴因累積5面黃牌需停賽。

仍有足總盃爭的標準流浪有多名主力復出，門將續為奧力斯，五名外援球員包括林遼太、安沙、比迪高、雷仙奴及姜鋧，配合劉智樂、巴拉克及姚浩明等人。累計有4張黃牌的伊巴謙、法蘭度及馬榕生先列後備。

理文狂攻下兩度中柱

理文甫開波便採取主動，7分鐘，羅沙禁區頂轉身起腳，皮球中柱彈出。18分鐘，鄭兆均傳中，安尼亞頭槌攻門，但被奧力斯擋出，1分鐘後，鄭兆均放直線，安尼亞射入，不過球證指越位在先。流浪尾段挽回攻勢，37分鐘，姚浩明左路發難，傳予巴拉克，再交橫雷仙奴，陳嘉豪及時出迎擋走。40分鐘，艾華頓右路連過姚浩明與梁煒烽，不過射門又中柱而出，雙方半場互無紀錄。

立花稜也被逐 比迪高劉智樂發威

51分鐘，流浪角球解圍，立花稜也「控甩腳」，被劉智樂偷走皮球，前者犯規阻擋，「兩黃一紅」被逐離場，埋下輸波伏線。56分鐘，杜度解圍不遠，安沙離門25碼控定轟入，但球證黃偉倫翻看VAR後，指他手球在先，入球無效。62分鐘，踢少一人的理文變陣，換入李毅凱串演左閘，收起鄭兆均。

74分鐘，巴拉克右路傳中，大埔借將比迪高門前射入成1：0，掀起全場高潮。理文最後15分鐘放手一搏，先後換入余煒廉及劉家喬，入替金旻奎與杜度，泰法蘇尼推上前踢前鋒。86分鐘，得勢不饒人的流浪把握保利臣傳失，雷仙奴彈前，劉智樂單刀射入成2：0。兩分鐘後，劉智樂再接應巴拉克助攻，輕鬆射入成3：0，是他今季第17個入球，這亦是今場最終比分。

由於同時間作賽的大埔以3：1擊敗北區，大埔以55分反壓53的理文奪冠，衛冕失敗。在完場後，理文球員均難掩失望，今日生日的艾華頓更躺在草地上，需要朱兆基扶起安慰。

今場入場人數為1,496人，青衣運動場今季首次掛上「紅旗」。理文會長李文恩、前主教練曾昭達、港隊主教練韋斯活及現效力中超雲南玉昆、前理文球員徐宏傑亦有入場。有買不到門票的球迷更坐在毗鄰宏福花園的天橋頂觀戰。此外，理文顧問陳鴻平將會退休，球會在賽後特設感謝儀式。

李文恩：攞唔到冠軍就唔玩，唔係應有態度

理文去屆以不敗姿態奪得港超聯冠軍，今季則經歷不少起伏，季初出戰亞冠二成績欠佳，原任主教練曾昭達在去年10月離任，由原任助教朱兆基出任暫代主教練。時任港隊助教賀蘭特在同年11月接任主教練一職，惟球隊在高級組銀牌決賽輸給東方，又在足總盃八強不敵標準流浪出局，最終在今年3月離任。在賀蘭特與理文分手後，朱兆基再次成為暫代主教練。球隊3月曾在主場以3：7不敵大埔，在今月初又不敵冠忠南區，今季正式「四大皆空」。

理文會長李文恩早前承認球隊組軍方針有錯，包括追求具履歷的外援球員，導致要為錯誤「埋單」。在比賽後，李文恩亦有到球場接受訪問。有記者問到理文成績反覆會否影響投資計劃，李文恩指形容今季人腳「唔係絕對嘅統治」：「一隊球隊嘅發揮唔會話100%每次都咁好，例如話（德甲）利華古遜舊年攞冠軍，今年拜仁攞啦。」他又坦言：「其實足球嘅嘢係好多面組成，唔會話你投資咗好多錢，攞唔到冠軍，唔玩啦，呢個唔係應有嘅態度。從中學習返今年係攞唔到冠軍啦，應該做啲乜先可以呢？」

稱組班已有定案 預告華人主教練

談到來季組軍情況，李文恩表示「大部份嘢都定咗」，只希望在一、兩個位置上有具級數球員加盟，並預告將有其他港超球員來投，位置涉及前中後，同時亦會有個別外援離隊。不過他不肯透露名字，只著記者等待宣佈：「有時好難講，我見到大家都有啲情緒，始終贏唔到失落咗冠軍，都唔係我哋理文咁開心嘅一日，唔想咁早講呢啲嘢住。」

李文恩曾指理文來季將會「年輕化」，他今日亦提到下季陣容會「多元化」，包括起用自家青訓球員，「本身有幾個今季考緊DSE，下季就唔係啦，可能升學、做全職球員咁樣，都好期待佢哋表現。」

將軍澳運動場6月起將關閉近10個月翻新跑道，對於理文來季主場在何處，李文恩指先要與「主教練」商量。記者即時追問「邊個係主教練」、是否外藉教練，李文恩沉思一會應道：「唔係外藉坦白講，係香港。講真嗰句又冇亞洲賽，外藉教練好貴㗎嘛，不如花多啲資源培養年青球員。」

朱兆基：及早處理球隊問題或較好

暫代主教練朱兆基賽後坦言「好唔開心」：「去到今日，我哋付出嘅努力係咪好多呢？點解唔可以一開始就做呢樣嘢呢？去到最尾有呢個機會好似好唔抵，但你問我係咪好值得贏呢？如果要作為一隊爭冠軍、代表香港踢亞洲賽嘅球隊，你見到有好多低級犯錯。」

「朱基」續稱有向球員提點，但無奈改變有限：「換轉我係佢哋，我都可能當耳邊風，呢個係其中一樣嘢，但當然仲有好多搏命嘅球員。我臨尾只係嗌住佢哋唔輸，其實再輸落去只係面子，輸咗啫唔使踢人呀，係咪？」他指理解球員有情緒，自己亦有很大的反省，認為「有啲問題早啲處理，可能最尾個結果未必係咁」。

有記者追問球隊「問題」所指是甚麼，朱兆基直言球員位置重疊：「你見到外援都overlap咗好多位置，上年某個別主力球員離開，又冇針對性強化返。我哋上年贏咗冠軍要應付亞洲賽，其實唔係咁簡單，人數都唔可以咁少，仲要應付盃賽幾條戰線，好明顯係有問題產生。可幸好多傷兵及時歸隊，但就係去到呢度。」

版權: 
禁止衍生