（獨媒報導）戲院結業潮持續，嘉禾MegaBox昨日宣布於下周一（6月9日）結業，是年內第6間結業的戲院。香港電影工作者總會發言人田啟文今早在電台表示屬預料之內，戲院將由影藝院線接手，認為結業潮並非「不可挽救」。不過田啟文強調，戲院與電影業屬「唇寒齒亡」關係，戲院數量減少影響上映電影的多元性，籲電影業界要「痛定思痛」 ，不可以再「食老本」，想辦法吸引觀眾重回戲院。

繼今年4月結業的嘉禾黃埔和6月1日結業的嘉禾海運，嘉禾院線再執一間，嘉禾MegaBox將於下周一結業。該院線2年內共有6間戲院結業，現只餘Stag E（tmtplaza）、the sky、嘉禾銀河廣場及嘉禾大埔4間戲院。

田啟文：票房下滑 戲院難應付租金

香港電影工作者總會發言人田啟文今早在港台節目《千禧年代》表示，嘉禾MegaBox結業屬預料之內，延續去年開始的戲院結業潮，「一間開始結業嘅時候，我就已經預警。」他提到戲院本身「唔係個個月都賺錢」，「佢喺旺季裏面佢賺咗嘅錢，嚟去補貼返淡季嘅嗰蝕本」，惟現時不論西片及華語片的票房皆告下滑，令不少戲院難應付租金，租約期滿後索性直接結業，「你個租金唔減嘅，我真係走囉。」

不過他對現況仍感樂觀，指部分戲院結業後有新院線接手，「我會見到有實力嘅營運者仲係喺度堅持」，並非所有戲院出現問題，結業潮並非「不可挽救」。

田啟文：戲院與電影唇寒齒亡

戲院結業潮，會否對港產片構成影響？田啟文指戲院和電業產業環環相扣：「我哋係唇寒齒亡咁嘅啫，我哋拍完一部戲，無個戲院去放映，咁拍個戲嚟做咩嘢呢？咁無得拍戲，政府搞個電影發展基金嚟係又搞咩呢？」

他表示戲院數量減少，代表可放映場次減少，院線會優先選擇「多賣兩張飛嘅戲」，進一步壓縮新晉電影人和小眾題材電影的空間，影響電影多元發展，「世界只有係一樣嘢，係百花齊放先會繁盛㗎嘛，就唔係孤芳自賞咁，我有飯食就得㗎嘛，你哋其他人無啦，我就唔係用呢種心態去睇戲院。」

無標題
田啟文（資料圖片）

籲電影業「痛定思痛」勿再「食老本」

雖然去年有《破．地獄》和《九龍城寨之圍城》兩套高票房港產片，但田啟文指整體電影業市道嚴竣，最大硬傷為觀眾「揀戲睇」，以及收看串流平台取代戲院，「佢係側埋一邊，原本我係睇十部戲嘅一年，宜家我淨係睇兩部，因為嗰兩部有話題，我有即時睇嘅必要。」

面對市民消費模式改變，田啟文指「無得怪任何人」，籲業界考慮日後拍攝戲院限定版本，「電影去到今時今日，唔改係因為我哋以前太懶。」田啟文又籲業界「痛定思痛」，勇於創新：「宜家再要拍嘅戲，唔可能再千篇一律。呢一套得呢，我就食老本，係咁拍，拍到佢謝，拍到佢殘為止，咁你咪無咗個多元。」

霍啟剛指倡放寬戲院牌照規定

體育演藝文化及出版界議員霍啟剛在同一節目指，全球戲院皆生意難做，而本港戲院因租金高昂，令利潤微薄，「如果淨係賣飛呢，基本上可以話係啱啱回到本啫，好靠小食，好靠係賣爆谷、飲嘢呀。」惟霍啟剛指現時經濟情況嚴峻，市民減少消費，令戲院收入大減，擔心結業潮會形成惡性循環，令市民進一步轉移至串流平台或其他網上娛樂。

霍啟剛
霍啟剛（資料圖片）

雖然政府去年注資14億於電影發展基金，惟霍啟剛憂業界過份依賴政府，令投資者獲政府補貼才願意開戲。他認為需就戲院牌照「拆牆鬆綁」，令戲院可以「自食其力」。他舉例可參考內地容許觀眾在戲院「食火鍋」，或開放busking、現場直播比賽賽事等。