【獨媒報導】英超球會曼聯訪港與港隊進行表演賽，雖然「紅魔鬼」今季英超成績欠佳，仍成功吸引33,098人入場。主辦單位國際文娛管理有限公司主席金偉明表示，對入場數字收貨，承認球隊成績欠佳對銷情有一定影響：「我哋一開始做呢，個個都話有無搞錯呀，搵曼聯嚟⋯⋯搵啲咁低檔次嘅球隊。我舊年傾嗰陣時，都唔會知佢今年成績咁樣，大家都唔想。」

金偉明稱整體感滿意 曼聯部分球員受傷仍來港

在比賽後，金偉明被問到是否滿意今場賽事的入數數字，他指作為主辦單位，「梗係希望4萬人坐滿」：「呢隊曼聯⋯⋯可能差少少，就因為佢哋今季個表現差啲，最後都差幾千。」

不過，金偉明對整體仍感到滿意，包括賽果、球隊大部分主力球員來港，並透露去年已開始商討舉辦賽事：「我舊年傾嗰陣時，當然唔知道今年成績咁樣，呢啲嘢無得咩預計。正如佢有啲受傷嘅，平時一支球隊帶25人，佢今次帶咗成30個嚟。」他又補充提到，曼聯部分球員受傷仍然來港，「我覺得係OK嘅」。

原欲安排7月訪港 重申球員煞科戰後沒回家便到亞洲

至於門票收入，金偉明表示「未知」賺或蝕，目前只獲悉逾3.3萬人入場。有記者問金偉明會否希望曼聯「留耐啲」，他透露原欲安排曼聯在今年7月訪港：「佢哋突然間話要去美國，就唔嚟啦。我就話喂唔得、有無搞錯，傾好晒你話唔得，跟住我話，踢完5月賽季完啦，咪傾咗呢段時間。」

他重申，曼聯在英超煞科戰與維拉交手後，一眾球員沒有回家便到亞洲，加上整個團隊逾百人：「佢哋即刻去機場，所以都算係咁啦，佢哋成隊咁出嚟。」

為曼聯球員護航 認為在港表現較馬來西亞好

曼聯過去歷年曾多次訪港，並且是深受港人歡迎的歐洲球會之一。金偉明認為，「運動員落得場都唔會想輸」：「只不過足球係11人嘅賽事，跟得唔好，有啲問題發生，繼續沉落去。」

金偉明不忘為曼聯球員護航，指球隊今季在英超成績欠佳僅排第15，並失落歐霸盃冠軍，球員在抵達馬來西亞後心情自然很差，更要面對時差、不適應飲食、睡眠欠佳及天氣濕熱等：「（香港）呢場波，我嘅睇法就踢得好過嗰邊（馬來西亞），肯定㗎啦，佢哋跑得快過嗰邊。」

記者追問會否邀請成績較穩定的球隊來港，金偉明就稱「你唔知㗎」，指多年前曾邀請車路士來港在小西灣運動場比賽，「藍戰士」來港前夕贏得足總盃冠軍：「呢啲嘢你唔知㗎嘛，佢輸咗又影響你票房。」他再三重申，曼聯在港擁有很多球迷，加上要兼顧內地、東南亞市場。

研究門票手續費 預告來年賀歲盃或再邀名宿訪港

談到今場賽事每張門票手續費達100元，金偉明指該項費用是票務公司的收入，「票務公司都要搵錢嘅」，稱已聆聽球迷意見並再作研究。他認為，「今時今日搞波真係要俾心機搞」：「唔係求求其其叫咗曼聯嚟，就抌低佢。」

國際文娛管理有限公司曾多次舉辦不同足球賽事，記者問到是否已計劃主辦來年賀歲盃，金偉明稱「已經諗」，目前仍在研究賽制、形式：「多數對名宿㗎啦。」他強調，個人希望邀請「跑得」的名宿球員來港：「所以應該都係好睇嘅。」