【獨媒報導】大埔在港超聯煞科日擊敗北區，後上力壓理文成為冠軍。兩名港隊球員謝家榮、陳肇鈞在賽後都非常激動，謝家榮形容，後上奪冠的感覺夢幻，期待來季為大埔出戰亞冠二賽事：「上年攞第二都踢唔到亞洲賽，但今年終於咬到個港超冠軍返嚟，最緊要下年有得踢亞洲賽。我相信，更加多人會支持我哋，相信大埔嘅球迷會更加熱情。我希望遲啲有一日，大埔主場可以開埋另一邊看台，full house呢個係我最想見到嘅畫面。」

對於首次奪得港超聯冠軍，謝家榮稱非常高興，形容是繼前年杭州亞運闖入四強後再次如此激動：「我唔想因為一個訪問我喊，而令到大家識我，令到件事熱度高。所以我有講過盡量之後唔再喊，我唔想用呢樣嘢嚟draw attention。我想用我球場上嘅表現，或者得到冠軍、個人獎項，令到大家認同我、去尊敬我。」

遭南區迫和後已打定輸數 感謝隊友、球迷不放棄

今季是謝家榮第三季效力大埔，他承認，在遭冠忠南區迫和後已打定輸數，「覺得今季完咗」，十分感謝一班隊友、教練及球迷不放棄：「我最後自己都無放棄，嗯，對完南區個場，我自己係有少少準備下季嘅感覺。」

不過，謝家榮稱在奪冠後仍流下眼淚，「我都要叫自己hold住」。他指連同季前集訓，今個球季長達10個月，大埔曾高踞榜首，在遭冠忠南區迫和原本已打定輸數，「嗰吓係好似天跌落嚟」，在對標準流浪一戰亦顯得患得患失，「好彩大家都無放棄」。

謝家榮表示「今年港超係綠色，係我哋」：「最Perfect係喺主場捧盃，仲要最後一場煞科戰，一路聽住隔離係點樣，一路要focus喺呢邊，我諗我呢一世未必會再經歷呢個畫面。」他自言，在25歲贏得港超聯冠軍是「唔遲唔早」：「有諗過今年攞唔到，會唔會要⋯⋯下年未必一定攞到，唔知要等多幾耐。」

陳肇鈞：做好自己已等於贏咗 指個人獎項只是副產品

去季當選足球先生的陳肇鈞，在今季季尾不幸受傷，連續缺陣大埔多場賽事，他對能夠後上贏得冠軍感到高興。被問到「冧莊」足球先生的機會，陳肇鈞就認為個人獎項只是副產品：「啲人投我咪投我，唔投我都無計，我又唔會話拉票。」

陳肇鈞再次重申，「做好自己已等於贏咗」：「今季我咁樣樣，就算一個獎都攞唔到，我覺得已做到最好，俾大家睇到我最好嘅一面。」他稱感激不少年輕球員視其為參考對象，「已經受到上天嘅眷戀」：「如果有一日佢哋可以過我頭，踢得好好，我都會好開心。」

在陳肇鈞受傷後，李家豪繼續交出助攻，羅振庭更扮演雷霆救兵。陳肇鈞再三感謝隊友付出，「最尾獎項歸邊個都係平常心」。他指不論東方的巴科爾，抑或理文的艾華頓，今季的表現均足以成為足球先生：「我今季最尾嗰幾場波踢唔到無得爭，打個折扣啦，但我知道我下年一定返出嚟。」

版權: 
禁止衍生