【獨媒報導】中國香港足球總會周三舉行足球明星選舉頒獎禮，標準流浪前鋒劉智樂首次入選最佳十一人，他在獲獎的時候聲淚俱下，感謝母親一直支持。劉智樂坦言，在數年前曾心灰意冷及想過轉行，在新冠疫情後仍然繼續踢職業足球，最終憑藉堅持、努力終於獲得回報。他希望，今次獲獎能夠證明，華人能夠與外援球員「有得爭」。

現年31歲的劉智樂，今季已取得17個入球，超越孫銘謙在2022/23年球季射入14球的紀錄，成為首席華人射手，更有球迷稱呼其為「香港華迪」。不過，劉智樂至今未曾代表香港在國際A級賽上陣，港隊主教練韋斯活只曾在省港盃中派遣其後備上陣。

在前鋒的最後六強中，劉智樂擊敗盧卡斯、伊高沙托尼、迪美路夫，與巴科爾及艾華頓一起成為最佳十一人。在獲悉得獎後，劉智樂第一時間擁抱母親，並與標準流浪總幹事李輝立握手。在上台後，劉智樂有感而發，指自己的足球的行得比較慢，並詢問母親：「媽咪，我今季表現得唔得呀？」劉智樂母親在台下大喊：「得！」此外，劉智樂又感謝隊友姚浩明，因為對方常常在訓練中責罵自己，令其進步。

曾心灰意冷想過轉行 憑堅持及努力終獲回報

在接受傳媒訪問的時候，劉智樂仍然眼泛淚光，他稱獲獎是很神奇，又形容是難以相信的事：「可以入選六強都好難，更何況可以實實在在攞到埋個獎，好唔容易，自己亦都唔敢相信。」

談到以華人身份與外援球員競爭，是否曾經有心灰意冷的時候，劉智樂承認數年前曾想過轉行，自嘲「好彩」未能轉工，新冠疫情後繼續踢職業足球：「可能自己嘅堅持、努力，終於喺球場上面得到回報。」他表示「前鋒就係咁」、「入行順就會不斷咁嚟」：「呢幾年⋯⋯總之就好多謝每一個俾機會我嘅人，不斷咁去進步。」

劉智樂盼獲獎「閃少少」 能吸引韋斯活目光

被問到獲獎的意義，劉智樂認為證明了華人球員亦可以競逐最佳十一人的前鋒，「唔係每一年都6個外援球員」，而過去10年能夠獲獎的華人球員「一隻手數得晒」：「呢一刻到自己做到出踢嚟，呢一項都未敢相信。嗯，意義⋯⋯嗰意義係，我唔知講咩好⋯」

記者追問劉智樂「仲有咩想得到」，尤其港隊主教練韋斯活今日亦有出席頒獎禮。劉智樂重申，教練如何用人、戰術有其部署：「自己都叫做行入教練呢條路，都清楚明白有時真係無辦法，可能真係戰術唔啱用，無得強求。」然而，劉智樂有一個希望：「攞到呢個獎⋯⋯叫做有希望，喺佢嘅目光入面，再叫做閃少少，睇吓吸唔吸引到佢嘅目光，呢樣嘢唔可以強求嘅。」

偕母一起出席頒獎禮 劉智樂：睇我着西裝又好，睇吓我出嚟見吓大場面又好

作為本地球員，自然希望能代表港隊上陣。劉智樂亦承認十分渴望：「自己未試過喺A級賽香港隊上陣，未試過感受兩萬人嘅氣氛，呢樣嘢所有球員都想試，包括我自己。我只可以做好嘅⋯⋯唯有努力做好自己，入多啲波，去爭取好嘅表現，令到真係覺得需要揀我入去，而唔係因為都啲聲音。」

劉智樂今日偕同母親一起出席頒獎禮，他指球員要在整個球季保持好表現並不容易：「要咁樣先有機會入圍去爭，就算我今日攞唔到獎，我都會叫我媽咪嚟，睇我着西裝又好，睇吓我出嚟見吓大場面又好，同佢影吓相。」

版權: 
禁止衍生